Read saamia Yobbu 2 Bible Online

Yobbu 2 - saamia bible

Yobbu 2

¹Haandi lwaliwo oludaalo luundi lu baana ba Nasaae beecha ohweyekesa mu moni w'Omwaami, mani Sitaani yesi niyeecheramo ohweyekesa eyiri Omwaami.

²Omwaami yateeba Sitaani ati, “Otula yeena?” Sitaani yakobola mu Omwaami ati, “Ndula ohung'alaala hu syaalo eyo neende era, nisyebodoohaniamo.”

³Omwaami yateeba Sitaani ati, “Ombweeneereho Yobbu omuhalaabani waange, abulao omuundu yeesi hu syaalo oli koti Yobbu, obulaho omusaango kwoosi haandi omuluungifu, owiisa oluyaali mu Nasaae haandi owebwaaba ohwonoona. Asiihayiire sa hu bweesikwa bwae, kata ayahaba mbwe ewe wasiindiha ndamusihirisa sa ataali esifune syoosi.”

⁴Nae Sitaani yakobola mu Mwaami ati, “Esihoba situungwa esihoba! Ebiindu byoosi bi muundu ali nabyo yahabyeetuseho nae adoong'e naali omulamu.

⁵Nae bulaanu kololaho omuhono kwao mani odiire hu makuumba kae neende hu mubiri kwae, mani achia ohuhwebwaaba n'obona.”

⁶Mani Omwaami yaboolera Sitaani ati, “Bona, nguyo ali mu bunyala bwao, ohutusaho, otamumalaho obulamu bwae.”

⁷Sitaani yatula mu moni w'Omwaami, yayaambya Yobbu amaboondo mabi muno, mani Yobbu niyeechula ebifwiimba hu mubiri ohutula hu mutwe ohwoolera elalira hu makulu.

⁸Yobbu yabukula olukyo ngaalweyakirasa, mani niyeehalaangaya mu kohe.

⁹Omuhasi wa Yobbu yamuteeba ati, “Ewe osihayiire sa hu bweesikwa bwao obwo? Webwaabe Nasaae, mani ofwe bihire.”

¹⁰Nae Yobbu yamuboolera ati, “Olomaloma koti mulala hu bahasi basiru yahalomeloome. Hwakaanireenge sa ebiindu bilai byoong'ene ohutula mu mahono ka Nasaae, nae bulaanu huhaya ohwakaanira ebiindu bibi?” Mu kano koosi, Yobbu haba siyalomalomaho bubi hu Nasaae.

¹¹Abeecha ba Yobbu bali, Elifaasi, ohutula mu siko sya Temani, Bbiridaadi, ohutula mu syaalo sya Suwa, neende Sofaari, ohutula mu syaalo sya Naama. Nibawulira ebidinyu byakwa hu Yobbu, abeecha badatu bano, buli mulala yaheengao ohutula mu syaalo syae ohwiicha ohumusaasira. Elifaasi Omutemaani, Bbiridaadi Omusuhiiti, neende Sofaari Omunamaati. Bafukiirisania ohwiicha ohusaasira Yobbu neende ohumugumya omwooyo.

¹²Nibamubona nibasisiiri eyale, haba sibamumanyirisa; mani baachaaka ohuubba wuuwi nibalira amasika. Bataandula amakaanju kaabwe mani baanya olufu aakulu nilubakwa hu mitwe.

¹³Mani nibeehala aasi hu loba alala nae ohumala endaalo chitaanu-na-chibiri neende ebiro bitaanu-na-bibiri, mani abulao omuundu walomalomaanga nae emboosi yoosi, olwohuba babona bati yali n'asaanda muno.