Read saamia Yobbu 11 Bible Online

Yobbu 11 - saamia bible

Yobbu 11

¹Mani Sofaari Omunama yakobolamo ati:

²“Emboosi nyiingi chityo sichihoyerwa obutakobolwamo, haandi omuundu olomaloma muno atyo haba s'ahoyeere ohukololwa?

³Ohubuluula hwao ohwo sihunakayire abaandu ohulomaloma, haandi noduula otyo, anaabuleo omuundu ahuyaambya esoni?

⁴Olwohuba oboola oti, ‘Enjekesa yaange njoolerefu niyo, haandi mbulaho esyonoono mu moni wa Nasaae.’

⁵Nae eee, ndahekoombere endi Nasaae alomalomeho, mani ahubooleereho ewe omweene,

⁶haandi ahubooleereho ebyaama bitaamanyihaane eby'amakesi! Olwohuba ohumanya hwa Nasaae haba sihwaakama. Manya oti Nasaae ahusaandya budiidi ohuhira koti ebyonoono byao bihoyerwa.

⁷“Onyala ohukoonyeresa ebiindu by'amaani bidiira hu Nasaae? Onyala ohukoonyeresa wamanya amaani k'Owobunyala bwoosi yi kaakama?

⁸Kali aakulu ohuhira Ekulu, wahaholeyo siina? Kali aasi ohuhira emakoombe, onaamanye siina?

⁹Maleeyi ohuhira esyaalo, haandi matakalafu ohuhira enyaanja.

¹⁰Nae Nasaae n'abitamo, mani yahuboya, haandi yahuwosesa, wiina mweene owahamukayira?

¹¹Olwohuba Nasaae amanyire abaandu batahoyera; naabona esyonoono sibahola, obaasa oti haba sadeebayo?

¹²Nae omuundu obulamo amakesi haba saacha ohumanya, ati esuhiri njalaba yibulwaanga niyiri enoonga.

¹³“Niwefunaka mu mwooyo kwao, ochia ohuniinia amahono kao eyiri Nasaae.

¹⁴Ebiholwa bihyaamu nibiri mu mahono kao, bikise eyale muno, haandi otafukiiriraanga obudoondobanu buba mu daala lyao.

¹⁵Mubwadyeeri bweene, ochia ohusiingisaanga emoni chao aakulu abula obubi bwoosi; onabeechaanga neende omuleembe, haandi soocha ohutichaanga esiindu syoosi.

¹⁶Ochia ohwiibirira ebidinyu byao byoosi; haandi ochia ohubiibirira koti amaachi kamala ohuhulukusa.

¹⁷Obulamu bwao bucha ohumesamesa ohuhiraho esideete; esiirima syabwo sichia ohuba koti echuli.

¹⁸Mani ochia ohuba omugumu, olwohuba esuubi liriwo; Nasaae achia ohuhuliinda, mani ochia ohuwuluuha ataali ohutya hwoosi.

¹⁹Ochia ohweyalisa, mani yibuleo esiindu esihutiisa; abaandu baangi muno bachia ohuhusabaanga obuhoonyi.

²⁰Nae emoni ch'abahola-mbi chichia ohuwofula; mani engira yohweeyibiraho yibakoteho, haandi esuubi lyaabwe lichia ohufwa.”