Read saamia Ohutula 35 Bible Online

Ohutula 35 - saamia bible

Ohutula 35

¹Bulaanu Musa yalaanga alala oluyia lw'abaandu ba Yisiraeli lwoosi, mani yaababoolera ati, “Sino nisyo si Omwaami abalagiire muholeenge:

²Eng'we mbano muli neende endaalo chisaasaba enaamba chi muhoyere ohuholeraangamo emirimo kyeeng'we, nae oludaalo lwa hataanu-na-habiri luhoyeere ohuba olwoolerefu, oludaalo lwatoongolwa ohuba olw'ohuwuluuha, lwaambereswa ese omweene, Omwaami. Omuundu yeesi ohola omulimo kwoosi hu ludaalo olwo, ahoyere ohwiitwa.

³Kata mutaadusaangaho omuliro kwoosi mu madaala keeng'we hu ludaalo lwa Sabbaato.”

⁴Musa haandi yaboolera abaandu ba Yisiraeli ati, “Sino nisyo si Omwaami alagiire:

⁵Tekeheenge esiyaanwa esy'Omwaami. Buli muundu yeesi odaha ohuhola atyo, ahoyere ohuleetaanga esiyaanwa sy'esaabbu, efeesa, oba omugasa;

⁶elaasi haya; obwooya bwa bbulu, papo, neende ranjaai; engubo chiholwa ohutula mu bwooya bw'embusi;

⁷eseero ly'ekoondi emiiku elyabahwaho eraangi ya ranjaai; eseero haya; embaao ch'emigasia;

⁸amafuta k'amataara; ebiluungo bitereesa amafuta kehoonyerwa mu hwaawula, neende hulw'obubbaani bw'esing'aari silai muno;

⁹karinelia neende ebbaangili neende ebitaadi ebihoyera ohwehoonyerwa nibasona engubo y'ohusibuno y'Omulaamisii Muhuluundu, neende ebyohusonera hu situundu sy'engubo yae esy'ohusirifu.

¹⁰“Abaandu boosi abali mweeng'we abali neende obumanyirifu bw'ohuhola ebiindu byoosi bahoyere ohwiicha mani baahola buli siindu syoosi si Omwaami alagiire:

¹¹Eyeema, esifuunihaho neende esibwiiha humukulu, amalobo neende efureemu, emisiruunga kihalakaniamo, emisiiro kyaalyo, alala neende obweemero bwoosi;

¹²Esanduuku ly'Endagaano, emisiiro kyalyo, esifuuniho syalyo, haandi neende epasya yirihiingakira;

¹³emeesa, emisiiro kyayo, alala neende ebiindu biindi bichiiraho; emigaati kiyaaniirwe Nasaae;

¹⁴esiteeni sy'etaara lihosa obulafu alala neende ebichiiraho; amataara alala neende amafuta kaako;

¹⁵alutaari y'ohuniooheseraangaho obubbaani alala neende emisiiro kyayo; amafuta kaawula; obubbaani bw'esing'aari silai; epasya y'ohumulyaango kw'Eyeema;

¹⁶alutaari y'ohusaambiraangaho ebiyaanwa bisaambwa sa, neende oluwaaya lusikirwaho lwa mugasa, emisiruunga chalwo, alala neende ebiindu biindi bichiiraho; olukaraai lw'ohwesaabiramo alala neende obweemero bwayo;

¹⁷epasya ch'olukaka, emisiruunga alala neende obweemero bwoosi; epasya y'omulyaango kw'olukaka;

¹⁸ebihoongo alala neende emikoye ky'Eyeema neende olukaka lweene;

¹⁹neende ebyefwaalo by'amang'eniesi bi balaamisi bahoyere ohwefwalaanga nibali ohuhalaabanira Abuundu Woolerefu, engubo ndafu chia Arooni omulaamisi neende abaana bae.”

