Read saamia Yobbu 16 Bible Online

Yobbu 16 - saamia bible

Yobbu 16

¹Yobbu yakobolamo ati:

²“Mbuliire ebiindu biingi muno ebiri koti bino; mani eng'we mweesi haba simuli abaandu balai abanyala ohugumya emyooyo.

³Emboosi chibulamo obuhoonyi chahaakame liina? Oba buli siicha mu bibaaso byeeng'we nisyo si mukobolamo?

⁴Ese syesi ndahalomaloome koti lu mulomaloma, muba nimuli koti lu ndi; ndahabaduulire mani ndaabekaluuhaniaho, ndaabayuuyira omutwe.

⁵Ndahalomaloome emboosi chibagumya emyooyo, haandi echiyenjeesa obuchuuni bweeng'we.

⁶“Niinomanoma, obuchuuni bwaange haba sibuyenjeera, haandi nindesimiirisa, abulao owundeha mani bwandulaho.

⁷Mubwadyeeri bweene, Nasaae yamaliremo amaani; asihiriise abaandu baange boosi.

⁸Mani yafwiinyiriire, esyeekesa siti yaahira; haandi obung'ayu bwaange nibwo bu baandu beemaho ohwomiisa bati omusaango kuuhira, mani sino sibona-bubona.

⁹Nasaae mu tima lyae yambosooleremo, haandi yaambonera; mani yaasyeera ameeno; abasuku baange baangaluuhaniire mani baamyuulira emoni.

¹⁰Abaandu baahoomoleere neende eminwa kyaabwe, baambaamire hu lusaya ataali ohundelalihira hwoosi, baangaluuhaniire mani baandeebodoohania.

¹¹Nasaae yandeheere abonooni, mani yaasukuna mu mahono k'abaandu badoondobanu.

¹²Ndali ni ndi bulai, nae mani niyangabuhaniamo; yaangwa mu kosi mani yanyonyobolamo; yaholere ohuba koti esiindu sy'esabba yae,

¹³abalasa obuyiingo bwae baandeebodoohaanie. Yaatamo efuko chaange ataali ohwelalihira hwoosi; achuha endusye yaange hu loba.

¹⁴Yemeeda ohundaaho ebikoonjo buli siha; mani yaaseenakira naali koti omulwaani ochiiririra ohwiita.

¹⁵Ndeesoneere ebigunia mani ndaabita hu mubiri kwaange, mani amaani kaange ndaakata mu lufu.

¹⁶Emoni chaange chahaanye hulw'ohulira, mani obwooya bwohu moni chaange bwamaliya;

¹⁷kata ndahaba nitaali neende obwaalaba mu mahono kaange, nae esala yaange njoolerefu niyo.

¹⁸“Ewe esyaalo, otabwiiha hu mabaanga kaange, haandi leha ohweelirira hwaange hutasimisibwa.

¹⁹Nae kata bulaanu, siri neende suubi endi ndi neende omuloli waange wungwiira Muukulu, haandi oyo owunjosera omusaango ali aakulu Muukulu.

²⁰Ababeere abeecha baange boolere baanjaraanga sa; emoni chaange chihulukusa amasika nindirira Nasaae,

²¹Ndekoomba muno mbwe abe hoo omuundu wusabira eyiri Nasaae koti osabira omwiicha wae.

²²Olwohuba ndoong'iseyo emyaaka midiidi sa ohuchia eyo yi tahanyale haandi ohutulayo ndaakobola.