Read saamia Ohutula 4 Bible Online

Ohutula 4 - saamia bible

Ohutula 4

¹Bulaanu, Musa yaakobola mu Omwaami ati, “Nae niwiichuhana Abaisiraeli baahaya ohuufukiiriramo haandi baahaya ohutekeeresa bi mba nimbaboolera. Mba njia ohuhola siina nibaboola bati ewe haba siwumboneheere daawe?”

²Mani ao Omwaami n'amuteeba ati, “Siina syeene esyo sy'odiirire?” Nae yamukobolamo ati, “Endabuhi”.

³Omwaami yamuboolera ati, “Yisukune aasi.” Mani Musa niyayisukuna aasi, endabuhi eyo yakaluuhana yaaba enjuha, mani yaayiruha.

⁴Haandi Omwaami n'aboolera Musa ati, “Ewe guunama aasi oyidoolere enamuhira.” Mani Musa yaguunama yayidiira, yaakaluhaana yaaba endabuhi haandi.

⁵Omwaami yamuboolera ati, “Chia ohole otyo ohwomiisira Abaisiraeli oti Omwaami, Nasaae wa bakuuka yaabwe, Nasaae wa Abburahamu, Yisaka, neende Yakobbo, niye ohuboneheere.”

⁶Omwaami haandi yemeeda ohuboolera Musa ati, “Ta omuhono kwao okwo mu ngubo yao.” Musa yahola atyo; mani niyatusa erwaanyi omuhono kwae okwo, kwali kuli koti okwalwaala hale ebigeenge, nikwiichuuleho amaboondo ka rachaari, akafwaana koti ekohe.

⁷Mani Omwaami n'aboola ati, “Ta omuhono kwao okwomu ngubo haandi.” Musa haandi yaahola atyo, nae niyakutusamo ehabi lino, kwali kumalire ohukobola abweene, nikufwaana koti omubiri kwae kuundi.

⁸Omwaami n'aboola ati, “Nikali mbwe haba sibacha ohuhufukiiriramo oba nibatanyala ohwiikuswa neende esy'amayia syaamberi, sino nasyo siba sichia ohubeekusa.

⁹Nae nikali mbwe kata neende eby'amayia bino byoombi banahaya ohuhufukiiriramo, haandi kata baahaya ohutekeeresa byooba noboola, oba onachia odayeho hu maachi k'omwaalo kwa Naili okwo mani okachuhe aasi hu loba. Amaachi ako kachia ohukaluuhana kabe amabaanga.”

¹⁰Nae Musa n'aboola ati, “Haba, Omwaami, otatuma ese daawe. Ese haba siindi omulomalomi mulai, haandi ohutula nochaaka ohulomaloma naange, sisiiri ohubaaho omuundu onyala ohulomaloma bulai. Ese ndi omulomalomi mubi muno, omuundu ochia kaala haandi onanaakira sa.”

¹¹Haandi Omwaami yaamuboolera ati, “Nae omanyire oti wiina mweene oberesaanga omuundu omunwa kulomalomaanga? Wiina mweene okeraanga omuundu na diimba oba naumumala? Wiina mweene okeraanga naabona, oba naofula? Oyo niye ESE, Omwaami.

¹²Mani ewe bulaanu, chia buchia! Ese mweene niise ochia ohuhuhoonya onyale ohulomaloma, haandi niise omweene ochia ohuhubooleraanga byoochia ohulomalomaanga.”

¹³Nae Musa yokobolamo ati, “Haba daawe, Omwaami waange, noojama tumaho sa omuundu wuundi.”

¹⁴Nae hu luno, Omwaami yachaaka ohunyoolerera Musa mani yamuboolera ati, “Nae obaasaho otye hu Arooni mwaanamaao, Omuleefi? Ese manyire endi oyo anyala ohulomaloma bulai muno. Haandi mubwadyeeri bweene mbano ali ohwiicha abonane naawe esiha sino syeene, haandi achia ohusaangaala muno ohuhubonaho.

¹⁵Ewe onyala ohulomaloma nae mani waamuboolera byaaba aboole. Ese mweene njia ohuhoonyaanga eng'we mweembi ohulomaloma, haandi njia ohuba ese mweene ochia ohubabooleraanga eng'we mweembi bi muchia ohuholaanga.

