Read saamia Ohutula 30 Bible Online

Ohutula 30 - saamia bible

Ohutula 30

¹“Hola alutaari ohutula mu mbaao ch'omugaasia, ohusambaanga obubbaani.

²Yihoyere ohuba eyaakanirira enyaande choosi, esetimiita amahumi kane neende chitaanu obuleeyi, neende esetimiita amahumi kane neende chitaanu obubaambali, haandi yihoyeere obuba seetimiita amahumi kataanu-na-kane aakulu. Ebyasobaho biri hu soonda chayo chine bihoyere ohuyeediiraho byaaba koti esiindu silala.

³Bwiiha aakulu wayo, enyaande chine choosi, ebyasobaho byoosi, neende esaabbu haya, haandi oteeho olukohobero lw'esaabbu luyebodohaanie.

⁴Hola engata ch'efeesa ech'ohuyikiingira, mani omale ochiteere aambi neende huundulo, hu nyaande chibiri ohudiira emisiruunga kichia ohuyikiingaanga.

⁵Hola emisiruunga kino eky'embaao ch'emigasia mani ochibwiiheho neende esaabbu.

⁶Bukula alutaari yino oyite erwaanyi w'epasya yideembere emberi w'Esanduuku ly'Endagaano. Ao niwo yi njia ohubukaananiraanga naawe.

⁷Buli chuli Arooni niyecha ohutekeha amataara ako ahoyere ohusaambiraangaho obubbaani bw'esing'aari silai.

⁸Ahoyere ohuholaanga atyo haandi buli lwa yaambia amataara engoloobe. Esiyaanwa sino esy'obubbaani sihoyeere ohwemeeda ohuchiiririraanga sityo sa ataali ohukairaho hwoosi, endaalo chiicha choosi.

⁹Otayaaniraanga hooho huno obubbaani bwoosi obutafukiirirwa daawe, oba esiyaanwa sy'esisolo syoosi-syoosi, oba esiyaanwa sy'emere syoosi-syoosi, haandi kata otachuhaangaho esiyaanwa syoosi esy'efiini syoosi-syoosi.

¹⁰Lulala hu mwaaka, Arooni ahoyere ohuholaanga omuduunga kw'ohulabya alutaari yino, neende ohutechaanga hu byasoba by'alutaari bine ebyo amabaanga ak'esisolo siba nisiyaanirweyo ohumalao esyonoono. Sino sinaholwaanga buli mwaaka endaalo choosi echiicha. Alutaari yino yihoyeere ohuba enjoolerefu endaalo choosi pe, eyaandeherwa ese Omwaami.”

¹¹Omwaami haandi yaboolera Musa ati,

¹²“Nooba noobala abaandu ba Yisiraeli, buli musaacha ahoyere ohuunduunga obukusi buchiana neende obulamu bwae buli, hu bulaanu amasira koosi kahae ohumukwaaho ohubalibwa ohwo nihuli ohuchiiririra.

¹³Buli muundu yeesi obalwa ahoyeere ohutuungaanga eseende chihoyera, nichikerwa ohweema hu sikero siholerwaho. Buli muundu ahoyeere ohundusiraanga sino koti esiyaanwa.

¹⁴Buli muundu yeesi oba n'abalwa mu hubalwa ohwo, ohuboola mbwe, buli musaacha ow'emyaaka amahumi kabiri, neende ohuhira ao, niye oba nahoyeere ohutuunga obuungi buno.

¹⁵Omusaacha muyiinda nae haba s'ahoyeere ohutuunga echihiraho ao, kata sa omusaacha mumanani ohutuunga echitayera, nibaba nibatuunga obuungi buno obw'obulamu bwaabwe.

¹⁶Solosa eseende chino ohutula hu baandu Abaisiraeli, mani ochiehoonyere ohuliinda Eyeema ly'Ohubaao hwaange. Omusolo kuno kuchia ohuba okwohwofwang'aniamo obulamu bwaabwe, mani mba njia ohwiichulisa ohubalwaaniliraanga.”

¹⁷Omwaami yaboolera Musa ati,

¹⁸ “Hola olukaraaya lw'omugasa neende obwiihaliro bw'omugasa. Chia olute akatikaati w'Eyeema neende alutaari, mani oluchuhemo amaachi.

