Read saamia Yobbu 29 Bible Online

Yobbu 29 - saamia bible

Yobbu 29

¹Yobbu haandi yachaaka ohwekanyiirisa hwae, mani n'aboola ati:

²“Eee, mba ndi mu ndaalo hale, koti lu ndabeechaanga Nasaae nasiniindire;

³obulafu bwae nibusiihosa hu mutwe kwaange, haandi nisiikeendera obulafu bwae niimbita mu siriima;

⁴mu biha bi ndali neende emyaandu, Nasaae niye owali owasyaange, haandi n'akayirira edaala lyaange;

⁵ow'Obunyala bwoosi niyali n'asisiiri naange, abaana baange nibasiindebodohaanie;

⁶nisinyoola amabeere maangi, haandi nisinyoola amafuta maangi ohutula mu misaala kyaange!

⁷Nindatulaanga niinjia mu siruwa sy'esiko, nindatekehaanga obwiihalo bwaange mu lwaanyi,

⁸abaraaga baambonaanga mani baanjikulira obweyaango, haandi abakofu basiingiraanga mani baamberesa oluyaali;

⁹abaana b'abatuki bawuleraanga mani bediira hu minwa kyaabwe;

¹⁰amakono k'abahunuufu keekalaanga, haandi enimi chaabwe chayaandaanga hu bisinini byaabwe.

¹¹Abaandu baambuliraanga, banaangaanga ow'ehabi, haandi nibambonaanga, basifukiiriraanga;

¹²olwohuba ndahoonyaanga omumanani waliraanga n'asaba obuhoonyi, neende omwaana mufwiirwe otaali neende omuundu omuhoonya.

¹³Ehabi ch'abaandu bandawoniaanga chanjichangaaho, haandi ebiindu bi ndaholeraanga abahasi bafwiirwe byabasaangasaanga mani nibeemba olw'esaangaalo.

¹⁴Ndaholaanga ebiindu biluungifu, mani byandebodoohania; obwadyeeri bwaange bwali koti esyefwaalo syaange oba esitaambaya syoohumutwe kwaange.

¹⁵Niise owali emoni ch'abawofu, haandi amakulu k'abalema.

¹⁶Ndali laatang'ene abamanani, haandi ndakoonyeresaanga ohumanya esifune sy'abaandu bataamanyire.

¹⁷Ndasihirisaanga amaani k'abaandu bataali abaluungifu, haandi ndakera balakasaanga ebiindu bibayaayire.

¹⁸Mani ndabaasa endi, ‘Njia ohufwiira mu siyu syaange, mani njia ohwingiiya endaalo chaange chibe koti omusenye,

¹⁹emisi kyaange kichia ohulaanda choole hu maachi, haandi olume lukwe hu masaga kaange esiro syoosi,

²⁰buli muundu yanjisaangamo oluyaali, haandi amaani kaange kemeedaanga buli ludaalo.’

²¹“Abaandu batekeeresaanga bi mboola, mani baliindaanga, ohuwulira bi ngeraka nibawuulere.

²²Nindamalaanga ohulomaloma, abulao omuundu wuundi owalomalomaanga haandi, emboosi chaange chabeengiraanga mu mwooyo.

²³Baniindaanga koti abaandu baliinda efula; mani nibaanjakaanira koti abaakaanira efula y'etoocho.

²⁴Ndabamweenyeraanga nibaweeremo emyooyo; enjeho chaange chabakobosaangamo amaani.

²⁵Ndabaheengeraangao esy'ohuhola, mani ndaaba koti omwiimirisi, ndabamenyamo koti omutuki mu maye kae, koti omuundu ogumya abaandu balira.