Read saamia Ohutula 27 Bible Online

Ohutula 27 - saamia bible

Ohutula 27

¹“Hole alutaari ohutula mu mbaao ch'omugaasia. Yihoyere ohuba eyaakanirira enyaande choosi, emiita chibiri neende otutoonyese tubiri (2.2) obuleeyi, haandi emiita chibiri neende otutoonyese tubiri (2.2) obubaambali, haandi yihoyeere ohuba emiita ndala neende otutoonyese tudatu (1.3) aakulu.

²Holereho ebisoba aakulu hu buli soonda chine. Bihoyere ohweyambaania hu alutaari ohuba esiindu silala, mani byoosi bifuunihweho omugasa.

³Hole ebifulya by'ohutaamo ekohe liriho amasinya, haandi muhole ebitiiyo, amabbakuli, amalobo, alala neende ebihalaangiro. Ebyehoonyerwa bino byoosi bihoyere ohuholwa mu mugasa.

⁴Hole oluwaaya lw'ebituli olw'omugasa, mute hu buli soonda chine amahono keehuyuungirisa kane ak'omugasa.

⁵Te oluwaaya lw'ebituli olwo aasi w'olunika-nika lw'alutaari, lube akatikaati w'alutaari.

⁶Hole emisiruunga ky'ohukiingira eky'embaao ch'omugaasia, mani mukibwiiheho omugasa,

⁷mukite mu mihono kyehuyuungirisa ekiri hu buli lwaande lw'alutaari ni mukiinga.

⁸Hole alutaari ohutula mu mbaao, mani mulehemo eliina, ohweema hu ndekeha yi hweekeseere hu lugulu luno.

⁹“Holere olukaka hu Yeema ly'Ohubaao hwaange epasya ohutula mu laasi nderere. Hu lwaande lw'emwaalo, epasya echio chihoyere ohuba ech'emita amahumi kane-na-chine obuleeyi,

¹⁰nichi siirirwe neende emisiiro amahumi kabiri eky'omugasa, ekihasiibwe mu byeemero amahumi kabiri eby'omugasa, alala neende amalobo neende emitaliimbo ch'efeesa.

¹¹Esiholwa nasilala esyo sihoyeere ohuholwa hu lwaande lw'emukulu lwosi olw'olukaka.

¹²Hu lwaande lw'emuumbo yihoyeere ohubaayo epasya ech'emita amahumi kabiri neende chibiri obuleeyi, neende emisiiro ehumi haandi neende ebyeemwaho ehumi.

¹³Hu lwaande lw'ebukwe, eyiri omulyaangiro, olukaka luhoyeere ohuba emiita amahumi kabiri neende chibiri obubaambali.

¹⁴Epasya ch'olwaande lw'enamulyaango chihoyere ohuba ech'emita chisaasaba neende otutoonyese tusaasaba (6.6), neende emisiiro kidatu, neende ebyeemwaho bidatu.

¹⁵Nae hu lwaande luundi epasya chihoyere ohuba ech'emita ehumi neende chitaanu neende emisiiro kidatu, neende ebyeemwaho byosi bidatu.

¹⁶Hu mulyaangiro kweene huhoyere ohubaaho epasya y'emita chitaanu-na-chine obuleeyi, olwaholwa mu laasi nderere niyanabwa neende obwooya bwa bbulu, papo, haandi neende ranjaai, haandi niyanyiswa neende ehaandago. Luhoyeere ohusiirwa neende emisiiro kine ekihaaswe mu byeemwaho byosi bine.

¹⁷Emisiiro kyoosi ekyabodoohana olukaka olwo kihoyere ohuwambaanisibwa neende emitaliimbo, haandi amalobo kakyo kahoyeere ohuba akaholwa mu feesa, nae ebyeemwaho byaaba ebyaholwa mu mugasa.

¹⁸Olukaka luno luhoyeere ohuba olw'emiita amahumi kane neende chine obuleeyi, emiita amahumi kabiri neende chibiri obubaambali, neende emiita chibiri neende otutoonyese tubiri (2.2) aakulu. Epasya chihoyere ohuholwa mu laasi nderere, haandi ebyeemwaho byaaba eby'omugasa.

¹⁹Ebyehoonyerwa byoosi ebichia ohwehoonyerwa mu Yeema, neende ebihoongo eby'Eyeema byoosi neende eby'olukaka lweene bihoyere ohuba nibyaholwa mu mugasa.

²⁰“Ewe lagira sa abaandu ba Yisiraeli bahuleetere amafuta k'emiseituuni akahiramo obulai ak'etaara, hu lihoyere ohuwambisibwaanga buli ngoloobe.

²¹Arooni neende abaana bae basyaani nibo abahoyere ohutekehaanga etaara elyomu Yeema ly'Ohubaao hwaange erwaanyi w'epasia yiri mu moni w'Esanduuku ly'Endagaano elyo. Abweene ao yiimba ni ndi, lihoyere ohwaaduha ohutula engoloobe, ohwoola echuli. Elako lino lihoyere ohwiswaangamo oluyaali endaalo choosi pe, neende Abaisiraeli alala neende abeechuhulu baabwe.”