²⁰Abaandu boosi aba Yisiraeli beemao basiingira bawaao,

²¹mani buli muundu yeesi owalichiingi niyekoomba ohuhola atyo yatulaniramo ohuchaaka ohuleetaanga esiyaanwa eyiri Omwaami ohuholeramo Eyeema ly'Ohubaao hw'Omwaami. Baleeta ebiindu byoosi ebyali nibidahibwa ohwehoonyera mu hwiinamira Omwaami, haandi neende mu huhola ebyefwaalo by'obulaamisi.

²²Abo boosi abali nibadaha ohuhola batyo, abasaacha alala neende abahasi sidubaanie, baletaanga ebipiini by'ohusyaayira, ebitaadi byoomumatwi, embeta, ebyuuma byoomumakosi, alala neende engeri choosi ech'ebbaangili ch'esaabbu, mani babiyaanayo eyiri Omwaami.

²³Buli muundu yeesi owalichiingi neende elaasi ehaya; obwooya bwa bbulu, papo, oba ranjaai; engubo ch'obwooya bw'embusi; eseero ly'ekoondi emiiku elyabahwaho eraangi ya ranjaai; oba eseero ehaya, yasileetaanga sa.

²⁴Abo boosi abali nibanyala ohutusa efeesa, oba omugasa, bosi baleeteraanga Omwaami ebiyaanwa byaabwe ebyo. Haandi kata abo boosi abalichiingi neende embaao ch'emigasia echalichiingi nikinyala ohwehoonyerwa mu mulimo kwoosi ba biletaanga sa.

²⁵Abahasi boosi abalichiingi abamanyirifu baletaanga obuwuusi bw'elaasi nyirifu, haandi neende obuwuusi bw'obwooya bwa bbulu, papo, neende ranjaai, bu balichiingi nibamala ohutereesa abeene.

²⁶Haandi baholaanga neende obuwuusi bw'obwooya bw'embusi bwosi nibaleeta.

²⁷Abeemirisi nabo baleetaanga karinelia neende ebbaangili chiindi, babisonere hu ngubo choohusibuno ch'abalaamisi, neende ebituundu bibwiiha hu birifu

²⁸neende ebiluungo, neende amafuta k'amataara, neende amafuta k'ohwaawula, haandi neende hulw'obubbaani bw'esing'aari silai.

²⁹Abaandu ba Yisiraeli boosi abali nibekoomba ohuleetaho esiindu, baletaanga ebiyaanwa byaabwe eyiri Omwaami bihole omulimo ku mweene yali n'alagiire Musa ohuhola.

³⁰Musa yaboolera Abaisiraeli ati, “Omwaami adoolere Bbesaleeli, omwaana wa Wuri, haandi omwiichuhulu wa Huuri, ohutula mu nono ya Yuda.

³¹Nasaae amalire ohumwiichusamo amaani kae, haandi amalire ohumuba obumanyirifu, obunyala, neende ohumanya ebyabuli mulimo kwoosi,

³²hu anyale ohutekeha emera y'amakesi, neende ohuyitechaanga mu esaabbu, efeesa, alala neende omugasa;

³³hu anyale ohuheengaanga ebbaangili neende ebitaadi neende ohubyehoonyera; ohubachaanga embaao; alala neende engeri choosi ch'emirimo kiboneha bulai.

³⁴Omwaami amubereese, haandi yaamala yaaberesa neende Oholiabbu omwaana w'Ahisamaki, ohutula mu nono ya Daani, obunyala bw'ohweekesa obumanyirifu bwaabwe eyiri abaandu baandi.

³⁵Yababeresa obumanyirifu mu mirimo kyoosi ekyeenya ohusaata, ohuubba hu lupapula, neende ohutuunga neende obuwuusi bw'elaasi nyirifu; obwooya bwa bbulu, papo, neende ranjaai; neende engubo chiindi. Banyala ohuhola emirimo kiindi kyoosi, haandi bachoori bamanyirifu muno.