Read saamia Ohutula 38 Bible Online

Ohutula 38 - saamia bible

Ohutula 38

¹Hu lw'ohusambaanga ebiyaanwa, yahola alutaari ohutula mu mbaao ch'emigasia. Yali eyaakanirira enyaande choosi, emiita chibiri neende otutoonyese tubiri (2.2) obuleeyi, emiita chibiri neende otutoonyese tubiri (2.2) obubaambali, haandi yali emiita ndala neende otutoonyese tudatu (1.3) aakulu.

²Yaholeraho ebiindu byasoba aakulu w'esoonda chine, hu byoosi byaahola omubiri mulala neende alutaari. Yayibwiihaho neende omugasa.

³Haandi yaholeraho ebichiira hu alutaari eyo biti: ebifulya, ebitiiyo, ebbakuli, amalobo, neende ebifulya by'ohumuliro. Ebiindu biindi bichiiraho bino byoosi byali nibyaholwa mu mugasa.

⁴Yahola oluwaaya lusika olw'omugasa, mani naaluta mu lwaalo w'olunikaanika lw'alutaari, mani lwoola akatikaati, w'alutaari.

⁵Yahola engata chine ech'ohukiingira, mani naachita hu soonda chine.

⁶Yahola emisiruunga eky'embaao ch'emigasia, mani yaachibwiihaho neende omugasa,

⁷mani naakita mu ngata echiri hu buli lwaande lw'alutaari. Alutaari yino yali yaholwa mu mbaao, mani yali niyirimo eliina.

⁸Yahola olukaraaya lw'omugasa nae obweemero bwaayo bwosi obw'omugasa ohutula mu mbonero ch'abahasi abali nibahalaabaniraanga mu siruwa sy'Eyeema ly'Ohubaao hw'Omwaami.

⁹Haandi yahola olukaka lw'epasya ch'engubo y'elaasi nderere ohubodoohania Eyeema ly'Ohubaao hw'Omwaami. Hu lwaande lw'emwaalo, epasya chalichiingi emiita amahumi kane neende chine ohuleeyi,,

¹⁰nichasiirwa neende emisiiro ky'omugasa amahumi kabiri, mu bweemero bw'omugasa byosi amahumi kabiri, neende amalobo neende emitaliimbo, byoosi ebyaholwa mu efeesa.

¹¹Olukaka olwo lu fwaana sa lutyo, hu lwaande lw'emukulu lwosi.

¹²Nae hu lwaande lw'emuumbo, yaliyo epasya chiri emiita amahumi kabiri neende chibiri obuleeyi, neende emisiiro ehumi haandi neende ebyeemero ehumi, haandi neende amalobo neende emitaliimbo, byoosi ebyaholwa mu efeesa.

¹³Hu lwaande lw'ebukwe, yi siruwa syali, olukaka olwo lwali emiita amahumi kabiri neende chibiri obubaambali.

¹⁴Epasya ch'olwaande luundi lw'esiruwa lwali emiita chisaasaba neende obutoonyese chisaasaba (6.6) obuleeyi, neende emisiiro kidatu, neende ebyeemero bidatu.

¹⁵Haandi ey'olwaande luundi, yosi yali yityo.

¹⁶Epasya choosi, ohwebodoohania olukaka olwo, chali chaholwa mu ngubo y'elaasi nyirifu.

¹⁷Ebyeemero by'emisiiro byoosi byali byaholwa mu mugasa, nae amalobo, emitaliimbo, kata neende ebibwiiha aakulu w'emisiiro, byoosi byali byaholwa mu feesa. Emisiiro kyoosi ohwebodoohania olukaka, kyali kyaambanisibwa neende emitaliimbo ky'efeesa.

¹⁸Epasya y'esiruwa sy'olukaka yali yaholwa mu ngubo y'elaasi yatuungwa neende obwooya bwa bbulu, papo, neende ranjaai, haandi yasaatwaho neende oludaliso. Yali emiita chitaanu-na-chine obuleeyi, neende emiita chibiri aakulu, koti sa epasya ch'olukaka.

¹⁹Yali yasiirwa neende emisiiro kine ekiri mu byeemero by'omugasa bine. Amalobo kachio, ebibwiiha aakulu wachio, haandi neende emitaliimbo chachio, byoosi byali eby'efeesa.

²⁰Ebihoongo byoosi, by'Eyeema elyo, haandi kata neende eby'olukaka lweebodohaanie, byali byaholwa mu mugasa.

²¹Ano aliwo olunyiriri lw'obuungi bw'ebichuma ebyehoonyerwa mu Yeema ly'ohubaaho hw'Omwaami, yi ebituundu bibiri eby'amakina byandiikwaho Amalako Ehumi, kabiihwa. Olunyiriri luno lwalagirwa neende Musa, nae lwaaholwa neende Abaleefi abahola nibali aasi w'obunyala bwa Yitamaari, omwaana w'Arooni omulaamisi.

²²Bbesaleeli, omwaana wa Wuri, omwiichuhulu wa Huuri, ohutula hu nono ya Yuda, niye owahola buli siindu koti lu Omwaami yalagira.

²³Omuhoonyi wae, Oholiabbu omwaana w'Ahisamaki, ohutula hu nono ya Daani, yali omubaachi, omubaasi, haandi yaaba omuluhi w'engubo y'elaasi nyirifu, neende obwooya bwa bbulu, papo, neende ranjaai.

²⁴Esaabbu yoosi eyali niyayaanwa eyiri Omwaami, hu lw'Eyeema lyoolerefu, yakerwa obusito bw'ekiloguraamu elifu ndala (1,000), nibehoonyera esikero syafukiirirwa.

²⁵Efeesa yatula mu hubala abaandu b'enono yino yakerwa yaaba ekiloguraamu elifu chidatu neende emia chine, neende amahumi kadatu (3,430), niyakerwa neende esikero syafukiirirwa.

²⁶Mani obuungi buno bwaakanirira neende obuungi bwatuungwa neende abaandu bali nibeyandiikisa mu hubalwa, buli muundu nga atuunga obuungi budahibwa, nibukererwe neende esikero syafukiirirwa. Abasaacha bali elifu emia chisaasaba neende chidatu, emia chitaanu neende amahumi kataanu (603,550) abali nibali emyaaka amahumi kabiri eky'obuhuluundu, oba ohuhiraho ao, abali nibaandiikwa mu hubala ohwo.

²⁷Hu feesa yoosi, ekiloguraamu elifu chidatu neende emia chine (3,400) nichio echehoonyerwa ohuhola ebyeemwaho emia ndala (100) eby'Eyeema lyoolerefu, nae hulw'epasya, ekiloguraamu amahumi kadatu neende chine hu buli syeemwaho.

²⁸Nae ekiloguraamu amahumi kadatu echadoong'aho, Bbesaleeli yaholamo emitaliimbo, amalobo k'emisiiro, alala neende ebibibwiiha aakulu waachio.

²⁹Omugasa kwali nikwayaanwayo eyiri Omwaami kwoola ekiloguraamu elifu chibiri neende emia chine neende amahumi kabiri neende chitaanu (2,425).

³⁰Niyehoonyera echeene chino, Bbesaleeli yahola ebyeemwaho by'esiruwa sy'Eyeema ly'Ohubaao hw'Omwaami, haandi yahola alutaari y'omugasa, alala neende ewaaya ch'omugasa echiohusikiraho, alala neende ebiindu biindi bichiira hu alutaari,

³¹ebyeemero by'olukaka lwebodoohania, eby'esiruwa sy'olukaka, ebihoongo byoosi eby'Eyeema, alala neende olukaka lwebodoohania lwosi.