Read saamia Yobbu 4 Bible Online

Yobbu 4 - saamia bible

Yobbu 4

¹Elifaasi Omutemanaati yakobolamo ati:

²“Onanyoolera omuundu nanalomalomeho naawe? Nae wiina onawuulerere mani yaahaya ohulomaloma?

³Bona, wekeese abaandu abaangi muno, haandi waagumya abakata.

⁴Wakerakiraanga omuundu osidoyeerwe, mani omugumya yeema niyomiirire.

⁵Nae bulaanu mbao sihukwiireho, mani waabuleera buwuleera; si hudiiraho, mani weyendeherera.

⁶Obulamu bwao bweema mu hutya Nasaae, haandi obweesikwa bwao nibwo esuubi lyao.

⁷“Bulaanu baasaho, muundu siina otaali neende omusaango owali nasihiriiswe? Oba wabonaho yeena omuundu muluungifu nasukuunwe?

⁸Nae koti lu mbweene, abo abahola ebyonoono mani baaleeta ebidinyu, bosi banyoola ebidinyu.

⁹Nasaae abawuucha mani baasihirira, haandi mu tima lyae baakotao.

¹⁰Ohubuluula hw'edalang'i, ekono ly'edalang'i enjalaba, ameeno k'edalang'i njere kabbongoohe.

¹¹Edalang'i y'amaani yifwa olwohuba yibula esolo y'ohulya yi yiita, mani abaana bayo baasalaana.

¹²“Bulaanu emboosi yanjichira koti esyaama, mani yamoonyeserwa mu hutwi.

¹³Ndali nimbaasa hu biindu byamboneheere mu bilooto bya siro, ebyoola hu muundu endoolo ch'amaani nichimuyirire,

¹⁴obuti bwandiira, neende oluteengo, ebyakera amakuumba kaange koosi kaateengereha.

¹⁵Olumyesu lwaambita mu moni; mani efwiiri lyaanyema hu mutwe.

¹⁶Ndabona esiindu nisyeemere, nae sindanyala ohumanyirisa koti lu sifwaana. Efwaani yasyo yali mu moni waange; mani buli siindu syaabuleera chi, mani ndaawulira ekono liti:

¹⁷‘Omuundu woohufwa sa anyala ohuba omuluungifu mu moni wa Nasaae? Aliwo omuundu onyala ohuba omwoolerefu mu moni ch'Omuloongi wae?

¹⁸Kata mu bahalaabani bae, balimo bateesika, haandi yolobya malaika bae mu mbi chaabwe.

¹⁹Nae obaasa oti anyala ohweesika omuundu waloongwa mu loba, otula mu lufu, yi nyeende chilya sa.

²⁰Omuundu anyala ohuba omulamu echuli, nae engoloobe yoola n'afwiire; yaasihirira elalira mani wabulao omuundu omulomalomaho.

²¹Nae nibamala ohumuboya mu suuka, saaba amalire ohufwa, haandi naabulaho amakesi koosi?’