Read saamia Ohutula 34 Bible Online

Ohutula 34 - saamia bible

Ohutula 34

¹Omwaami haandi yaboolera Musa ati, “Ewe baachia ebituundu bibiri eby'amakina ebifwaana koti ebyaamberi bira, mani njia ohubyaandiikaho emboosi echali hu bituundu byataangira bira, bi waata.

²Weetekehe bulai muno muchuli echuli, mani oniine ano hu Lugulu lwa Sinai obukaanane naange aakulu.

³Abulao oyo yeesi ohoyere ohuniina yeecha naawe; abulao oyo yeesi ohoyere ohubonehanaho abuundu woosi hu lugulu luno; haandi abulao kata ekoondi, oba eng'oombe eyihoyeere ohufukiirirwa ohwaayaho kata mu nandaalira y'olugulu luno.”

⁴Musa haandi yabaacha ebituundu biindi bibiri eby'amakina, mani echuli-chuli muno oludaalo lwaloondaho, yabibukula mani yaabikiinga yabiniinia aakulu hu Lugulu lwa Sinai, koti sa lu Omwaami yali n'alagiire.

⁵Omwaami yeeha aasi naali mu sireesi, yeema nae aambi ao, mani n'atuumbula eliita lyae lyoolerefu, Omwaami.

⁶Omwaami yabita mu moni wae, mani yaalaangirisa ati, “Ese Omwaami, ndi Nasaae, owechula esyoonda neende esisa, oyo otanyooleswa bwaangu, haandi oyo oweekesaanga obuheeri bubitiirifu neende obweesikwa.

⁷Nindaanga esisuubise syaange ohumala enjibulo elifu neende elifu haandi ndeheraanga ebibi neende ebyonoono; nae haba siinja huhaywa ohusaandya abaana neende abeechuhulu ohwoolera elalira hu lwiibulo lwohudatu neende olwoohune hulw'ebyonoono by'abeebusi baabwe.”

⁸Musa yaanguyirisa mani yaguunama yoola aasi mani yeenamira Nasaae.

⁹Yaboola ati, “Ewe Omwaami waange, nikali mbwe mubwadyeeri bweene wusaangaaliire, ndi ohuhweekweeda okanye ochie naafwe. Abaandu bano b'esimyeeni nibo, nae ewe tulehere ebibi byeefwe, neende ebyonoono byeefwe, mani otufukiirire sa otyo hube koti abaandu bao beene.”

¹⁰Omwaami haandi yaboolera Musa ati, “Ese bulaanu ndi ohuhola Endagaano Njaaha neende abaandu ba Yisiraeli. Mu moni waabwe, njia ohuhola ebiindu bihunuufu muno ebitaakaho neende syoosi esyaholehanaho abuundu woosi hu syaalo huno mu syaalo syoosi. Abaandu boosi bachia ohubonera elalira obuhunuufu bw'ebiindu bi Ese Omwaami, nyala ohuhola, olwohuba njia ohubaholera esiindu sihalaka omukoongo.

¹¹Funihireenge amalako koosi kaanja ohubaberesa enyaanga yino. Ese njia ohwiirusa muno Abaamoori, Abakanani, Abahiiti, Abaperisi, Abahiifi, neende Abayebbusi, nimuyiingira nimuchiaanakana.

¹²Mutaholaangaho endagaano yoosi neende abaandu b'esyaalo simuchia ohwiingiraangamo, olwohuba sino siinyala syaaba nisiri sa omuteego mubi yi muli.

¹³Ohutusaho, eng'we likuleenge sa alutaari chaabwe, nimusihirisira elalira esiiro ndafu chaabwe, haandi mumala mutema mukwiisa aasi obulolero bwa nasaae waabwe muhasi yi balaanga Asera.

¹⁴“Mutenamiraanga Nasaae wuundi yeesi, olwohuba ese, Omwaami, singanyaanga ohuba neende owunyiingania.

¹⁵Mutaholaangaho endagaano yoosi neende abaandu b'esyaalo esyo, olwohuba abo nibeenamira banasaae baabwe bobukafiiri haandi nibababa ebiyaanwa, bachia ohubalaangaanga bati mwesi muchie mu beyambaanieho, mani muchia ohuteemwa mulye ebyohulya bi baberesaanga banasaae baabwe.

¹⁶Abasyaani beeng'we banyala boola ohudeehya abahasi bateende abo, ababa bachia ohuba abataali neende obweesikwa yi ndi, nibachaaka ohwiinamiraanga banasaae baabwe abo.

¹⁷ “Mutaholaanga, haandi muteenamiranga banasaae b'ebichuma.

