Read saamia Yobbu 18 Bible Online

Yobbu 18 - saamia bible

Yobbu 18

¹Bbiridaadi Omusuuhi yakobolamo ati,

²“Onaakoonyerese emboosi ohwoola liina? Tangira obaase, mani huchia ohulomaloma.

³Lwasiina otubalira mu bisolo bitabaasa? Lwasiina otuyira koti abaandu babulamo amakesi?

⁴Omweene niiwe owechuunia mu tima lyao, obaasa oti esyaalo sinaalehwe hulwao, oba olwaanda lwaatula mu bwiihalo bwalwo?

⁵ “Eee, obulafu bw'omuhola-mbi busimire, haandi obulafu bwae bucha ohusimisibwa.

⁶Mu nyuumba yae, obulafu bweeholere esiirima, haandi etaara lyae lisimire.

⁷Owali n'akeenda neende amaani, bulaanu yeendeherera sa haandi endekeha chae cheene nicho echimukwiisa aasi.

⁸Olwohuba amakulu kae keene niko akamutekeere yakwa mu muteego, mani akeendera sa hu buko.

⁹Omuteego kumudiirira hu bisiisiro, mani olusya lwaamwomiiriraho.

¹⁰Bamutekere neende omukoye mu loba, bateere omuteego hu ngira yae.

¹¹Ebiindu bitiisa bimwebodohaanie hu buli mbeka, mani bimuloondaho buli yachiira.

¹²Alumwa enjala mani yabwaamo amaani, ebiindu bibi bi muliindiriire mu hudandaakira hwae.

¹³Obulwaae bumuliire omubiri kwawaaho, amahono kae neende amakulu kae kadoong'ere amakuumba mahaya.

¹⁴Akakambulwe ohutula mu mubiri ku yali niyeesika, mani ayirirwe eyiri ebiindu bitiisa muno.

¹⁵Bulaanu abaandu baatamanyire nibo abamenya mu nyuumba yae; obuyiinda bwoomu nyuumba yae busaakuulirwe.

¹⁶Ali koti omusaala kwooma nikuchaakira hu misi, mani amasaga kae kaahooha aakulu.

¹⁷Abulao ochia ohumwiichulisa hu syaalo, haandi eliita lyae silicha ohwiichuliswa.

¹⁸Asukuunwe ohutula mu bulafu ohuchia mu siirima, mani yaatuswa hu syaalo.

¹⁹Mu baandu bae, abulaho omwaana oba omwiichuhulu, haandi yi yamenyaanga, abulao omuundu wadoong'ao.

²⁰Abaandu batula emuumbo besiinduha nibawulira ebimukwiireho, nae abatula ebukwe obuti bubadiira.

²¹Mubwadyeeri bweene, nilwo lu baandu batatya Nasaae baba, buno nibwo obumenyo bw'omuundu otaamanyire Nasaae.”