Read saamia Ohutula 36 Bible Online

Ohutula 36 - saamia bible

Ohutula 36

¹“Bbesaleeli, Oholiabbu, alala neende abahalaabani baandi boosi, ba Omwaami yaberesa obumanyirifu neende ohumanya, abamanya ohuhola buli siindu syoosi esidahibwa hu hwoombaha Eyeema ly'Ohubaao hw'Omwaami, nibo abachia ohuhola buli siindu koti lu Omwaami yalagira.”

²Musa yalaanga Bbesaleeli, Oholiabbu, alala neende abasaacha baandi abali neende obumanyirifu ba Omwaami yali niyababeresa obunyala, haandi ababa nibadaha muno ohuhoonya, Musa yababoolera ohuchaaka ohuhola emirimo.

³Musa yababeresa ebiyaanwa byoosi bi baandu bayaanayo ohwoombaha Eyeema ly'Ohubaao hw'Omwaami. Nae abaandu ba Yisiraeli bemeeda sa ohuleeteraanga Musa ebiyaanwa byaabwe buli chuli.

⁴Abasaacha bali neende obumanyirifu, abali nibeechere ohuhola omulimo okwo, bachia

⁵baaboolera Musa bati, “Ngaandi abaandu bali ohuleeta ebiindu biingi ohubita ebidahibwa ohuhola omulimo ku Omwaami yalagira kuholwe.”

⁶Musa yatuma elako mu kaambi mwoosi eliboola liti, abaandu boosi balehere ao ohutusa ebiyaanwa by'Eyeema Lyoolerefu; mani abaandu beemao baaleheserwa ao ohuleeta ebiyaanwa.

⁷Olwohuba ebyo ebyali nibimalire ohuleetwa byali ni bihirira elalira ebyali nibidahibwa ohuhola neende ohumaliirisa omulimo okwo kwoosi.

⁸Abasaacha bali nibahiramo obumanyirifu mu baandu nibo abahola omulimo kw'ohwoombaha Eyeema ly'Ohubaao hw'Omwaami. Balihola ohutula mu bituundu ehumi eby'elaasi nyirifu muno, niyiluhiirweho obwooya bwa bbulu, papo, neende ranjaai, mani nibanabiraho ebifwaanani by'abakerubbi.

⁹Buli situundu syali esyaakanirira obuhoongo, emiita ehumi neende chibiri obuleeyi, neende emiita chibiri obubaambali.

¹⁰Baambaania alala ebituundu byaaka bityo bitaanu ebilaamba mani byaahola esikaanda silala, haandi nibeemao nibahola batyo bitaanu byali nibidoong'ereo.

¹¹Bahola amapaala k'engubo ya bbulu hu ndulo w'esituundu sy'erwaanyi hu buli mukaanda.

¹²Bata amapaala amahumi kataanu hu situundu sichaaka esy'omukaanda kwaamberi, haandi amapaala amahumi kataanu nibakaakanirisa hu situundu simaliiriha hu mukaanda kw'ohubiri.

¹³Haandi bahola amalobo k'esaabbu amahumi kataanu, ak'ohwehoonyera ohusagania alala emikaanda kibiri ekyo, hu kihole omukaanda muhoongo mulala.

¹⁴Bulaanu bahola esifuuniho syoohu Yeema ohutula mu bituundu ehumi neende silala eby'engubo yaholwa ohutula mu bwooya bw'embusi.

¹⁵Babihola byaaba ebyaakanirira obuhoongo, emiita ehumi neende chidatu obuleeyi, neende emiita chibiri obubaambali.

¹⁶Baambaania ebituudu bitaanu hweebyo alala, byaahola omukaanda mulala, nae ebiindi bisaasaba biindi bira byaahola omukaanda kuundi.

¹⁷Haandi bata amapaala amahumi kataanu hu ndulo w'esituundu simaliiriha hu lwaande lulala ol'womukaanda mulala, haandi amapaala amahumi kataanu hu ndulo w'omukaanda kuundi okwo.

