Read saamia Ohutula 29 Bible Online

Ohutula 29 - saamia bible

Ohutula 29

¹“Bino nibyo bi ochia ohuhola hu Arooni neende abaana bae ohubayaanayo ohuba abalaamisi mu buhalaabani bwaange. Bukula esurusi njere, alala neende amakoondi mamiiku kabiri, akataaliho obulema bwoosi.

²Wehoonyere obusye bw'engaano buhiramo obulai, obutaalimo amamera, mani obuholemo emigaati niwehoonyera amafuta k'enaasi, neende ekiindi kibe sa emihaya nikibulamo amafuta ako, nae ekiindi kifwaanane neende bbisikuuti bibahirweho sa amafuta.

³Kite mu simweero mani omale okimberese nooba n'oyaana esurusi neende amakoondi mamiiku kabiri kala.

⁴“Leeta Arooni neende abaana bae hu mulyaango kw'Eyeema ly'Ohubaao hwaange, mani obaboolere bahole omusiro kw'ohweeyoka.

⁵Bulaanu bukula Arooni mani omale omufwaase ebyefwaalo by'obulaamisi, esaati, eganjuula libakerehaho olusibiro lwoomusibuno, olusibiro lwoomusibuno, esituundu sy'engubo esy'ohusirifu, neende omusiipi.

⁶Mala otyo mani omuteeho engubo yoohumutwe mani oboyeho esilolero syoolerefu esy'ohweyaanwayo, esyasaatwaho emboosi chino mbwe, ‘Ndayaanwayo eyiri Omwaami.’

⁷Mala mani obukule amafuta kaawulaanga, mani okachuhe hu mutwe kwae, mani omwaawule.

⁸“Leeta abaana bae bosi mani obafwaale amasaati;

⁹babaheho ekohe weebodoohanie ebibuno byaabwe haandi omale obaboye enjuunga hu mitwe kyaabwe. Eyo niyo engeri yoochia ohwaawuliramo Arooni neende abaana bae. Abo alala neende abeechuhulu bwaabwe nibo abahoyere ohuhalaabaniraanga koti abalaamisi baange endaalo choosi.

¹⁰“Bulaanu leeta eng'oombe surusi mu moni w'Eyeema ly'Ohubaao hwaange, oboolere Arooni neende abaana bae ohuta emitwe chaabwe hu mutwe kwayo.

¹¹Yitira esurusi eyo abweene ao mu hubaao hwaange hwoolerefu mu siruwa sy'Eyeema elyo.

¹²Bukula amabaanga kaandi ak'esurusi eyo, mani niwehoonyera olwaala lwao, okabahe hu bituundu byasoba eby'alutaari. Noomala otyo, bulaanu chia ochuhe amabaanga kadoong'ere mu bwiihalo bwa alutaari eyo.

¹³Ohuloondia, chia obukule amasinya koosi akabwiihaanga ku bituundu byoosi eby'omuukati, ebituundu bihiramo obulai eby'esini, neende efuko chibiri neende amasinya kachiriho koosi, mani obisaambire byoosi hu alutaari, bibe esiyaanwa siwumbereese ese.

¹⁴Nae chia osaambire enyama yoosi ey'esurusi eyo, eseero lyayo obuse bwayo, alala neende amala koosi erwaanyi w'ekaambi eyo. Sino sichia ohuba esiyaanwa sy'ebyonoono by'obulaamisi.

¹⁵“Haandi bukula ekoondi miiku lala, mani oboolere Arooni neende abaana bae babukule amahono kaabwe bakate hu mutwe kwalyo.

¹⁶Liite, obukule amabaanga kalyo okanyulaanyuse hu nyaande chine choosi ech'alutaari.

¹⁷Mala otyo odonya-donye emiiku elyo mu bituundu; yosa ebituundu biri mukati byoosi bulai, neende eby'ebinama by'enyuma byoombi, mani omale obite byoombi hu mutwe kwalyo, alala neende ebituundu biindi bira byoosi.

