Read saamia Yobbu 30 Bible Online

Yobbu 30 - saamia bible

Yobbu 30

¹“Nae bulaanu bali ohumbayiraho sa, abaandu bayere hweese, ba ndahalekeerese laata yaabwe baahaya ohuba alala neende embwa chiliinda ebyaayo byaange.

²Buhoonyi siina bu ndahanyoolere ohutula mu baandu, b'amaani kawaamo bano?

³Olwohuba obumanani neende enjala y'amaani balumaluma emisi myoomu mu siparara.

⁴Beeya emisi haandi banoka amasaafu k'emisaala kyomu siino nibalya, haandi emboo niyibadiira, banyaanya emisi ky'emisaala ky'enjeyo.

⁵Beeruswa mu baandu; mani baboobbera embuungu koti bahoobbera omwiibi.

⁶Byabayiika ohumenyaanga mu ng'uungu, mu meena kayabwa mu loba neende mu nyaanda.

⁷Balirira mu siino koti esolo ndeende; mani beebusira alala aasi w'esiino.

⁸Abaana ba basiru, b'abaandu bataamanyihaane, banaalwa ehoba mani beeruswa hu syaalo.

⁹“Nae bulaanu ndeholere olweembo lwaabwe, ndi esiindu syohubayiraho yibali.

¹⁰Bandeebwaaba, mani beema eyale naange; haba sibahiinda ohufuucha amate nibaambonaho sa.

¹¹Olwohuba Nasaae yaandehere bihaya mani yaamalamo amaani, baangaluhaniire neende obwaalaba bwaabwe bwoosi.

¹²Hu lwaande lw'omuhono kwaange musaacha, yitulireyo ab'esiyiingwa, baasindikirisa mu moni, baandeka emiteego kyaabwe nibadaha ohuusihirisa.

¹³Beekala engira yaange, banyale ohumalao; nae abulao omuundu obakamya.

¹⁴Beediha koti abatulira mu liina hoongo; mani baaniaangula nibaambitaho.

¹⁵Ebiindu bitiisa biinjichira; oluyaali lwaange luweereo koti oluwuuchwa neende omuyaka, haandi obuyiinda byaange buhamyuuhireo koti ebireesi.

¹⁶“Nae bulaanu obulamu bumbweeremo; endaalo ch'esaando nicho echingwiireho.

¹⁷Amakuumba kaahomaka esiro syoosi, haandi obuchuuni bunjuuna haba sibwaakama.

¹⁸Bungwaaho neende amaani; mani bwandiira bwaahunya-hunya koti engubo.

¹⁹Nasaae yaasukuune mu madosi, mani ndi koti olufu oba ekohe.

²⁰Ewe Nasaae hwekweeda, nae haba siwungobolamo; nyema nae oningaala bulingaala.

²¹Weholere omwaalaba yi ndi; wunyayaala neende amaani kao koosi.

²²Wusingiise wangalamya, mani waaleha omuyaka kwambuucha, wanjuuya-njuuya mu muyaka kuwoola.

²³Eee, manyiire elalira endi ochia ohutusao obulamu bwaange, mani wunjire mu nyuumba yatekeherwa abalamu boosi.

²⁴“Nae lwasiina oseeta omuundu omalire ohusihirira, otanyala huhola esiindu syoosi, ohutusaho ohwekweeda obuhoonyi?

²⁵Haba sindekongooyera abaandu bali mu budinyu? Omwooyo kwaange haba sikwachunirwaanga abamanani?

²⁶Nae nindasuubiraanga ebiindu bilai, ebibi byoong'ene nibyo ebyanjolaangaho; nindaliindaanga obulafu, esiirima nisyo esyechaanga.

²⁷Omwooyo kwaange buli siha kuli mu bidinyu, haandi sikuwuchuluhaangaho; buli ludaalo obuchuuni bwoong'ene nibwo obuunjolaho.

²⁸Ngeendaana nihuluusire mu moni, nae omubasu haba sinikwo okukera; siingira ndeema mu sidiiyiha sy'abaandu, mani ndekweeda obuhoonyi.

²⁹Ndi koti owebulwa neende amabbwe, oba koti omwiicha w'amaudo.

³⁰Esihoba syaange sisamuuha, mani syachaaka ohubuluunguha, nae amakuumba kaange kabalire, kaasamba-busaamba.

³¹Enyembo chaange chohu naanga cheeholere ech'ohulira, haandi ekono ly'olwiika lwaange ly'abaandu balira.