Read saamia Ohutula 15 Bible Online

Ohutula 15 - saamia bible

Ohutula 15

¹Bulaanu, Musa alala neende Abaisiraeli beembera Omwaami olweembo luno: “Njia ohweembera Omwaami waange olweembo, olwohuba ayingiire neende oluyaali lw'amaani; asukuune efaraasi alala neende abeerusi baachio mu nyaanja.

²Omwaami niye amaani kaange haandi olweembo lwaange; haandi yeholere omuwonia waange; Wuno niye Nasaae waange, mani njia ohumufumia. Niye Nasaae wa laata yaange, mani njia ohweemba obuhunuufu bwae.

³Omwaami mulwaani mululu; eliita lyae nilyo, Omwaami.

⁴“Omwaami yasukuna ebigaari bya omutuki wa Misiri neende abalwaani bae mu nyaanja; mani abalwaani bae bahiramo amaani beebira bahamira mu Nyaanja Njahanyu.

⁵Enyaanja enjoloberefu eyo yabamira; beebira boola hu lwaalo lwayo koti ekina.

⁶Ewe Omwaami, omuhuno kwao muluungi, kulimo amaani k'oluyaali; kunyoonyobola omusuku mu bituundu-tuundu.

⁷Mu buhunuufu bwao bw'amaani, oyiingira abatahudaha; etima lyao lyaaduha koti omuliro, mani lyasaamba koti omuliro kusaamba ebikoha.

⁸Wafuuta hu nyaanja mani amaachi kebuungiha kaaba koti egenya leeyi muno; kasiingira keema kaniina kaaba koti esida; ebusiba yihiramo mu nyaanja eyo yeehola obwoomu.

⁹Omusuku yaboola ati, ‘Njia ohubaloondaho mbadiire; Njia ohukabaniamo obuyiinda bwaabwe, mani mbukule bi ndaha byoosi; Njia ohusobolayo olugaanga lwaange mani mbukule bi bali nabyo byoosi.’

¹⁰Nae ohuyeera hwao hulala, ewe Omwaami, kwanyala ohwiibisa Abamisiri boosi; beebira koti esichuma sisito muno mu maachi k'amaani ako.

¹¹“Ewe Omwaami, wiina mweene, mu banasaae boosi oli koti ewe? Wiina mweene oli koti ewe, ewe omuhunuufu mu bwoolerefu? Wiina mweene onyala ohuhola eby'amayia neende ebiholwa by'amaani koti ebyao?

¹²Ewe niwakolola sa oti omuhono kwao muluungi, esyaalo syamira abasuku beefwe.

¹³Ewe omweesikwa mweene mu byosuubisa, wanyala ohwiimirira abaandu bawali noomalire ohununula; ewe omweene neende amaani kao, wabagooba waboosa hu loba lyao lyoolerefu.

¹⁴Ebyaalo biindi byamala ohuwulira, mani biteengereha neende obuti; Abafilisiti bakwiiremo oluteengo.

¹⁵Abeemirisi ba Edomu batiire; Abasaacha bahulira Moabbu bali ohuteengereha; abaandu ba Kanani baweeremo omwooyo.

¹⁶Amatiichasi neende oluteengo bi bakwiiremo. Babweene amaani kao koti lu kali, ewe Omwaami, mani bateng'eng'aale neende obuti ohwoola lu baandu bao bahuumba baabitao, abaandu ba walehuula ohutula mu buwaambe.

¹⁷Ewe obaleeta wabeengisa mani wamala waabaniinia waabateengeha hu lugulu lwao, abuundu yi ewe mweene, Omwaami, wedoolera ohuba edaala lyao, Enyuumba ya Nasaae yi ewe omweene weyoombahira.

¹⁸Ewe, Omwaami waange, ochia ohuba omutuki endaalo choosi pe.”

¹⁹Abaisiraeli bakeenda bahalakania enyaanja hu loba lyoomu. Nae ebigaari bya Misiri alala neende efaraasi chaabyo neende abeerusi beene bachia boosi beengira mu nyaanja, mani Omwaami yaakobosa amaachi enyuma, kaabamira.

²⁰Miriamu omunabbi muhasi, haandi mboochoong'ene Arooni, yabukula nyaangili yae, mani abahasi boosi nibamuloondaho, niboobba nyaangili haandi nibahina.

²¹Nae Miriamu yabeemberaanga ati: “Yembere Omwaami, olwohuba ahirire ohuhira hw'oluyaali; asukuune efaraasi alala neende abeerusi baacho mu nyaanja.”

²²Bulaanu, Musa yeemirira Abaisiraeli yaabatusa hu Nyaanja Njahanyu mani yabeengisa mu siparara sya Suuri. Endaalo chidatu enaamba, bali nibakeenda ohuhalakania mu siparara esyo, nae byaabahaya ohunyoolaho amaachi koosi.

²³Mani boola abuundu alaangwa mbwe Mara, nae amaachi akali eyo kali amalulu muno kaabahaya ohung'wa. Mani sakira abuundu ao yakulihwa eliita Mara. Eliita lino mu Luibburania lyeekesa “Obululu.”

²⁴Abaandu bekanyiirisira Musa nibateeba bati, “Huchia ohung'wa siina syeene?”

²⁵Musa yekweeda Omwaami neende omwooyo mulala, Omwaami oyo yamweekesa esihwi siindi, si yasukuna mu maachi ako; mani keehola amalai kanyala ohung'weeha. Abweene ao, Omwaami yaheengao ohubaberesa amalako kabahoyere ohumenyeraho, haandi abweene ao niwo yi yabapiimira.

²⁶Yaboola ati, “Nimuchia ohuumbulirira elalira nimuholaanga ebyo bi mbaberesa ohuba ebyadyeeri, neende ohuliindaanga amalako kaange, mba siinja ohubasaandyaho neende amalwaae kandaleteraanga Abamisiri. Ese niise Omwaami mweene, haandi oyo obawonia.”

²⁷Haandi boola Elimu, eyali esulo ehumi neende chibiri, neende emisaala minaasi amahumi kataanu-na-kabiri; Eyo niyo yiboombaha ekaambi eyali aambi neende amaachi.