Read saamia Ohutula 33 Bible Online

Ohutula 33 - saamia bible

Ohutula 33

¹Omwaami yaboolera Musa ati, “Bulaanu, tula abuundu ano, ewe alala neende abaandu ba watusa mu Misiri, muchie mu syaalo si ndasuubisa ohuberesa Abburahamu, Yisaka, neende Yakobbo, neende abeechuhulu baabwe.

²Njia ohutuma malaika yeeche yi muli abeemirire, haandi njia ohwiirusamo Abakanani, Abaamoori, Abahiiti, Abaperisi, Abahiifi, neende Abayebbusi.

³Mbao muli ohuchia mu loba lirimo ebiindu, eloba elai. Nae ese omweene haba siindachia naang'we, olwohuba eng'we muli abaandu b'esimyeeni, nyala ndoola ohubasihirisira hu ngira.”

⁴Abaandu nibawulira batyo, bachaaka ohulira mani baahaya ohwefwaalangaho ebbaangili choosi neende ebitaadi.

⁵Olwohuba Omwaami yali n'alagiire Musa ohubaboolera ati, “Eng'we muli abaandu b'esimyeeni. Niimba niinjia ohuchaanaho naang'we kata hulw'esiha esidiidi syeene, mba njia ohubasihirisira elalira. Nae bulaanu, mwefwaaluleho ebbaangili cheeng'we choosi, neende ebitaadi byeene, hu bulaanu mbone esiindu si mba niinjia ohubaboolera.”

⁶Nibaba nibamalire ohutula hu Lugulu lwa Sinai, abaandu ba Yisiraeli haba sibeefwaalaangaho ebbaangili choosi, kata neende ebitaadi byoosi daawe.

⁷Buli lu baandu ba Yisiraeli baholaanga ekaambi, Musa yoombahaanga Eyeema lyoolerefu elyo eyale hooho ohutula mu kaambi eyo. Eyeema elyo lyalaangwaangwa mbwe Eyeema ly'Ohubaao hw'Omwaami, mani oyo yeesi owalichiingi naadaha ohweteebaho hu Omwaami yatulaanga mu kaambi mani achia erwaanyi eyo yi liri.

⁸Buli lu Musa yalichiingi n'atulire ohuchia erwaanyi bweene eyo, abaandu beemereraanga sa mu milyaango ky'amayeema kaabwe ohwewuunja Musa ohumubona ohwoola lu yeengira mu Yeema omwo.

⁹Musa niyalichiingi n'amalire ohwiingiramo, esiiro y'esireesi yeechaanga niyiiha ohutula aakulu, mani niyeema hu mulyaango kw'Eyeema elyo, Omwaami achaaka ohulomaloma neende Musa naali mu sireesi esyo.

¹⁰Abaandu nibabonaangaho sa bati, esiiro y'esireesi niyiri mu mulyaango kw'Eyeema elyo, boosi baguunamaanga sa aasi.

¹¹Omwaami yechaanga alomaloma neende Musa, emoni-hu-moni, koti sa omuundu yeesi yahalomaloma neende omwiicha wae. Mani n'amala atyo, Musa yakobolaanga mu kaambi. Nae omusyaani muraaga walichiingi omuhoonyi wae, Yosua, omwaana wa Nuuni, yadoong'aanga sa mu Yeema omwo.

¹²Musa haandi yaboolera Omwaami ati, “Ni obwadyeeri bweene mbwe ewe wumboolere ohuchia ohwiimirira abaandu bano ohuchia mu syaalo esyo, nae haba siwumboolereho oyo yoocha ohutuma yeeche huchie nae. Ewe oboolere sa oti, mbwe waamanya bulai muno haandi wusaangaaliire muno.

¹³Nae bulaanu nikali mbwe oli otyo, kanya wumboolereho endekeha chao manye koti lu chiri, hu nyale ohuhuhalaabanira bulai, nindemeeda ohuhusaangaasa. Yichulisaho haandi oti, ewe omweene wamala ohweedoolera abaandu bano ohuba abao beene.”

¹⁴Omwaami yaboola ati, “Ese omweene mani njia ohuchiaana naang'we haandi njia ohubaberesa obuyiingiri.”

¹⁵Musa nae yakobolamo ati, “Nikali mbwe ewe haba soocha ohuchiaana naafwe, otatufukiiriraho ohutula abuundu ano.

¹⁶Ataali ao, wiina mweene oba n'achia ohufukiirira ati, oli omusaangaafu neende abaandu bao alala naange, n'otachiaana naafwe? Ohubaao hwao alala naafwe huchia ohutukabuhania neende abaandu baandi bohu syaalo huno.”

¹⁷Omwaami yaboolera Musa ati, “Njia ohuhola sa koti lwoosabire, olwohuba ese humanyire bulai bweene, haandi ndahusangaalira muno.”

¹⁸Bulaanu, Musa yasaba ati, “N'ofukiirira, leha mboneho obulafu bumesa-mesana obw'ohubaao hwao.”

¹⁹Omwaami nae yakobolamo ati, “Ese njia ohuhola obulai bwaange bubite mu moni wao, haandi mu hubaao hwao naangirire eliita lyaange lyoolerefu. Niise Omwaami, haandi ese njekesa olukoosi neende esisa abo ba ndedoolera omweene.

²⁰Ese haba siinja ohuhukanya obone obweeni bwaange, olwohuba abulao oyo yeesi onyala ohuumbona mani yadoong'a naali omulamu,

²¹nae ano mbano aliwo abuundu hu lubafu lwaange yi onyala weecha mani weema hu lwaanda.

²²Obulafu bumesa-mesana bw'ohubaao hwaange nibunaba nibuhubitaho, ese njia ohuhuta ali olwaafwa luli hu lwaanda, mani male hubwiiheho neende omuhono kwaange ohwoola lu ndaba niimalire ohuhubitaho.

²³Ao niwo yinjiira ohumalayo omuhono kwaange, mani onyale ohubona omukoongo kwaange kwoong'ene, ataali ohubona obweeni bwaange.”