Read saamia Ohutula 22 Bible Online

Ohutula 22 - saamia bible

Ohutula 22

¹“Omuundu yeesi niyeeba eng'oombe oba ekoondi, nihaandi yeemao ayiita oba ayikusa, ahoyere ohutuunga eng'oombe chitaanu echituunga eng'oombe ndala yira, oba amakoondi kane akatuunga ekoondi lala lira.

²Nae esisolo siibirwe esyo nisyaakaanwa nisisisiiri esilamu haandi nisisisiiri mu mahono kae, nisiba nisiri eng'oombe, oba esuhiri, oba ekoondi, omwiibi oyo aba ahoyere ohutuunga esisolo esyo amahabi kabiri koong'ene.

³“Nae omwiibi niyaakaanwa esiro naali ohufunaka omulyaangiro kw'enyuumba yeengire yeebe, mani yaahuywa yaafwiirao, abulao amabaanga kae kaba nikachia ohuloonda omuundu yeesi;

⁴nae niyaakaanwa nibuhyeere esyaalo nisimoka, omuundu oba naamwiitire aba aliho omusaango kw'obwiiti.

⁵“Omuundu yeesi naaleha ebisolo byae byaaya mu mukuunda oba muundalo y'emisabbiibbu, mani byaakota byoola ohulya ebitaake biri mu ndalo y'omuundu wuundi, omweene bisolo oyo aba ahoyere ohutuungao ebitaake biba ni byaayirwe ebyo neende ebitaake bihiramo obulai ohutula mu ndalo chae omweene.

⁶“Omuundu yeesi nachaakisa omuliro mu mukuunda kwae mani omuliro okwo kweecha kwaamuyiingira kwoola ohusaamba ebitaake biri mu ndalo y'omuundu wuundi, omuundu oba achakiise omuliro okwo aba ahoyere ohutuunga omweene ebitaake biba ni biyiire ebyo.

⁷“Omuundu yeesi n'afukiirira ohubiihira owuundi eseende chae oba ebiindu biindi by'ebbeyi byoosi-byoosi, mani eseende echo oba ebiindu ebyo byoola ohwiibirwa mu nyuumba yae, omwiibi mweene, niyakaanibwa, aba ahoyere ohutuunga amahabi kabiri byaaba niyeebere.

⁸Nae omwiibi mweene n'atanyoolehana, mani omuundu oyo owali naali niye obiihiire ebiindu by'ebbeyi ebyo ahoyere ohuleetwa abuundu yeenamirwaangamo Nasaae, mani abweene ao niwo yaaba yeechubire ohweekesa obwadyeeri mbwe haba siniye oweeba obuyiinda bw'owaasye oyo.

⁹“Mu buli musaango kudiira hu buyiinda bw'abaandu, oba kudiira hu eng'oombe, esuhiri, amakoondi, engubo, oba esiindu syoosi esiba nisikotere, abaandu babiri ababa ni babiyiinganira, boombi bahoyere ohuyirwa abuundu yenamirwaangamo Nasaae. Mani oyo yeesi yi Nasaae aba achia ohudiisa omusaango, niye oba achia ohutuunga owaasye ebiindu byaachana ebyo amahabi kabiri.

¹⁰“Omuundu yeesi naakanya ohuliindira owaasye esuhiri, eng'oombe, ekoondi, oba esisolo syoosi-syoosi, mani esisolo esyo siicha sifwa, oba sinyaaliha, oba sipeeyerwa sa mu hupeeya, nihaandi nikali mbwe abulao oyo yeesi oba niyabona,

¹¹omuundu oyo ahoyere ohuchia abuundu yenamirwaangamo Nasaae, niyeechubira ebweene eyo ati haba siniye oba niyeebere ebisolo byowaasye oyo. Nikali mbwe hane esisolo esyo haba si syeebwa, omweenesyo ahoyere ohufukiirira ohufwiirwa ohwo, mani owaasye oyo ahaye ohuba mbwe amutuunga;

¹²nae esisolo esyo nisiba mbwe hane syali nisyeebwa, omuundu mwiibi oyo ahoyere ohutuunga owali omweenesyo.