¹⁶Mani oyo niye ochia ohuba omulomalomi wao haandi ochia ohuhulomalomeraanga eyiri abaandu. Bulaanu ewe ochia ohuba koti Nasaae, n'omubooleraanga byaaba n'achia ohulomalomaanga.

¹⁷Mani bukula endabuhi yeene yino ochie nayo; olwohuba eyo niyo yoocha ohuholeraanga amayia.”

¹⁸Bulaanu, Musa yeemao yakobola eyiri Yetero, muhweeng'ene, mani yaamuboolera ati, “Hwekweeda wuundehe ngobole eyiri abaluyia baange mu Misiri, mbone nibaba nibasisiiriyo abalamu.” Yetero yafukiirira mani yaamuseebula yawaao.

¹⁹Nae Musa niyali n'asisiiri mu Midia, Omwaami oyo haandi yaamuboolera ati, “Ewe kobolayo mu Misiri, olwohuba abo boosi abali nibakiiya ohuhwiita bamala ohufwa bawa.”

²⁰Mani sakira Musa yabukula omuhasi wae alala neende abaana bae basyaani, yaabata hu suhiri, yaachaaka nabo olukeendo oluchia Misiri, n'akiingire endabuhi yira yi Nasaae yamuboolera ohuchia nayo.

²¹Haandi Omwaami yaboolera Musa ati, “Bulaanu koti lu oli ohukobolayo mu Misiri, manyira elalira oti ochia ohunyala ohuhola mu moni w'omutuki eby'amayia byoosi bi ndahuba obunyala bubihola. Nae kata katyo, njia ohuhola omutuki oyo abe ow'esyeejo, mani ahaye ohuleha abaandu ohuwaao.

²²Mani haandi ohoyere ohumuboolera oti ESE, Omwaami ndi ohuboola endi, ‘Yisiraeli niye omwaana waange w'esisyaani waamberi.

²³Ndahuboolera hale endi leha omwaana waange musyaani achie, hu anyale ohuunyinamiraanga, nae ewe wahaya sa. Mani bulaanu ese naange njia ohwiita omwaana wao w'esisyaani waamberi.’ ”

²⁴Musa niyali naali abuundu w'ohuwuluuhiramo naali hu lukeendo naachia Misiri, haandi Omwaami yamuloondaho yamudiiya mani yateemaho ohumwiita.

²⁵Bulaanu, Sipoora, omuhaaye waye, yabukula ekina lyooki, mani naaheba omwaana wae musyaani, naamala nageeng'a esihoba esyo hu busaacha bwa Musa, n'aboola ati, “Ewe mubwadyeeri bweene oli wamwaange w'esibaanga!”

²⁶Mani ao, Nasaae yaaleha Musa yaabaao omulamu. Bulaanu byali mbwe Sipoora yali naaboolere ati, “Ewe oli wamwaange w'amabaanga,” hulw'ohuheba ohwo.

²⁷Abweene ao, nae Omwaami yali n'amalire ohuboolera Arooni ati, “Ewe chia mu siparara obukaanire Musa.” Mani yatula yaachia abukaanira Musa hu lugulu lwoolerefu; mani niyamubukaana, yamukwa mu sirifu.

²⁸Musa yaboolera Arooni buli siindu si Omwaami yali niyaboola niyali naamuboola ati akobole Misiri; Haandi Musa yamuboolera hu mayia ka Omwaami yali naamulagiire ohuholaanga.

²⁹Mani Musa neende Arooni bachia Misiri bahung'aania alala abeemirisi b'Abaisiraeli boosi.

³⁰Arooni yababoolera buli siindu si Omwaami yali niyaboolera Musa, haandi Musa yesi yaahola eby'amayia byoosi mu moni w'abaandu abo.

³¹Abaisiraeli bafukiirira, mani nibawulira bati Omwaami yali niyeechere yi bali, haandi bati yali nabweene koti lu bali nibayirwa neende obwaalaba, bakwa aasi, mani beenamira Omwaami.