Read saamia Yobbu 26 Bible Online

Yobbu 26 - saamia bible

Yobbu 26

¹Nae Yobbu yakobolamo ati:

²“Ewe onyala otye ohuhoonya omuundu otaali neende amaani koti ese! Onyala otye ohuwonia omuundu otanyala ohuhola esiindu!

³Onyala otye ohukerakira omuundu otaali neende amakesi, mani waboola oti olimo amakesi!

⁴Wiina mweene ohuboleere ohulomaloma emboosi echo, haandi musaambwa siina okuhuniinire hw'olomalome otyo?

⁵Emakoombe, emyooyo kyabafu kiteengereha, amaachi neende ebiindu byamenyamo biteengereha.

⁶Nasaae abona buli siindu siri emakoombe, haandi Abbadoni abula owohweekisa.

⁷Nasaae abaamba emukulu aakulu w'ekulu, haandi yaaniha esyaalo mu miyaka.

⁸Yeekalira amaachi mu bireesi byae bisito, mani ebireesi byaahaya ohutaanduha hulw'obusito bwako.

⁹Abwiiha omwoosi neende ebireesi, mani yaakubaambulaho ebireesi byae.

¹⁰Yabodoohaania hu maachi egenya yataao olwaho akati w'obulafu neende esiirima.

¹¹Esiiro ch'ekulu chiteengereha, mani chesiinduha n'achaalabira.

¹²Obunyala bwa Nasaae bukera enyaanja yaayenjeera; mu humanya hwae, asihirisa okusolo ku balaanga bati Rahabbu.

¹³Omuuya kwae nikwo okwalabya ekulu; haandi amahono kae niko akafumita okuyuha kwali nikweeyiba.

¹⁴Nae bona, bino bituundu-tuundu sa eby'ebiindu byaahola; nae efwe huwuliraho ahabweeru hae sa! Nae wiina onyala ohumanya ohwaaduluhana hw'amaani kae?”