Read saamia Yobbu 28 Bible Online

Yobbu 28 - saamia bible

Yobbu 28

¹“Mubwadyeeri aliwo esiroombe si bayabamo efeesa, haandi abuundu yi boosera esaabbu.

²Esyuuma siyabwa ohutula mu loba, haandi omugasa kusaanguluswa ohutula mu makina.

³Abaandu bayaba efeesa bamalao esiirima, mani nibakeenda aasi mu siroombe mwoosi nibayaba mu siriima sya titititi amakina k'engaanga.

⁴Beekula emyaanda mu hooho yi baandu bataali; yi bawalukeenda bataamanyire, mani baboya emikoye yi baandu batoola, mani bachaaka ohwesuuba.

⁵Nae mu loba nimwo mu eby'ohulya bitula; nae aasi walyo ali koti yi omuliro kuli.

⁶Amakina komu loba elyo kalimo emyaalo midiidi ky'amaachi kafwaana bbulu, haandi kalimo olufu lw'esaabbu.

⁷“Libulao eyoni libburuha elimanyire engira yichia hu biroombe ebyo, haandi abulao engosya eyali niyibibweene.

⁸Ebisolo byaalaba haba sibibitaangaho hu ngira eyo; kata edalang'i yoosi haba siyayibitaho.

⁹“Abaandu baata amakina mu lwaanda lwoomu, mani basihula engulu nibachaakira aasi wacho.

¹⁰Batema emyaanda ohubita mu nyaanda, mani babona buli siindu sy'engaanga.

¹¹Beekalira esulo mani chaahaya ohusooha, mani esiindu syali nisyeekisa syaaboneha alafu.

¹²“Nae amakesi kanyoolehana yeena? Haandi obwiihalo bw'ohumanya buli yeena?

¹³Omuundu haba s'amanyire engira yikoolaho, haandi haba sikanyoolwa mu syaalo sy'abaandu balamu.

¹⁴Obusiba bw'amaachi buboola buti, ‘Haba sikali mweese,’ haandi enyaanja yiboola yiti, ‘Haba sikali mweese.’

¹⁵Haba sikanyala ohukulwa neende esaabbu, haandi ebbeyi yako siyinyala ohukeraanisibwa hu feesa.

¹⁶Soonyala ohukakeraania hu saabbu yihiramo obulai, oba kata hu byuuma by'ebbeyi y'aakulu muno.

¹⁷Esaabbu neende egilaasi haba sibinyala ohwaakana nako, oba sikanyala ohukulaasaniamo neende ebikoombe by'esaabbu ndai muno.

¹⁸Mu huba neende obuhoonyi, amakesi kahirira eyale muno amakina kalaangwa kati Koraali oba Marijaani; engaanga y'amakesi yiri aakulu ohuhira amakina ka rubbia.

¹⁹Topaasi yitula Etiopia haba soonyala ohuyikeraania hu makesi, oba waakakeraania neende esaabbu ndai muno.

²⁰“Nae amakesi katula yeena? Haandi obwiihalo bw'ohumanya buli yeena?

²¹Ebiindu bilamu byoosi haba sibinyala ohukabona, neende amayoni kabburuha kosi sikanyala ohukamanya.

²²Abbadoni neende emakoombe biboola biti, ‘Hwabulira neende amatwi keefwe olubweeru lu kadiiraho.’

²³“Nasaae amanyire engira yi koolaho, haandi amanyire obwiihalo bwako.

²⁴Olwohuba Nasaae abona ohwoola yi syaalo syaakama, haandi abona buli siindu siri aasi w'Ekulu.

²⁵Niyaberesa omuyaka obusito, haandi yaapiima amaachi neende esikero;

²⁶niyaholera efula elako, haandi yaaholera engira olumesu lw'ehubba;

²⁷yabona amakesi mani yaakalaangirira; yaakeemehao, mani yaakeesika.

²⁸Mani yaboolera omuundu ati, ‘Bona, ohutya Omwaami, ako niko amakesi; haandi ohutula mu syonoono nihwo ohumanya.’ ”