¹⁸Haandi bahola amalobo k'efeesa amahumi kataanu ak'omugasa, hu ndulo w'omukaanda kuundi kula.

¹⁹Haandi haahola ebibwiihaho biindi bibiri, silala esy'eseero ly'ekoondi emiiku nibabahaho eraangi ya ranjaai, nae eliindi lyaaba ely'eseero nyirifu muno, ohuhola koti esibwiihaho esy'ohumukulu.

²⁰Baholera Eyeema, efureemu cheema tiiri ech'embaao ch'omugaasia.

²¹Buli efureemu yali emiita chine aakulu, nae esetimiita amahumi kasaasaba neende chisaasaba obubaambali,

²²echiriho ebiindu bibiri ebyasoba bichiana, hu fureemu chinyale ohweyambaania alala. Efureemu chino choosi chabaaho ebiindu byasoba bino.

²³Bahola efureemu amahumi kabiri ech'olwaande lw'emwaalo

²⁴haandi neende ebyeemwaho by'efeesa amahumi kane byeemeswaho, buli byeemwaho bibiri nibiba aasi w'efureemu ndala ohudiirira ebiindu bibiri byasoba bira.

²⁵Bahola efureemu amahumi kabiri ech'olwaande lw'emukulu lw'Eyeema

²⁶alala neende ebyeemwaho amahumi kane eby'efeesa, bibiri nibichia ohuba aasi wa buli fureemu.

²⁷Nae emukoongo w'Eyeema, olwaande lw'emuumbo, bahola efureemu chisaasaba

²⁸haandi neende efureemu chibiri ech'ohusoonda.

²⁹Efureemu chohusoonda chaambanisirwaanga aasi, mani chaambaana ohutulira elalira aasi ao, ohwoola aakulu bweene. Efureemu chibiri chino echihola esoonda chibiri cheholaanga choosi chityo.

³⁰Yaliwo alala efureemu chitaanu-na-chidatu neende ebyeemwaho ehumi neende bisaasaba eby'efeesa, bibiri ohuba aasi wa buli fureemu.

³¹Bahola emiguulo ehumi neende kitaanu eky'embaao ch'emigasia, kitaanu nikiri eky'efureemu hu lwaande lulala olw'Eyeema,

³²kitaanu kiindi eky'efureemu ch'olwaande luundi, haandi kitaanu eky'efureemu ch'olwaande lw'emuumbo, emukoongo.

³³Omuguulo kuhalakania akati, nibakuta akati w'efureemu noniina aakulu, kwatulira hu ndulo olwaande lulala, ohwoola hu ndulo hundi hw'Eyeema.

³⁴Babwiiha hu fureemu choosi neende esaabbu, haandi baachiyambaanianga alala neende engata ch'esaabbu ohudiirania emiguulo kihalakanamo, kyosi ekyali nikibwiihirweho neende esaabbu.

³⁵Bahola epasya y'elaasi nyirifu, eyanabwaho neende ohwooya bwa bbulu, papo, neende ranjaai, haandi nibanabaho ebifwaanani by'abakerubbi.

³⁶Bahola emisiiro kine eky'embaao ch'emigasia ohudiiraanga epasya, mani haandi beemao baakifuunihaho esaabbu, haandi bakiyambaania alala neende amalobo k'efeesa. Haandi bahola ebyeemwaho bine eby'efeesa, ohudiraanga emisiiro ekyo.

³⁷Nae hu mulyaango kwiingira mu Yeema, bahola epasya y'elaasi nyirifu, eyanabwa neende obwooya bwa bbulu, papo, neende ranjaai haandi niyoobbwaho neende ebiindu bisoonwa sa.

³⁸Baholera epasya yino emisiiro kitaanu ekiriho amalobo, haandi babwiiha humukulu neende emitaliimbo chayo neende esaabbu, haandi baahola ebyeemwaho by'omugasa bitaanu eby'emisiiro.