Read saamia Yobbu 13 Bible Online

Yobbu 13 - saamia bible

Yobbu 13

¹“Eee, bino byoosi ndabibona, haandi ndabiwulira hale mani ndaabimanya.

²“Ebiindu bi eng'we mumanyire, syesi mbimanyire; mani sibulao esiindu si muuhira.

³Nae ndaha nomanomeho neende ow'Obunyala bwoosi, haandi ndekoomba ohuyaala omusaango kwaange neende Nasaae.

⁴Nae eng'we, muli ababacha abeebachirisa koti abadyeeri; mweesi muli abalesi babula obuhoonyi.

⁵Mani muba nimubuleereere elalira, mwaheyekeese muti muli abakesi!

⁶Bulaanu muwulire bi mboola, mani mutekeerese koti lu ndeelomalomaho.

⁷Lwasiina mubacha Nasaae? Mubaasa muti ebitina byeeng'we biriho neende obuhoonyi yaali?

⁸Mubaasa muti muli ohukwiira Nasaae, mubaasa muti munaamuwosere omusaango yaahira?

⁹Mubaasa muti binabachiire bulai yabehaliirisa mani n'abafuumbula? Oba munyala ohumubacha koti omuundu yahabacha owaasye?

¹⁰Nasaae achia ohuboolobya, kata mwahaba nimweekesa ohukwiira olwaande lulala mu bweekisi.

¹¹Mubaasa muti oluyaali lwae haba silucha ohubatiisa, mani amaani kae kabakweeho?

¹²Engaado cheeng'we chibulamo amahuluundu, chiri koti ekohe, ohweeosaho hweeng'we hw'ebihaya, hubulamo amaani.

¹³“Mubuleereho, mani mulehe nomanome, mani leha esikwaao, singweeho.

¹⁴Njia ohweluma omweene, mani nduseo obulamu bwaange.

¹⁵Bone, achia ohuunjita; haba si ndi neende esuubi; nae njia ohweeosaho mu moni wae.

¹⁶Sino nisyo esichia ohuba obuwonia bwaange.

¹⁷Mutekeerese bulai bweene emboosi chaange, mani lehe bi mboola bikwe mu matwi keeng'we.

¹⁸Bone, ndekeehe omusaango kwaange; manyire endi njia ohutekeereswa.

¹⁹Wiina mweene ochia ohuyiingana naange? Olwohuba njia ohuba nimbuleerere haandi nifwiire.

²⁰Mberese ebiindu bibiri byoong'ene, mani omweene siinja ohuhuhweekisa:

²¹nduseho omuhono kwao, mani leha ebitiisa byao bihaye ohuusiindusa.

²²Mani naange, njia ohukaluhamo; oba lehe nomanome, mani haba simuchia ohungaluhamo.

²³Ebibi byaange neende ebyonoono byaange biri biinga? Leha manye obujeemu bwaange neende ebyonoono byaange.

²⁴Lwasiina okisa obweeni bwao, haandi waambukula koti omusuku wao?

²⁵Ewe onatiise esaafu li muyaka kudumuulire haandi waloonda hu sikoha syoomu?

²⁶Olwohuba wandaaho obudoondobaane buungi muno, haandi wufunaana hulw'ebyonoono by'obuyere bwaange.

²⁷Oboya amakulu kaange epiingo, oloonderesa buli yi makulu kaange kachiira; obona buli yi sisiisiro syaange siseena.

²⁸Omuundu owaao, ali koti esiindu syabola, ali koti engubo chi masiriri kaalya hale.