Read saamia Yobbu 41 Bible Online

Yobbu 41 - saamia bible

Yobbu 41

¹ “Wahanyala ohuloba esisyuuhira-banaabi silaangwa siti lefiataani, neende elobo ly'eng'eeni, oba waboya olulimi lwasyo neende omukoye?

²Wahanyala ohwiingisa omukoye mu lyoolu lyasyo, oba waafumita olusaya lwasyo neende elobo?

³Siinyala ohuhwekweeda siti osikwiire esisa? Siinyala ohulomaloma naawe bulai siti osilehe?

⁴Siinyala ohuhola endagaano naawe mani syaasuubisa ohuba ohuhuhalaabanira endaalo choosi?

⁵Onyala ohubaya nasyo koti luwahabaya neende eyoni, oba onyala ohusiboyeraanga abahalaabani bao bahaana ohubasaangaasa?

⁶Abanaabi banyala ohusyoosanira? Abachurusi banyala ohusibaaka mani baasikusa?

⁷Onyala ohusifumita efumo mani lyaabita mu sihoba syalyo, oba waadomola omutwe kwasyo neende omuuma kufumita eng'eeni?

⁸Teemaho ohuyiigeeng'aho omuhono ohuyilwaania; obone n'oba waheebirireho ohutoochwa hwooba nonaatoochwe nayo, mani huboneho haandi nooba wahateemeho ohuyegeeng'aho ehabi liindi!

⁹Omuundu yesi-yesi obonaho sa esisyuuhira-banaabi ati, amaani kamubwechaangamo; mani abbwooyoha akwa sa aasi.

¹⁰Abulao omuundu mwaalaba onyala ohuteemaho ohusisimusa. Mani wiina onyala ohweema mu moni wasyo?

¹¹Wiina owamberesaho esiindu yi mba hoyera ohutuunga? Buli siindu siri hu syaalo syaange nisyo.

¹²“Haba siinyala ohubuleera hu bidiira hu makulu k'esisyuuhira banaabi, oba hu maani kasyo maangi, oba hu huboneha hwasyo hulai.

¹³Wiina onyala ohusifwaalula esyefwaalo syasyo sy'aakulu? Wiina onyala ohufumita eseero lyasyo liri amahabi kabiri?

¹⁴Wiina mweene owahanyala ohwaasamya esa ya chasyo chirimo ameeno katiisa ako?

¹⁵Omukoongo kwasyo kuliho amakaamba, akaambaana haandi amoomu koti ekina.

¹⁶Kali alala muno; mani kata emboo haba siyinyala ohukabitamo.

¹⁷Kaambaana mani kaadiirana alala; koomiiranaho mani haba sikanyala ohukabuhanisibwamo.

¹⁸Nisyaasamula n'enjeserye ch'omuliro chaaduhira sa muhanwa wasyo, haandi emoni chasyo chaahanya chiri sa koti elyuuba.

¹⁹Enjeserye chaaduha sa nichitula muhanwa wasyo; chiduumamo koti enjeserye ch'omuliro.

²⁰Omwoosi kudumuuha nikutula mu moolu kasyo, koti okutula mu ndamu yitokota oba koti ebikoha byaaduha.

²¹Omuuya ku yiyeera kuyaambya amaanda, haandi enimi ch'omuliro chitula muhanwa wasyo.

²²Ekosi lyasyo ly'amaani muno, mani buli muundu obukaanana nasyo atya butya.

²³Efunyiro ch'enyama chasyo chediira alala, mani chooma koti esichuma.

²⁴Omwooyo kwasyo mwoomu koti ekina, mwoomu muno koti olukina.

²⁵Nisisiingira sa siti, kata omuundu w'amaani maangi yesi atya; besiinduha mani baabula esy'ohuhola abeene.

²⁶Kata olugaanga lwahasifumita, haba silwahasinyayaala; kata efumo neende olusaale haba sibinyala ohuhusinyayaala.

²⁷Esyuuma haba siyisibona ohuba esiindu, haandi omugasa hu nisyo, kuli sa koti olusaala lwabola.

²⁸Olusaale haba silunyala lwaakera syeeruha; amakina k'epaanda kali sa koti yi ebikoha biri.

²⁹Endaausi chosi chiri sa koti ebikoha yi siri; haandi yirekeeresa sa kata amafumo ka baandu bayibbaayaho.

³⁰Amakaamba kasyo kali koti enjio ch'endamu enjoki; silambaalaanga esyeene siba koti olwaanyi lu baanihaangaho obule.

³¹Nisiingira mu nyaanja, yidubuula amaachi kaaba koti endamu yitokota; mani sikera enyaanja yeesera koti endamu y'amafuta.

³²Mu maachi kayibitamo, yireha enyuma omuhoosi kuli koti efwiinda ching'enaang'ena, onyala ohubaasa oti firo lya rachaari nilyo.

³³Abulao esiindu sifwanaana nasyo hu syaalo, esiloonge esitaali n'obuti.

³⁴Sirekeeresa buli sisolo syeniinia; nisyo esituki sy'ebisolo biteende.”