¹⁹Arooni neende abaana bae bahoyere ohwehoonyeraanga amaachi ako ohweyosa amahono neende amakulu kaabwe

²⁰nibateengira mu Yeema oba nibataasuda hu alutaari ohuyaanayo esiyaanwa sy'ebyaahulya. Ao haba sibaba nibachia ohwiitwa.

²¹Bahoyere ohweyosaanga amahono neende amakulu kaabwe, hu bahaye ohufwa. Elako lino nilyo li beene abo neende abeechuhulu baabwe bachia ohuloondaanga endaalo chosi pe.”

²²Omwaami haandi yaboolera Musa ati,

²³“Bukula ebiluunga bihiramo obulai, ekiloguraamu chisaasaba echa ‘miira’ y'amaachi, ekiloguraamu chidatu echa ‘sinamooni’ yiwunya bulai muno, ekiloguraamu chidatu echia ‘emikachi’ chiwunya bulai muno,

²⁴neende ekiloguraamu chisaasaba echia ‘kasiya’ (byoosi nibikererwe ohweema hubikero byehoonyerwaanga). Meedaho elita chine ech'amafuta k'emiseituuni,

²⁵mani ohole ohulabya hw'ohuchuhaho amafuta, akasaasirwe koti ak'ohwebaha.

²⁶Wehoonyere akeene ako koti ak'ohuchuha noolabya Eyeema ly'Ohubaao hwaange, Esanduuku ly'Endagaano,

²⁷emeesa neende ebyehoonyerwaho byaayo, esiteeni sy'etaara neende ebichiiraho byoosi, alutaari y'ohuniooheseraho obubbaani,

²⁸alutaari y'ohusaamba ebiyaanwa, alala neende ebiindu bichiiraho byoosi, neende olukaraaya lw'ohwesaabiramo alala neende obwiihaliro bwaalwo.

²⁹Yaanayo ebiindu bino byoosi mu ngira yino, mani biba bicha ohuba ebyoolerefu byeene, mani buli oyo yeesi obyegeeng'aho oba esiindu syoosi-syoosi esibyegeeng'aho, aba achia oba siba bicha ohunyaaswa neende amaani k'obwoolerefu obubiriho obwo:

³⁰Haandi chia ochuhe amafuta hu Arooni, neende abaana bae, mani obaawule babe abalaamisi mu buhalaabani bwaange.

³¹Mani oboolere abaandu ba Yisiraeli oti, “Amafuta moolerefu kano akohwaawulaanga, kahoyeere ohwehoonyerwaanga mu buhalaabani bwaange endaalo choosi echiicha.

³²Haba sikahoyere ohuchuhwa hu muundu wa buli buhya daawe, haandi simwehoonyeraangaho esaasa nasilala eyo ohuhola amafuta kafwaanaho katyo. Ako moolerefu niko, mani eng'we muhoyere ohukayira koti amoolerefu.

³³Mani oyo yeesi ohola akafwaanana nako, oba ohwehoonyeraho hu keene kano hu muundu yeesi otaali omulaamisi haba saaba achia ohubukulwaho koti mulala hu baandu baange.”

³⁴Haandi Omwaami yaboolera Musa ati, “Bukula obuungi bwaakanirira obwa buli biluungo by'esing'aari bino, nataafi, sekeleeti, kelibbena, neende obubbaani bulafu.

³⁵Wehoonyere ebyeene bino ohuhola obubbaani, obusaasaaniiswe koti amafuta k'ohwebaha. Meedamo omuunyu ohubiliinda bibe abweene, haandi ebyoolerefu.

³⁶Swaakaho ebiindi byeenyuhuule koti obusye, mani obiyire obiingise mu Yeema ly'Ohubaao hwaange, mani obunyulaanyuse emberi w'Esanduuku ly'Endagaano. Yira obubbaani buno koti obuli obwoolerefu bw'elalira.

³⁷Mutehoonyeraangaho ehola yino yiti ohweholera abeene obubbaani bufwaanaho buti. Bubukule koti obwoolerefu buyaanirweyo yi ndi.

³⁸Omuundu yeesi niyoola yaaholaho obuundi bwafwaanaho koti buno ohwehoonyera koti ohweebaha sa, haba saaba n'achia obukulwaho koti mulala hu baandu baange daawe.”