Read saamia Yobbu 40 Bible Online

Yobbu 40 - saamia bible

Yobbu 40

¹Omwaami yaboolera Yobbu ati,

²“Omuundu okoonyeresa ebyonoono anyala ohuyiingania ow'Obunyala bwoosi? Oyo oyiingana neende Nasaae, leha akobolemo.”

³Mani Yobbu naakobola mu Omwaami ati,

⁴“Bona, mbula oluyaali lwoosi, ndahahukobolamo siina? Haamuumbe omunwa kwaange, mani mbuleere-buwuleera.

⁵Malire ohulomaloma, haandi siinja ohukobolamo; ehabi lyoohubiri, haba siinja ohwemeeda ohulomaloma.”

⁶Omwaami yakobola mu Yobbu ohubitira mu sifuusye n'aboola ati:

⁷“Weng'aade omusiipi koti omusaacha; njia ohuhuteeba ebiteebo, bi ndaha wuungolemo.

⁸Koti lu oli otyo, oli ohuteema ohuboola oti niise otaali owadyeeri? Wahachaaka otye ohuheengera omusaango kuuhire mbwe hu weemeo obe owadyeeri?

⁹Ewe oliho neende amaani kahaakana neende aka Nasaae, haandi wahanyalaho ohwaaduluhana neende ekono liri koti elyae?

¹⁰“Mani wesaate neende amaani alala neende obuhunuufu; wefwaale oluyaali alala neende obuhoongo.

¹¹Yekesa etima lyao bitiirifu, mani otingaale hu buli muundu weniinia omale omusaandye.

¹²Tingaala hu buli muundu weniinia mani omuloongoyase; haandi oseenakire abonooni abuundu waabwe weene.

¹³Bafuunihe boosi alala mu loba; beekalire emakoombe.

¹⁴Mani syesi njia ohuhukinia haandi fukiirire, endi ohirire neende amaani kao.

¹⁵“Bona, efubu, yi ndaloonga koti lu ndahuloonga; Yilya obunyaasi koti eng'oombe.

¹⁶Bona, amaani kayo kali mu sibuno, haandi amaani kayo maangi kali mu misi kyohuunda yao.

¹⁷Yeemesaanga omuhiinga kwayo aakulu kuba koti omuseengese; emisi kyohu makulu kayo kyeeboya alala haandi ky'amaani muno.

¹⁸Amakuumba kayo moomu koti enjehe ch'omugasa, haandi amakulu kayo kali koti emitaliimbo ky'ebyuuma.

¹⁹“Niyo eyitaangira mu solo choosi chi Nasaae yaloonga; owayiloonga yeeng'ene niye onyala yaasuda aambi nayo n'adiirire olugaanga!

²⁰Olwohuba engulu chimeraho obunyaasi bu yilya haandu huungulu nihwo hu bisolo byoosi bibaira.

²¹Yikonaanga aasi w'ebisaala by'amawa, mani yeekisa mu bikada neende mu bidutu.

²²Yeyikama mu siiniha sy'ebisaala by'amawa; neende eby'emisaala kiyebodohaanie ekiri hu ndulo w'omwaalo.

²³Bona, omwaalo nikuhulukusa neende amaani haba siyitya; yiguma omwooyo kata neende omwaalo kwa Yorodaani kwahayihulukusira hu munwa.

²⁴Alihooyo onyala ohuyidiira niyibona, oba yaayiteka neende omuteego mani yaayifumita mu lyoolu neende oluyiingo?