Read saamia Yobbu 35 Bible Online

Yobbu 35 - saamia bible

Yobbu 35

¹Haandi Elihu yalomaloma n'ateeba ati,

²“Obaasa oti sihoyera? Oboola oti, ‘Hoera ohuba endi mu moni wa Nasaae,’

³mani hu weemeo oteebe oti, ‘Bulai siina bu ndi nabwo? Ohutahola esyonoono hwaange huuhoonyere siina?’

⁴Njia ohuhukobolamo ewe neende abeecha bao bosi.

⁵Tingaala hu kulu, mani obone; Wehaliriihe amaleesi, obone koti lu kali aakulu muno ohuhuhira.

⁶Nooholere esyonoono, esyo simudiiraho sitye? Haandi ebyonoono byao nibyemeeda, omuholaho syonoono siina?

⁷N'oli omuluungifu, omumeedaho siina; oba anyoola siina ohutula mu muhono kwao?

⁸Ebibi byao bichuuna omuundu waasyo oli koti ewe, haandi obuluungifu bwao buhoonya abaandu basyo.

⁹“Olwohuba abaandu bekanyiirisa nibabafwiinyirira; balirira abali neende amaani babahoonye.

¹⁰Nae abulao oboola ati, “Nasaae omuloongi waange ali yeena, okera abaandu baaba neende esuubi mu biha byaabwe bidinyu,

¹¹otweekesa ohuhira ebisolo byohu syaalo, mani yatuhola hwaaba abakesi ohuhira amayoni kabburuha.

¹²Balira nibadaha obuhoonyi, nae Nasaae haba sabakobolamo, hulw'esuunga neende embi chaabwe.

¹³Mubwadyeeri Nasaae haba saawulira ohulira hubulamo obuhoonyi, oba Omunyala w'ebiindu byoosi yahudeebaho.

¹⁴Mani anaahuwulire atye ewe noboola oti, haba somubona? Haandi oti omusaango kwao kuli mu moni wae, haandi oti omuliindire!

¹⁵Nae bulaanu, olwohuba etima lya Nasaae haba sirisaandya, haandi oti haba s'adeeba muno hu bibi,

¹⁶Yobbu alomaloma ebiindu bitaalimo echamu, yemeeda ohulomaloma ebiindu bi ataamanyire.”