Read saamia Yobbu 20 Bible Online

Yobbu 20 - saamia bible

Yobbu 20

¹Nae Sofaari Omunama yakobolamo ati,

²“Sakira ebibaaso byaange binyasiihe, bikera ninyanguya ohuhukobolamo.

³Mbulira ohwoolobiswa hu tahesimiirisira ohutula mu mboosi chimuboolere, nae manyire nga luhoyeere ohubakobolamo.

⁴Ewe haba siwamanyaho sino ohutula hale, ohutula omuundu n'achaaka ohuba hu syaalo,

⁵oti ohweniinia hw'omuhola-mbi haba sihuyiindiraanga, haandi esangaalo ly'omuundu otamanyire Nasaae libechaanga ely'esiha sidiidi sa?

⁶Kata yahaleeya ohwoola muukulu, haandi omutwe kwae kwoola hu bireesi,

⁷achia ohusihirira endaalo choosi koti obunyaka bwae bweene; abo abali nibamubonaho bachia ohweteebaanga nibaboola bati, ‘Ali yeena?’

⁸Achia ohukotao koti esilooto, mani ahaye ohubonehana; achia ohukotao koti ohuboneherwa hwomu siro.

⁹Emoni chamubonaanga haandi haba sichicha ohumubonaho, oba kata obwiihalo bwae ohwiichulisibwaho haandi.

¹⁰Abaana bae bachia ohukoonya obuhoonyi bw'abamanani, haandi amahono kae omweene niko akachia ohukalusaangayo obuyiinda bwae bwoosi.

¹¹Kata yaheebona ati amakuumba kae kalimo amaani k'oburaaga amaangi muno, kachia ohufwa kata katyo mani kasiihwe nae mu loba.

¹²“Kata ebiholwa bibi byahanyunyuulira muhanwa wae, kata yahabikisa aasi w'olulimi lwae,

¹³kata yahabyomiiriraho byahaya ohuwaao, haandi yaabihayisira muhanwa wae,

¹⁴nae ebyohulya byae ebyo biba bicha ohumuhahaatira mu nda wae; mani byaalula byaaba koti endusye mu nda wae.

¹⁵Asala haandi obuyiinda bu yamira; Nasaae abutusaanga kata neende mu nda chaabwe.

¹⁶Achia ohunuuna esiri koti obutwa; obusiba bw'endemo (enjuha mbi muno) bucha ohumwiita.

¹⁷Haba saacha hutingaalaho hu myaalo, emyaalo kihulukusa obuuhi alala neende amabeere.

¹⁸Achia ohukalusayo ebiindu bi yahalaabanira byoosi, haandi haba saacha ohubilya bimukwe mu nda; engaanga yanyoolere mu huchurusa hwae haba saacha huyinyoolamo obuhoonyi bwoosi.

¹⁹Olwohuba yafwiinyirira haandi yaahaya ohudeeba hu bamanani, haandi yaanyuula enyuumba yatoombaha.

²⁰“Olwohuba okuliira kwae haba sikwiikuta, haba saacha ohuwoniaho esiindu syoosi-syoosi si yeesika.

²¹Sibulao esiindu si yalya mani syadoong'ao; sakira obuyiinda bwae haba sibucha ohuyiindira.

²²Lu yahabeere neende ebiindu biingi bimumala, nilwo lu yaheeholere elalira omumanani ohiramo; obusito bw'engisa bwoosi bwahamwebuusireho.

²³Leha alye mani yeekute! Nasaae achia ohumusiindihangamo etima lyae liingi, mani limukweeho koti ebyohulya byae.

²⁴Achia ohwiiruha esilwaaniso sy'esichuma; nae oluyiingo lw'omugasa luchia ohumufumita lumubitemo.

²⁵Luchia ohubachuha mani lubite mu mubiri kwae, omutwe kwalwo kumesamesa kuchia ohubita mu ndusye yae; obuti bucha ohumudiira.

²⁶Obuyiinda bwae bwoosi bucha ohusihirira bweehole esiirima; omuliro ku muundu ataadusa kuchia ohumusaamba kumumaleo; ebiindu bidoong'ere mu nyuumba yae bicha ohusihirira.

²⁷Ekulu lichia ohubwiihula ebyonoono byae, esyaalo sichia ohusiingira mani simukaluuhanire.

²⁸Ebiindu byomu nyuumba yae bicha ohunyakwa, mani biyirwe, hu ludaalo lw'etima lya Nasaae.

²⁹Kuno nikwo omukabo kw'omuundu mubi okutula eyiri Nasaae, nikwo omukabo ku Nasaae yamutekehera.”