Read saamia Yobbu 19 Bible Online

Yobbu 19 - saamia bible

Yobbu 19

¹Yobbu yakobolamo ati,

²“Mwahasaandye ohwoola liina? Haandi mwahaanjite omwooyo neende emboosi cheeng'we ohwoola liina?

³Amahabi ehumi kano mubeere nimuundiho nimuunyeka; eng'we haba esoni sichibadiiraho ohuunjira mutyo?

⁴Kata byahaba ebyadyeeri mbwe ndonoona, esyonoono esyo syaange nisyo.

⁵Nikali mbwe muli ohundeniinisiryaho abeene mani mwasyuula, mani mwalaanga ohutalomaloma hwaange muti ndi omubi,

⁶mumanye mani muti Nasaae yandeere mu bubi, haandi yandekere neende omuteego kwae kwandeebodoohania.

⁷Bone, ese ndira endi, ‘Obutemo!’ nae abulao owungaluhamo; huumula mu kono ly'aakulu, nae bubulao obwadyeeri.

⁸Nasaae amalire ohunjikalirao engira, haba siinyala ohubita, mani amalire ohuta esiirima hu ngira chaange.

⁹Nasaae yandusireho oluyaali lwaange, atusire ekofia y'obutuki hu mutwe kwaange.

¹⁰Nasaae yafunaake-funaake enyaande choosi, mani mbweeremo amaani, yaniihe esuubi lyaange aakulu koti omusaala.

¹¹Nasaae yasaangulusiireho etima lyae, mani yaanjira koti omusuku wae.

¹²Amaye kae kebuusire alala; ketekeehe ohuuseeta kaanwaanie, mani kebodohaanie enyuumba yaange.

¹³“Nasaae yanjawuhaanie neende bamwaanaama, haandi abasyaange boosi baandebwaabire.

¹⁴Abaluyia baange neende abeecha baange beene haba sibaahoonya;

¹⁵abaandu baangeniyaanga boosi baanjibiriire; abahalaabani baange bahasi baanjira koti omuteende; ndeholere koti omukulwa mu moni waabwe.

¹⁶Ninaanga omuhalaabani waange, haba siyangobolamo; kata ndahamwekweeda endye.

¹⁷Esifuundu syaange siinjiruuseho omuhasi waange, sikayiire kata bamwaanama beene ohusuda aambi naange.

¹⁸Kata abaana bayere bosi baandekeeresa; nisiingiraho sa endi, nibachaaka ohuunomanomaho.

¹⁹Abali abeecha baange beene baandebwaabire, haandi abo ba ndali nindaheerera elalira baandekaluuhaanieho.

²⁰Ng'ayire muno, ndoong'ere amakuumba mahaya, esisinini syoong'ene nisyo esidoong'ere.

²¹Mungwiire esisa, mungwiire esisa, eng'we abeecha baange, olwohuba Nasaae yahuyire.

²²Lwasiina eng'we mungiiya koti lu Nasaae yangiiya? Lwasiina ohusaanda hwaange haba sihubamala?

²³“Eee, emboosi chaange chiba nichandiikwa! Eee, chiba nichandiikwa mu sitabo!

²⁴Eee, chiba nichandiikwa neende ekalaamu y'esyuuma mani chabaachwa mu lwaanda chaabaao endaalo choosi!

²⁵Olwohuba ese manyire endi Omununuli waange aluwo, haandi achia ohweema hu syaalo;

²⁶nae esihoba syaange syahaba nisinyaasiihe siti, njia ohubona Nasaae ni ndi neende omubiri kwaange abweene.

²⁷Nasaae niye yi njia ohubona naali aambi naange, haandi emoni chaange haba sichicha ohubona omuundu wuundi, nae chichia ohumubona. Omwooyo kwaange kuumbwaamo!

²⁸Nimuboola muti, ‘Hunamukiiye hutye!’ haandi muti, ‘Esifune sy'ebiindu bino sinyoolehana mu muundu oyo’;

²⁹nae mutye olugaanga, olwohuba etima lileeta ohusaanda hw'olupaanga, hu munyale ohumanya muti aliwo ohuheenga omusaango.”