Read saamia Ohutula 28 Bible Online

Ohutula 28 - saamia bible

Ohutula 28

¹“Laanga Arooni mwaanamao, alala neende abaana bae basyaani, Nadabbu, Abbihu, Eliasaari, neende Yitamaari. Bakabule obatuse eyiri abaandu baandi ba Yisiraeli, hu banyale ohuhalaabanira koti abalaamisi.

²Chia oholere Arooni mwaanamao ebyefwaalo by'obulaamisi, ebichia ohumuba oluyaali neende ohwiitiha.

³Mulaangire abahalaabani boosi abali neende obumanyirifu bu ndababeresa beeche yaali, mani obaboole ohulera Arooni engubo, hu anyale ohweyaanayo yiindi abe omulaamisi mu buhalaabani bwaange.

⁴Baboolere bahole esituundu sibwiiha hu sirifu, engubo y'ohweboya mu sibuno, ey'ohwefwaalamo niyereera, esaati liriho ekemo esone, eyohuboya hu mutwe, neende olusibiro lwoomusibuno. Bahoyere baholere Arooni mwaanamao, neende abaana bae basyaani, ebyefwaalo by'obulaamisi bino, hu banyale ohuuhalaabanira koti abalaamisi.

⁵“Abahalaabani bamanyirifu muno bano bahoyere ohwehoonyera obwooya bwa bbulu, papo, neende ranjaai, haandi neende obuwuusi bufwaana neende esaabbu, neende elaasi enyirifu muno.

⁶“Bahoyere ohuhola engubo yoohusirifu ey'obwooya bwa bbulu, papo, neende ranjaai, obuwuusi bufwaane neende esaabbu, neende elaasi nyirifu muno, nibayiluhiireho ebinyirisa.

⁷Ebisaga mu mabeka bibiri, bihoyere ohusonerwaho, hu nyaande, ebinyala ohwechwiisa oba ohwedeembula.

⁸Olusibiro luluhirwe neende esiroonyo ohutula mu ngubo yeene eyo, luhoyeere ohwaambaanisibwa hu ngubo yeene eyo hu byaahola omubiri mulala okwo.

⁹Bukula amakina ka karinelia mani omale okasaateho ameeta k'abaana ehumi neende babiri ba Yakobbo,

¹⁰noloondakirira ohwiibulwa hwaabwe, basaasaba hu kina lala, haandi basaasaba hu kina liindi.

¹¹Chia onyoole omuhalaabani mumanyirifu oholaanga ebyuuma, ebitaadi neende emigasa, niye oba ohusaatire hu makina kabiri ako, ameeta k'abaana basyaani ba Yakobbo, mani abuunjihe amakina akomu fureemu ch'esaabbu.

¹²Kabukule mani okate huhoba ch'amabeka echitula hu ngubo yoohusirifu ohuhiihirira enono ehumi neende chibiri echa Yisiraeli. Mani mu ngira yino nimwo mu Arooni achia ohunyalira ohukiingaanga ameeta kaabwe hu mabeka kae, hu ese Omwaami, nyale ebiha byoosi ohwiichulisaanga abaandu baange abo.

¹³Hola efureemu chibiri ech'esaabbu

¹⁴neende eminyoro kibiri eky'esaabbu, ekyeeluha nikiingiranamo koti emikoye, mani omale ochiyambaanienge hu fureemu echio.

¹⁵“Hola esituundu sy'engubo sy'ohufwaala hu sirifu hwoong'ene, esy'Omulaamisi Muhuluundu yehoonyereenge mu huheengao esibaaso sya Nasaae. Sino sihoya syaaba esy'engubo nasilala koti esy'engubo yoohusirifu, haandi neende obukohobe bufwaanana.

¹⁶Sihoyeere ohuba esyaakaniirira enyaande choosi, haandi esifuumbemo amahabi kabiri, esetimiita amahumi kabiri neende chibiri obuleeyi, neende esetimiita amahumi kabiri neende chibiri obubaambali.

¹⁷Nabiraho enyiriri chine ech'amakina k'engaanga; mu lunyiriri lutaangira, nabiraho akalaangwa mbwe kabbako, topaasi, neende garineeti;

¹⁸mu lunyiriri lwohubiri taaho, emeraadi, safire, neende daimoondi;

¹⁹mu lunyiriri lwohudatu taaho, yasiti, agate, neende ametisito;

²⁰nae mu lunyiriri lwohune taaho, bberili, karinelia neende yasipa. Kano makina koosi kahoyeere ohuba nikamala ohuteebwa mu fureemu ch'esaabbu.

²¹Buli lala hu makina ehumi-na-kabiri kano, lihoyere ohuba nilyasaatwaho eliita lala ely'omwaana wa Yakobbo, ohuhiihirira enono chia Yisiraeli.

