Read saamia Yobbu 17 Bible Online

Yobbu 17 - saamia bible

Yobbu 17

¹Obulamu bwaange buweere, endaalo chaange chiweereo, eng'ani niyo eyiniindire.

²Mubwadyeeri bweene, abaandu baandeebodoohaanie nibo abanjaara, haandi emoni chaange buli ludaalo chibona ohuseeta hwaabwe.

³“Ndi owadyeeri yooli, Nasaae. Ba omuloli waange mu kano; hulwohuba mbulaho omuundu yeesi owaheema naange ebiha bino.

⁴Koti lu wikaaleo ebibaaso byaabwe byaabahaya ohubaasa, mani sakira otachia ohubaleha baahire olwaalero.

⁵Olukaado luhale lwaboola luti oyo yesi ohoba abeecha bae mbwe hu anyale ohunyoola omukabo kw'emyaandu kyaabwe, abaana bae nibo badoong'aanga nibasaanda.

⁶“Nae bulaanu holerwe omuundu yi baandu bakaadiraho olukaado chana luno nibacheha, haandi abaandu nibaambona nibafuucha sa amate.

⁷Emoni chaange chiwofuule hulw'ebidinyu, haandi omubiri kwaange kwoosi kung'ayire koti esiiniha.

⁸Abaandu baluungifu nibabona sino batya, haandi omuundu otaaliho omusaango asiingira mani yoolobya abatatya Nasaae.

⁹Nae omuundu muluungifu yomiirira hu ngeri yae, haandi oyo otaaliho omusaango yemeeda sa ohubaamo amaani.

¹⁰Nae eng'we, mukobole haandi, eng'we mweesi, mani haba siinja ohunyoola mweeng'we omuundu olimo amakesi.

¹¹Endaalo chaange chiweereo, haandi endekeha chaange chifwiire, ebyo bi mwooyo kwaange kubeere nikwekoomba.

¹²Balaanga esiro bati esideete; mu siirima baboola bati, ‘Obulafu buli aambi.’

¹³Nindekoomba endi emakoombe niyo eyichia ohuba edaala lyaange, haandi obumenyo bwaange buli aasi eyomu siirima,

¹⁴nimboolera eng'ani endi, ‘niiwe laata yaange,’ haandi eyiri enyeende endi, ‘Niiwe mako yaange,’ oba endi ‘Niiwe mboocho yaange,’

¹⁵mani esuubi lyaange liba niliri yeena? Wiina mweene ochia ohubona esuubi lyaange?

¹⁶Liricha naange aasi emakoombe? Hwahehirire alala nalyo ningaluha mu loba?”