Read saamia Yobbu 33 Bible Online

Yobbu 33 - saamia bible

Yobbu 33

¹“Mani bulaanu, ewe Yobbu, bulira enomanoma yaange, haandi tekeeresa emboosi chaange choosi.

²Bona, ndi ohuchaaka ohulomaloma; olulimi lwomu hanwa waange nilwo olulomaloma.

³Emboosi chaange cheekesa obuluungifu bwaange, haandi bi nomanoma byadyeeri.

⁴Mwooyo wa Nasaae niye owanoonga, haandi omuuya kw'Obunyala bwoosi nikwo okuumberesa obulamu.

⁵Ewe noonyala, mani ngobolemo; tekeha bulai emboosi chao, mani weeme mu moni waange weeoseho.

⁶Bona, ewe naange mu moni wa Nasaae huli nasilala; ese syesi ndaloongwa ohutula mu loba.

⁷Bona, abulao esiindu syoosi esikera waandya; haba siinja ohuhusidoera.

⁸“Mubyadyeeri, mbao olomaloome nimbulira, haandi mbuliire ekono ly'emboosi chao.

⁹Oboola oti, ‘Mbulaho omusaango, abulao esyonoono si ndahola; ndi omwoleerefu, mbulaho esyonoono.

¹⁰Nae bona, Nasaae anyoola esifune syohunjolobya, yaanjira koti omusuku wae.

¹¹Nasaae aboya eminyororo hu makulu kaange, haandi atingaala buli siindu si hola.’

¹²“Bona, mu sino haba sooli owadyeeri. Njia ohuhukobolamo. Nasaae ahira omuundu yeesi.

¹³Lwasiina wekanyiirisa Nasaae, noboola oti, ‘Haba saakobola mu mboosi chaange’?

¹⁴Olwohuba Nasaae alomaloma mu ngira ndala, haandi mu yiindi, nae omuundu haba sasideebaho.

¹⁵Nasaae alomalomera mu bilooto, neende muhuboneherwa, abaandu nibakona endoolo ch'amaani, nibali ohuyiriitira hu bitaanda byaabwe,

¹⁶niyeekula amatwi k'abaandu, mani yabatiisa neende ohulagira hwae.

¹⁷Nasaae alomaloma nabo hu banyale ohulehana neende ebiholwa byaabwe bibi, mani abaakamye ohweefumya;

¹⁸abawonia ohuchia emakoombe, haandi yaawonia obulamu bwaabwe ohusihiriswa neende olugaanga.

¹⁹“Omuundu nalwaalira hu sitaanda syae, haandi yemeeda neende obuchuuni mu makuumba kae, ao Nasaae aba amukolola;

²⁰mani omuundu mulwaae omwooyo kumutule huhulya, haandi omwooyo kuhaye ohwekoomba kata ebyohulya bilai.

²¹Omubiri kwae kwang'aya muno mani kwaahaya ohumanyihana; mani amakuumba katula erwaanyi koti esaala.

²²Mubwadyeeri bweene, asudire aambi neende emakoombe, mani obulamu bwae bwaachia eyiri abo abaleeta ohufwa.

²³Niwiichuhana yaaba neende malaika wae, oyo omuwosera, mulala hu bamalaika ba Nasaae elifu, ohoonya abaandu ohumanya esiindu simuhoyera;

²⁴mani namukwiira esisa, n'aboola ati, ‘Muwonie ahaye ohwiiha emakoombe, munyoolere esiindu syohumuwonia;

²⁵leha omubiri kwae kukobolemo amaani koti ak'abaraaga; haandi omweene akobolemo amaani k'oburaaga’;

²⁶ao omuundu achia ohwiinamira Nasaae, mani Nasaae amukwiire esisa, mani yeeche mu moni wae neende esangaalo. Nasaae achia ohumutereesera ebiindu haandi.

²⁷Mani buli muundu achia ohuboolaanga mu lwichuule ati, ‘Ndahola esyonoono, mani ndaahola ebitahoyera, mani ndahaywa ohusaandisibwa koti lu hoyerwa.

²⁸Nasaae yanunuule ndaahaya ohuchia aasi emakoombe, mani obulamu bwaange bucha ohubona obulafu.’

²⁹“Bona, Nasaae niye ohola ebiindu bino byoosi, abiholera omuundu amahabi maangi,

³⁰ohuwonia omwooyo kwae kutacha emakoombe, hu anyale ohubona obulafu bw'obulamu.

³¹Bulaanu ewe Yobbu, tekeeresa ebiindu bi mboola, buleera, mani olehe nomanome.

³²Nooli neende esiindu syohuboola, mani wungobolemo; lomaloma, olwohuba ndeekoomba ohusibulira.

³³Ataali ao, tekeerese; buleera mani njia ohuhweekesa eby'amakesi.”