²²Engubo yohusirifu nayo, holeraho eminyororo eky'esaabbu haya, ekiluhirwe koti emikoye.

²³Hola engata chibiri ech'esaabbu mani omale ochite hu soonda ch'akulu ech'engubo yoohusirifu,

²⁴mani okohobye emikoye ky'esaabbu kibiri ekyo hu ngata ch'esaabbu echio.

²⁵Boya enyaande choombi echa buli mukoye hu fureemu chibiri echio, n'oholere otyo, ochiyambaanie mu moni w'ehoba chiboya hu mabeka ech'engubo yoohusirifu.

²⁶Haandi ohole engata chibiri ech'esaabbu ochidiirise hu soonda ch'aasi ech'engubo yoohusirifu, mukati hu ndulo aambi neende engubo yoomusibuno.

²⁷Haandi ohole engata ch'esaabbu chiindi chibiri, ochidiirisire hu situundu sy'asi sya mu moni w'ehoba choohumabeka chibiri echo ech'engubo yoohusirifu, aambi neende mu burunyiro, nae haandi aakulu w'olusibiro luluhirwe neende esiroonyo.

²⁸Bulaanu boya engata ch'engubo yoohusirifu, hu ngata ch'engubo yoomusibuno neende omukoye kwa bbulu, hu bulaanu engubo yoohusirifu yino yinyale ohwaakama aakulu w'olusibiro olwo, lwaadeembuhana.

²⁹“Arooni naaba mbwe huyeengira Abuundu Woolerefu, achia mani yeefwaala engubo yohusirifu yino, eyanabwaho ameeta k'enono chia Yisiraeli, hu bulaanu ese Omwaami, nyale buli siha ohwiichulisaanga abaandu baange.

³⁰Ta Wurimu neende Tumimu mu ngubo yoohusirifu, hu bulaanu Arooni anyaleenge ohubikiinga naachia abuundu alimo ohubaao hwaange hwoolerefu. Ebiha koti ebyo, nimwo mwahoyere ohwefwaalaanga engubo yoohusirifu yino, hwaanyaleenge ohufuumbula ebibaaso byaange bi ndahisa abaandu ba Yisiraeli.

³¹“Engubo yelehuula, yibakerehaho eyomusibuno, yihoyeere ohuholwa mu bwooya bwa bbulu bwoong'ene.

³²Yihoyere ohubaaho obwiikule bw'omutwe ohubitamo, nihaandi obwiikule buno buhoyere ohwoomiisibwa neende obukohobe butuunge, ohubukaira ohutaanduha bwaangu.

³³Ohwebodoohania ekemo ly'asi, nabiraho ebifwaanani bifwaana bbulu, papo, neende obwooya bwa ranjaai.

³⁴Sasaanianga neende ekeengele ch'esaabbu, ohwebodoohania ekemo ly'aasi.

³⁵Arooni yefwaleenge engubo yino naali ohuhalaabana koti omulaamisi. Naaba niyeecha yiindi Abuundu Woolerefu, oba naaba naatulao, ohuubba hw'ekeengele huba huchia ohuwuliirihanaanga, mani haba saaba n'achia ohwiitwa daawe.

³⁶“Hola esibbaati sy'esaabbu ehaya mani osaateho oti, ‘Ndabereswa Omwaami’.

³⁷Siboyeenge mu moni w'engubo yoohumutwe neende omukoye kwa bbulu.

³⁸Arooni ayifwaleenge hu bweeni, hu bulaanu ese Omwaami nyemeo nyale ohufukiiriraanga ebiyaanwa byeeng'we byoosi bi Abaisiraeli baanyaanira, kata neende abaandu nibadoondobana mu huyaana ebiyaanwa.

³⁹“Luha esaati ly'Arooni ely'elaasi nderere, mani ohole engubo yoohumutwe yosi ey'elaasi nderere, neende olusibiro olunabirweho obujweenge.

⁴⁰“Hola amasaati, esibiro, neende ekofia eby'Abaana basyaani ba Arooni ohubaberesa oluyaali neende obunyirifu.

⁴¹Bukula engubo chino mani ochite hu Arooni mwaanamao, alala neende abaana bae. Mani obaawule, obadiise Omwaami niwehoonyera ohubachuhaangaho amafuta k'enaasi, hu banyale ohuuhalaabanira koti abalaamisi.

⁴²Baholere esinyaasa sy'elaasi, echitulira mu sibuno, ohwoola hu mataango, hu bahaye ohwefuunula.

⁴³Arooni neende abaana bae bahoyere ohuchefwaalaanga buli lu baba nibachia ohwiingira mu Yeema ly'Ohubaao hwaange, oba nibasuda sa aambi neende alutaari ohuhalaabana koti abalaamisi Abuundu Woolerefu, hu bahaye ohwiitwa hu lw'ohwefuunula. Lino lako ly'olubeerera eyiri Arooni neende abeechuhulu bae.”