¹³Nae nisiba mbwe syali nisiitirwe neende esisolo sy'omuusiino, omuliindi oyo ahoyere ohuchia yaleeta ebiba nibyadoong'aho hu sisolo esyo koti esyohuboneraho; aba haba s'ahoyeere ohutuunga esisolo siba nisyaliibwa neende esisolo sy'omuusiino esyo.

¹⁴“Omuundu yeesi niyeyasihaanga esisolo sy'omuundu wuundi, mani syaanyaaliha, oba syaafwa omweenesyo nataaliwo, oweyasiihe oyo aba ahoyere ohutuunga esyafwa esyo.

¹⁵Nae sino nisiholehana omweenesyo naaliwo, wula haba saaba nahoyeere ohusituunga daawe. Nae esisolo esyo nisiba esipangiiswe, ohufwiirwa ohwo huyeraana neende eseende ch'ohupaangisa.

¹⁶“Omusaacha yeesi oserera omuhaana otaamanyire eby'abasaacha, haandi osisiiri ohwaanjulwaho, mani yoola ohumukona, ahoyere ohutuunga eehwe yae yoosi, mani amale amudeehye.

¹⁷Nae laatang'ene muhaana oyo naakayira omusaacha oyo ohumudeehya, kata katyo, omusaacha oyo aba ahoyere ohutuunga laatang'ene muhaana oyo eehwe yaakana neende yibahwechaanga omuhaana osisiirimo omubiri.

¹⁸ “Yiteenge omulakusi muhasi yeesi.

¹⁹ “Yiteenge buli musaacha okona esisolo syoosi-syoosi.

²⁰ “Heengereenge omusaango kw'ohufwa, omuundu yeesi oyaanaayo esiyaanwa syoosi eyiri nasaae wuundi otaali ese, Omwaami.

²¹ “Mutasaandyanga oba ohufwiinyiriraanga walukeenda yeesi; yichulise muti mwesi mwali bawalukeenda mu Misiri.

²²Mutaboneresaanga omuhasi mufwiirwe yeesi kata sa omwaana mulehwa.

²³Nimuhola mutyo, Ese Omwaami, mba njia ohubakobolamo nibaandirira bati mbahoonye,

²⁴mba njia ohunyoolera mani ngere mufwiirwe mu biita. Mani abahasi beeng'we baba bachia ohweehola abafwiirwe, haandi abaana beeng'we bosi babe ababula balaata.

²⁵ “Nimuba nimweeyosa eseende oyo yeesi hu baandu baange oba naali omumanani, muteeholaanga koti abeeyosi b'eseende baandi, mudahe mbwe ohwoola lwaabameederaho neende amagoba.

²⁶ Nimuba nimudiira engubo y'omuundu yeesi ohuba esirikera hu muundu oyo yatuunga, muhoyere ohumukoboseraanga buli ludaalo elyuuba nilitaakwa,

²⁷olwohuba eyo awuundi niyo esy'ohwefwaala syaaba naali nasyo syoong'ene ohumubasa omubiri esiro. Nae aba achia ohwebwiiha siina syeene niyeeyalisa? Niwiichuhana yaandirira ati muhoonye, mba njia ohumukobolamo olwohuba ese ndi ow'esisa.

²⁸ “Mutalomalomaanga bubi hu Nasaae, haandi mutabwaabaanga omwiimirisi w'abaandu beeng'we.

²⁹“Mumbereseenge ebiyaanwa bitula mu madiimwa keeng'we, mu fiini yeeng'we, haandi mu mafuta k'enaasi keeng'we abweene mu biha bidahihana. “Mumbereseenge abaana beeng'we baamberi basyaani.

³⁰Mumbereseenge ebyaamberi by'eng'oombe cheeng'we, neende eby'amakoondi keeng'we. Leheenge ebyaamberi by'esisaacha bidoong'a hubi ng'ina byaabyo endaalo chitaanu-na-chibiri choong'ene, mani hu ludaalo lwa chitaanu-na-chidatu, mumala musiimberesa.

³¹ “Eng'we muli abaandu baange beene, mani simuhoyeere ohulichaanga enyama cha buli sisolo siba nisiitirwe neende ebisolo byomu siino; ataali, mubisukunireenge embwa.