¹⁸ “Huseenge Esidyaalo sy'Emigaati Kitaabbaahirwe. Koti sa lu mbalagiire, licheenge emigaati kitaabbaahirwe ohumala endaalo chitaanu-na-chibiri mu mwoosi kwa Abbiibbu, olwohuba ni mu mwoosi kweene okwo, ku mwatuliramo Misiri.

¹⁹ “Buli mwaana musyaani waamberi neende buli sisolo situkwa sisaacha syaamberi, byaange nibyo,

²⁰ nae muhoyere ohukulaanga nimweekobosera buli suhiri yaamberi ni mukulaasania nayo ekoondi doto mu bweyaango bwayo. Ni mutayikula mwayekobosera, mani muyifunakeenge ekosi lyayo. Kuleenge nimweekobosera buli mwaana musyaani waamberi. “Abulao oyo yeesi ohoyere ohubonehanaanga yiindi naabula esiindu sy'ohuyaana.

²¹ “Eng'we muli neende endaalo chisaasaba chi muhoyere ohuholeraangamo emirimo kyeeng'we, mani mutaholaangaho omulimo kwoosi hu ludaalo lwa hataanu-na-habiri, kata mu biha by'ohulima, oba muukesa.

²² “Huseenge Esidyaalo sy'Ekesa buli lu muchaaka ohukesa ebyaamo byaamberi eby'engaano yeeng'we, haandi muhusaanga Esidyaalo sy'Ebikaali mu siminyu nimuli ohunoka ebyaamo byeeng'we.

²³“Amahabi kadatu buli mwaaka, abasaacha beeng'we boosi bahoyere ohwiichaanga ohunyinamira, ese Omwaami, Nasaae wa Yisiraeli.

²⁴Nindahabe niimalire ohwiirusa ohumala ebyaalo biindi ebichia ohubehingaanga mu moni weeng'we, mani nimalire ohubaambaliya obwaami bweeng'we, abulao oyo yeesi ochia ohuseetaanga ayiingira esyaalo syeeng'we nimuli ohuhusaanga ebidyaalo bino bibiri.

²⁵ “Mutayaanaanga emigaati kyaholwa neende amamera nimuba nimuyaana esisolo yiindi. Mutabihaangaho esituundu syayo sikona buhya echuli yiloondaho daawe, esiitwa hu Sidyaalo sya Paasaka.

²⁶ “Buli mwaaka leteenge mu nyuumba y'Omwaami, emere yi mutaangira ohukesa. “Mutadehaangaho ekoondi doto, oba ahameeme h'embusi ebisinuuna daawe.”

²⁷Omwaami haandi yaboolera Musa ati, “Ewe yandiika emboosi chino, olwohuba ni ohweema hu musiingi kw'emboosi chino, hu ndi ohuholera endagaano naawe haandi neende Yisiraeli.”

²⁸Musa yadoong'a naali neende Omwaami ebideete amahumi kane, haandi neende ebiro byosi amahumi kane amalaamba, n'atalyaaho oba ohung'waaho esiindu syoosi. Yandiika hu bituundu bibiri by'amakina ebyo, emboosi ch'Endagaano eyo, Amalako Ehumi ako.

²⁹ Mani Musa niyali hu yeeha aasi naatula hu Lugulu lwa Sinai n'akiingire Amalako Ehumi ako, obweeni bwae bwamesamesanaanga sa olwohuba yali n'alomalomeenge neende Omwaami mweene; nae omweene haba siyali nasimanyireho daawe.

³⁰Arooni alala neende abaandu baandi abo batingaala Musa mani baabona bati hane, obweeni bwae bwali nibumesamesanaanga, mani baatya muno ohumusudaho.

³¹Nae Musa yabalaangaanga sa, mani Arooni neende abeemeresi b'oluyia boosi baachia nae yi Musa yali, mani Musa yachaaka ohulomaloma nabo.

³²Ebyo nibyawa, abaandu ba Yisiraeli boosi banyala ohumusudaho mani baamweebodoohania, mani Musa yaabadiisa amalako koosi ka Omwaami yali n'amubereseere hu Lugulu lwa Sinai.

³³Mani Musa niyamala ohulomaloma yi bali, yaabwiiha obweeni bwae neende esitaambaya.

³⁴Mani buli lu Musa yachichaanga mu Yeema ly'Ohubaao hw'Omwaami, ohulomaloma neende Omwaami yebwiihulaangaho esitaambaya esyo. Nae niyatulaangamo, yabooleraanga abaandu ba Yisiraeli buli siindu si yalichiingi n'alagiirwe ohuboola,

³⁵mani banyalaanga ohubona bati obweeni bwae bwalichiingi nibumesamesana. Haandi bulaanu yechaanga yeebwiihaho esitaambaya ohwoola esiha siloondaho si yachiraangamo ohulomaloma neende Omwaami.