Read saamia Yobbu 21 Bible Online

Yobbu 21 - saamia bible

Yobbu 21

¹Yobbu nae yakobolamo ati,

²“Tekeerese bulai muwulire emboosi chaange, mani mulehe sino siinemye omwooyo.

³Mundesimiirise, njia ohulomaloma, mani nimala ohulomaloma, hu mweemeo mwemeede ohunduulira.

⁴Nae hulwaange, mubaasa muti ndi ohwekanyiirisira omuundu? Lwasiina haba sindesimiirisa?

⁵Mutingaale mubone koti lu ndi, esyo sibawukise, mani mwaakame ohuunomanomaho bubi.

⁶Buli lu mbaasa hu kangwaaho, njaakaanga sa ohuteengereha omubiri kwoosi.

⁷Lwasiina abonooni bayiindira, mani bakofula, haandi baba neende obunyala bw'amaani?

⁸Abaana baabwe bahula nibabona, haandi babona abeechuhulu baabwe nibahula.

⁹Sibulao esiindu sinyaasa amadaala kaabwe, haandi Nasaae haba sabasaandya daawe.

¹⁰Esurusi chaabwe chiwoocha obutaakama; edwaasi chaabwe chiibula, haandi emoosi chaabwe haba sichifwa.

¹¹Beebulana koti ebisolo, mani abaana baabwe bahina.

¹²Beemba nibawulira embayire neende ebiriri nibyuubbwa, haandi basaangaala nibawulira olwiika niluubbwa.

¹³Banyolaanga ebiindu bilai mu bulamu bwaabwe, mani bafwiira mu muleembe.

¹⁴Baboolera Nasaae bati, ‘Tulehe hube! Haba sihwekoomba ohumanya engira chao.

¹⁵Ow'Obunyala bwoosi niye siina yi huli, hu humuhalaabanire? Haandi ngaanga siina yi hunyoola mu husaba esaala yaali?’

¹⁶Bone, obuyiinda bwaabwe buli mu mahono kaabwe! Ohukeraka hw'abonooni huli eyale naange.

¹⁷“Amahabi kaanga ka mwali nimubweene etaara ly'omuhola-mbi nilisima? Oba esibi syaabwe nisibakwiireho? Oba liina lu mwaboneraho Nasaae mu tima lyae n'abasaandya?

¹⁸Mani baaba koti ebikoha bi muyaka kuwuucha, oba koti omuhuuchi ku muyaka kw'amaani kukiinga kwaasukuna eyale?

¹⁹Muboola muti, ‘Nasaae asaandya abaana baabwe hulw'ebyonoono by'abeebusi.’ Leha Nasaae asaandye abahola-mbi beene, mani banyale ohusimanya.

²⁰Lehe abeene beebonereho neende emoni ohusihirira hwaabwe, mani lehe abeene bawulire obwaalaba bwa Nasaae Omunyala w'ebiindu byoosi.

²¹Olwohuba abaandu nibamala ohufwa, haba sibadeebayo esikwa hu madaala kaabwe, endaalo chaabwe nichimalire ohuwa hu syaalo.

²²Mani aliwo omuundu onyala ohweekesa Nasaae amakesi, naabona ati Nasaae niye oheengera abaandu bali mu bunyala bw'aakulu omusaango?

²³Aliwo omuundu ofwa naali n'emyaandu miingi, naali bulai muno haandi naabulao esiindu sy'atya,

²⁴omubiri kwae nikwahomera haandi n'asisiiri omuraaga.

²⁵Nae owuundi afwa neende etima mu mwooyo, nataanyolaho esangaalo mu mwooyo kwae.

²⁶Boombi nasilala bakona mu loba, mani enyeende chaabebuungaho.

²⁷“Bone, ese manyire ebibaaso byeeng'we, neende ebyonoono byeeng'we bi mubaasa ohuuhola.

²⁸Olwohuba muboola muti, ‘Enyuumba y'omwaana w'omutuki yiri yeena? Enyuumba yi muholi w'ebyonoono yali niyamenyamo yiri yeena?’

²⁹Eng'we haba simuteebangaho abaandu bakeenda hu ngira, mani simuwulirangaho emboosi chaabwe

³⁰mbwe omuhola-mbi niye owona esyonoono nisikwiireo, haandi hu ludaalo lw'etima Nasaae yaabina omuhola-mbi?

³¹Nae wiina mweene oweyaanayo ohumweemerera, haandi wiina oboola ati abulaho omusaango ohweema hu biindu bi yahola?

³²Nibamusiiha mu ng'ani, esiriindwa syae basiliinda.

³³Eloba lyomu hooho limunyunyuulira; abaandu boosi bamuloondaho, haandi abo abamwiimiriramo haba sibabaliha.

³⁴Nae eng'we munaanyale mutye ohuunemya omwooyo neende ebiindu bibulamo obuhoonyi? Sibulao simudoong'ere nasyo ohungobolamo, ohutusaho obusiru bwoong'ene.”