Read saamia Ohutula 40 Bible Online

Ohutula 40 - saamia bible

Ohutula 40

¹Omwaami yaboolera Musa ati,

²“Hu ludaalo lutaangira olw'omwoosi nilwo lwoochia ohweemeseraho Eyeema ly'Ohubaao hw'Omwaami.

³Lite mu Esanduuku ly'Endagaano elirimo Amalako Ehumi kala, haandi ote epasya mu moni walyo.

⁴Chia oleete emeesa yosi oyiingisemo, mani oyiteeho ebiindu byoosi ebyehoonyerwa. Haandi oleete wiingisemo esiteeni sy'etaara ositeeho amataara koosi.

⁵Taamo alutaari y'esaabbu y'ohuniooheseraho obubbaani mu moni w'Esanduuku ly'Endagaano, haandi waanihe epasya mu siruwa w'Eyeema.

⁶Bulaanu ta mu moni w'Eyeema omwo alutaari yisaamba ebiyaanwa.

⁷Haandi chia ote olukaraaya lw'ohweeyoseraho akatikaati w'Eyeema neende alutaari eyo mani olwiichusemo amaachi.

⁸Taao olukaka lwebodoohanie mani waanihe epasya mu siruwa syaalwo.

⁹“Yawula Eyeema elyo, alala neende ebiindi byehoonyerwamo byoosi niwehoonyera ohubichuhaangaho amafuta moolerefu, mani linyale ohuba elyoolerefu.

¹⁰Esiloondaho, chia waawule alutaari alala neende ebiindu byehoonyerwa byoosi, niwehoonyera ohubichuhaangaho amafuta, niyehola ohuba enjoolerefu abweene.

¹¹Chia haandi mani ohole otyo olukaraaya lw'ohweeyoseraho alala neende obweemero bwaayo mu ngira nasilala eyo.

¹²“Chia oleete Arooni neende abaana bae boosi hu siruwa sy'Eyeema, mani obaboolere bahole omusiro kw'ohweyoka.

¹³Fwaala Arooni ebyefwaalo by'obulaamisi, omuchuheho amafuta, mani mu ngira yino omwaawule, yaahalaabanire koti omulaamisi.

¹⁴Haandi chia oleete abaana bae boosi mani obafwaale amasaati.

¹⁵Mala otyo mani obachuheho amafuta, koti sa lu ochuhire hu saabwe, hu baahalaabanire bosi koti abalaamisi. Ohubachuhaho amafuta huno huchia ohubahola babe abalaamisi endaalo echiicha choosi.”

¹⁶Mani Musa yahola buli siindu koti sa lu Omwaami yali n'alagiire.

¹⁷Mani hu ludaalo lutaangira olw'omwoosi kutaangira, okw'omwaaka kw'ohubiri ohutula nibali nibatulire mu Misiri, Eyeema elyo ely'ohubaao hw'Omwaami lyemesibwa.

¹⁸Musa yata aasi obweemero bwalyo, yeemesa efureemu chaalyo, mani yaambaania emisiruunga kihalakaniamo chaalyo, haandi niyeemesa emisiiro kyaalyo.

¹⁹Yabaambula esibwiiha hu Yeema, mani n'abwiihaho esyohumukulu, koti lu Omwaami yali n'alagiire.

²⁰Bulaanu yabukula ebituundu bibiri eby'makina bira, mani naamala naachita mu Sanduuku ly'Endagaano. Yabukula emisiiro, mani naamala nakiingisa mu ngata ch'Esanduuku, mani haandi naata humukulu esifuuniho.

²¹Yabukula esanduuku mani yaalita mu Yeema, mani niyaaniha epasya eyo. Mani mu ngira yino, yanyala ohuhiingakira Esanduuku ly'Endagaano, koti sa lu Omwaami yali n'alagiire.

²²Yata emeesa mu Yeema, hu lwaande lw'emukulu erwaanyi w'epasya,

²³mani yaataaho emigaati kiba nibakibereese Omwaami, koti sa lu Omwaami yali n'alagiire.

²⁴Yata esiteeni sy'etaara mu Yeema, hu lwaande lw'emwaalo, olutingaalaane neende emeesa,

²⁵mani ebweene eyo eyiri ohubaao hw'Omwaami, yayaambiayo amataara ako koti sa lu Omwaami yali n'alagiire.

²⁶Yata alutaari y'esaabbu mu Yeema omwo, mu moni w'epasya,

²⁷mani nanioohesa obubbaani buwunya esing'aari silai muno, koti lu Omwaami yali n'alagiire.

²⁸Yaaniha epasya hu siruwa sy'Eyeema,

²⁹mani ebweene eyo, mu moni w'epasya, yataayo alutaari yohusaambiraho ebiyaanwa. Hu bweene ohwo, nihwo hu yayaaniraho ebiyaanwa by'ohusaamba, alala neende ebiyaanwa by'emere, koti lu Omwaami yali n'alagiire.

³⁰Yata olukaraaya lw'ohweeyoseraho akatikaati w'Eyeema neende alutaari, mani n'alwiichusamo amaachi.

³¹Musa, Arooni, alala neende abaana bae boosi, besaabiraangamo amahono haandi beeyoseraangamo amakulu kaabwe

³²buli lu babeechaanga nibeengira mu Yeema elyo, oba buli lu babeechaanga nibachia eyiri alutaari, koti lu Omwaami yali n'alagiire.

³³Musa yataao olukaka lwebodoohania Eyeema elyo, haandi yataamo alutaari, haandi yaaniha epasya hu siruwa sy'olukaka olwo. Mani ao, Musa yaamaliirisa ohuhola emirimo kyoosi.

³⁴Bulaanu, esireesi syabwiiha hu Yeema, mani obulafu bwiita emoni bw'ohubaao hw'Omwaami, nibwiichula mu Yeema.

³⁵Mani, ohweema hu sino, Musa yahaywa engeri y'ohwiingiriramo mu Yeema omwo.

³⁶Abaisiraeli bosi bachaaka ohuwuyaanga nibachia nibata ekaambi abuundu waandi, nikali mbwe esireesi syalichiingi syosi nisitulire hu Yeema ohwo.

³⁷Nae esireesi nisyalichiingi ni sisihayiire hu Yeema ohwo, Abaisiraeli haba sibawuuyiaanga ekaambi ohuchia abuundu waandi daawe.

³⁸Mani endaalo choosi Abaisiraeli nibali mu siparara, babonaanga esireesi sy'ohubaao hw'Omwaami nisiri aakulu w'Eyeema esiha sy'esideete syoong'ene, nae esiro, babonaanga omuliro kwaaduha nikuli aakulu waalyo.