¹⁸Saamba emiiku elyo lyoosi hu alutaari koti esiyaanwa sy'ebyaahulya. Esaami y'esiyaanwa sino yindyooyeranga muno.

¹⁹“Bukula haandi ekoondi miiku liindi, ekoondi lyehoonyerwa ohuwaanayo, mani oboolere Arooni neende abaana bae bate amahono kaabwe hu mutwe kwalyo.

²⁰Liite, mani omale obukuleho amabaanga kaandi okabahe hu mbuliiriro ch'amatwi k'Arooni neende abaana bae, neende hu njala saacha ech'amahono kaabwe maluungi haandi neende hu njala saacha ch'amakulu maluungi. Mala otyo mani owaanye amabaanga kadoong'ereho hu nyaande chine choosi ech'alutaari.

²¹Haandi bukulaho hu mabaanga akali hu alutaari, neende amafuta kaawula, mani omale okanyulaanyuse hu Arooni neende hu ngubo chae, haandi neende hu basyaani bae alala neende engubo chaabwe. Ye, abaana bae, alala neende engubo chaabwe, byoosi biba bicha ohuba nibiyaanirweyo eyiri ese omweene.

²²“Chia oheenge omaleho amasinya koosi ak'ekoondi miiku elyo, amasinya k'eseembe, amasinya kabwiiha hu bituundu biri mukati, ebituundu bihiramo obulai eby'esini, efuko chibiri alala neende amasinya kachiriho, alala neende ly'esinama sisaacha.

²³Nae ohutula mu simweero sikiingire emigaati kitaabbaahirwe ki baanyaaniire, chia obukuleho omugaati mulala kwa buli enono: omugaati mulala okwadeeherwa amafuta k'enaasi, nae okuundi mulala okutadeeherwa amafuta ako, haandi neende bbisikuuti silala.

²⁴Ta ebyohulya bino byoosi mu mahono k'Arooni neende abaana bae, mani obaboolere babiyaane yiindi koti esiyaanwa syaabwe sy'enjaulo.

²⁵Haandi mala otyo mani obatuseho ebyohulya ebyo, mani omale obisaambire hu alutaari, n'obikereehe hu biyaanwa bisaambwa sa, hu bibe koti esiyaanwa sy'ebyahulia yiindi. Esaami y'esiyaanwa sino yindyooyeranga muno.

²⁶“Haandi bukula esigwoogwo sy'ekoondi miiku lino, mani omale osiyaane yiindi koti esiyaanwa sy'enjaulo. Esituundu sy'ekoondi lino sino, sichia ohuba omukabo kwao.

²⁷“Omulaamisi yeesi naaba niyaaulwa, esigwoogwo neende esinama sy'edaho sy'emiiku lino, ebyehoonyerwa hu hwaaula, bihoyere ohuyaanwaanga yiindi, koti esiyaanwa sikabuhaaneho, mani byateebwa endulo hulw'Abalaamisi boong'ene.

²⁸Huno huheengao hwaange hutakaluuhana daawe, mbwe abaandu baange nibaba nibayaana esiyaanwa syaabwe esy'obusaangirani, esigwoogwo neende esinama by'esisolo esyo, biba eby'abalaamisi. Sino siba siri esiyaanwa sy'abaandu beene eyiri eese, Omwaami.

²⁹“Ebyefwaalo by'obulaamisi by'Arooni, bihoyere ohudiiswa abaana bae n'afwiire, babyefwaleenge nibamalire ohwawulwa.

³⁰Omwaana w'Arooni oba niye omukaluuhe mu makulu koti omulaamisi, haandi oyo oba niyeengiraanga mu Yeema ly'Ohubaao hwaange, ohuhalaabana Abuundu Woolerefu, ahoyere ohufwalaanga ebyefwaalo bino endaalo chitaanu-na-chibiri.

