Read saamia Yobbu 32 Bible Online

Yobbu 32 - saamia bible

Yobbu 32

¹Abasaacha badatu bano baakama ohukobola mu Yobbu, olwohuba Yobbu yali naamanyire omweene ati yali omuluungifu.

²Mani Elihu omwaana wa Bbarakeeli Omubbuusi, owomu nyuumba ya Raamu, yaanyoolera. Yanyoolereera Yobbu olwohuba Yobbu mweene niye owali niyeholaanga omuluungifu, mu bweyaango bwa Nasaae ohumulaanga omuluungifu.

³Haandi Elihu yanyoolerera abeecha ba Yobbu badatu olwohuba haba sibanyala ohukobola mu Yobbu, kata neende nibali nibaboola bati Yobbu yali mu syonoono.

⁴Bulaanu Elihu yali n'aliindire ohulomaloma neende Yobbu olwohuba yali naamuhira obuhuluundu.

⁵Nae Elihu niyabona ati abasaacha badatu bano haba sibanyala ohukobola mu Yobbu, yanyoolera.

⁶Mani Elihu omwaana wa Bbarakeeli Omubbuusi yakobolamo ati, “Ese ndi omuyere mu myaaka, nae eng'we muli abahuluundu; sakira ndeengereehe haandi ndaatya ohubaboolera ebiindu bi mbaasa.

⁷Mboola endi, ‘Leha emyaaka kilomalome, haandi abasaacha bahuluundu beekese amakesi.’

⁸Nae omwooyo kwa Nasaae kuli mu baandu, omuuya kw'Owobunyala bwoosi, nikwo okukera abaandu baamanya.

⁹Obuhuluundu haba sinibwo obuleeta amakesi, oba bwaakera omuundu yaamanya obwadyeeri.

¹⁰Sakira mboola endi, ‘Mundekeerese; lehe syesi mbooleho ebiindu bi mbaasa.’

¹¹“Bone, niindiriire emboosi cheeng'we, ndekeereese emboosi cheeng'we mbulire eby'amakesi bi chitulamo, nimubeere nimusiikoonyeresa eby'ohuboola.

¹²Mbatekeereese bulai bweene, nae, bone, abulao kata mulala hweeng'we onyalire ohuyiingania Yobbu, oba ohukobola mu mboosi chae.

¹³Mweliinde mani mutaboola muti, ‘Hunyoolere amakesi; leha Nasaae mweene amukobolemo, ataali omuundu.’

¹⁴Yobbu haba sabooleere ese, mani haba siinja ohumukobolamo neende enomanoma yeeng'we.

¹⁵“Bibahaire, abulao sibanyala ohukobolamo haandi; babula emboosi yohuboola.

¹⁶Mani ese niinde koti lu bauleerere, olwohuba haba sibanyala ohulomaloma, olwohuba beemere ao, baahaya ohukobolamo esiindu syoosi?

¹⁷Ese syesi njia ohubaaho neende singobolamo; ese syesi njia ohulomalomaho ebiindu bi mbaasa.

¹⁸Ndi neende ebiindu ebiingi muno eby'ohulomaloma, mbulira mu mwooyo kwaange esiindu nisisiindiha siti nomanome.

¹⁹Bone, omwooyo kwaange kubira koti efiini yi bataafuniiheho; kuli koti esibiihiro sy'efiini siyaaha, esiri aambi ohwaadiha.

²⁰Hoyere ohulomaloma, hu nyale ohuwuchuluha; hoyere ohubaaho neende esy'ohulomaloma mani ngobolemo.

²¹Haba siinja ohweehubbira eyiri omuundu yeesi haandi abulao omuundu yi njia ohukinia.

²²Olwohuba haba siimanyire ohukinia omuundu, ataali ao, Omuloongi waange achia ohuusaandya.