³¹“Chia obukule enyama y'ekoondi miiku lira elyehoonyeerwe ohwaawula Arooni neende abaana bae, mani muyideheere Abuundu Woolerefu.

³²Mu siruwa sy'Eyeema ly'Ohubaao hwaange niwo yi bahoyere ohuliira enyama eyo alala neende emigaati kiba nikidoong'ere mu simweero.

³³Bahoyere ohulya esyo esiba nisyehoonyerwa mu muduunga kw'ohuleherwa nibali nibabaawula. Abalaamisi boong'ene nibo abahoyere ohulya ebyohulya bino, olwohuba byoolerefu nibyo.

³⁴Nae, nabaao enyama oba emigaati, ebinyala ohudoong'a nibitaliirwe byaakona bwaahya, biba bihoyere ohusaambwa byaalala; sibihoyere ohuliibwa daawe, olwohuba byoolerefu nibyo.

³⁵“Hola omuduunga kw'ohwaula Arooni, neende abaana bae kumale endaalo chitaanu-na-chibiri cheene, koti lu hulagiire.

³⁶Mani buli ludaalo ohoyere ohuyanaanga esurusi ndala koti esiyaanwa, hu syonoono sinyale ohuleherwa. Sino siba sichia ohuba esilabya alutaari. Noomala noosichuhaho amafuta k'enaasi, ohusihola sibe esyoolerefu.

³⁷Hola otyo buli ludaalo hu ndaalo chitaanu-na-chibiri enaamba. Ao niwo yi alutaari yiba yicha ohuba enjoolerefu yeene, mani buli muundu yeesi, oba esiindu syoosi esiba sichia ohuyegeeng'aho, siba sichia ohunyaalwa neende obunyala bw'obwoolerefu bwaayo.

³⁸“Buli ludaalo, endaalo choosi echiicha, yanaangayo hu alutaari amakoondi madoto kabiri akamalire omwaaka mulala.

³⁹Yaanaangayo ekoondi doto lala echuli, nae eliindi engoloobe.

⁴⁰Ohuchiira alala neende ekoondi elyo, yaanangayo ekiloguraamu ndala ey'obusye bw'engaano bunyuhe muno obukaandirwe neende elita ndala ey'amafuta k'enaasi haya. Haandi chuhaangao elita ndala ey'efiini koti esiyaanwa.

⁴¹Yaanangayo ekoondi lyohubiri lira engoloobe, haandi ohuchiira alala nalyo, yaanangayo obusye bwaaka butyo, amafuta, alala neende efiini, ebibeere eby'echuli. Sino nisyo esiyaanwa sy'ebyaahulya yi ndi ese Omwaami, haandi esaami yasyo yindyooyeranga muno.

⁴²Mani hulw'endaalo echiicha choosi, esiyaanwa sisaambe sino, sihoyeere ohuyaanwaanga mu hubaao hwaange, mu siruwa sy'Eyeema ly'Ohubaao hwaange. Ao niwo yiinja ohwakaananaanga neende abaandu baange mani nyala ohulomaloma naang'we.

⁴³Ao niwo yiinja ohubukaananiraanga neende abaandu ba Yisiraeli, mani obulafu bumesuhana bw'ohubaao hwaange nibwo obuchia ohuhola ohulaanga abuundu ao ohuba aoolerefu.

⁴⁴Njia ohuhola Eyeema alala neende alutaari bibe ebyoolerefu, haandi njia ohuta endulo Arooni neende abaana bae baaholereenge koti abalaamisi.

⁴⁵Mani njia ohumenyaanga mu Abaisiraeli, ni ndi Nasaae waabwe.

⁴⁶Bachia ohumanya bati ese niise Omwaami, Nasaae waabwe, owabatusa mu Misiri, hu nyale ohubamenyaangamo. Ese niise Omwaami waabwe, haandi Nasaae waabwe.”