Read saamia Yobbu 6 Bible Online

Yobbu 6 - saamia bible

Yobbu 6

¹Yobbu yakobolamo ati:

²“Eee, ohusaanda hwaange huba hwakerwa hu latiri, neende ebidinyu byaange babwaaniha hu misaani!

³Biba byahahire omusenye kwohu nyaanja obusito; sakira emboosi chaange changuuye ohutula.

⁴Olwohuba obuyiingo bw'Owobunyala bwoosi bufumiite; mani ng'weere obusiba bwabwo; ebiindu bya Nasaae bitiisa biindeyaanjireho ohuunwaania.

⁵Esuhiri ndeende yinyala ohwaana niyiri neende obunyaasi bw'ohulya, oba esurusi yaahooha eyiri ebyohulya byao?

⁶Esiindu sibulamo echamu siinyala ohuliibwa nisitaluungirwemo omuunyu, oba esiindu sichalaafu siinyala ohubaamo echamu?

⁷Omwooyo kwaange haba sikudaha kata ohubidiiraho; yi ndi biri koti ebyohulya bi ndasira.

⁸“Mba ninyoola esiindu si ndi ohusaba, haandi Nasaae yaamberesa esiindu siindi ohwekoomba;

⁹mani siba nisisaangaasa Nasaae, yahanjitire byaahira, mani yaaleha omuhono kwae mani kwaheenga kwaamalao!

¹⁰Sino syahaangumye omwooyo; mubuchuuni bwaange ndahasaangaalire muno; olwohuba haba sindekaanire emboosi chi Omwoolerefu alagira.

¹¹Maani siina ka ndi nako, mani hundemeede ohuyiindira? Obulamu bwaange buliba butye hu nyale ohwesimiirisa?

¹²Obaasa oti amaani kaange kali koti ak'amakina, oba omubiri kwaange kwaaba koti okwebichuma?

¹³Mubwadyeeri bweene, mbulamo obuhoonyi bwoosi, haandi abulao esiindu siinyala.

¹⁴“Oyo otahoonya owaasye naali mu bidinyu yebwaaba ohutya ow'Obunyala bwoosi.

¹⁵Nae eng'we basyaange, muumbachirisa koti emyaalo, kihama mu siminyu,

¹⁶ekimaliya mu munyiti, mani amakina k'efula keemamo.

¹⁷Nae omubasu nikutula, nikakotao; esyaalo nisibala, nikasaanguluha mani kakotao ohutula yi kali.

¹⁸Bawalukeendwa bakota nibakoonya yi chisoohera; bang'alaala mu siparara, mani basihirira.

¹⁹Bawalukeenda be Tema bachitingaala, abakeendaani be Seebba baba neende esuubi.

²⁰Bawamo amaani olwohuba bali nibeesikire bihaya; nibatachoolaho, bahaywa esy'ohuhola.

²¹Ewe wesi wungaluuhaniire otyo; waabona ebidinyu byaange, mani waatya.

²²Mani mboolereho endi, ‘Mberese esiyaanwa’? Oba endi, ‘Ohutula hu myaandu kyao, mberese asowa’?

²³Oba endi, ‘Nunulwe ohutula mu mahono k'abasuku baange’? Oba endi, ‘Nduse mu mahono k'abo abafwiinyirira’?

²⁴“Njekese, mani njia ohubuleera; leha manye koti lu ndahola bubi.

²⁵Emboosi ndai chiimala! Nae amayiingi kao kahoonya siina?

²⁶Obaasa oti nomanoma bihaya, emboosi ch'omuundu obula esuubi oti muyaka sa?

²⁷Ewe wahobbeere omwaana mufwiirwe eha, haandi onaadamo owaasyo onyale ohumunyoolamo engaanga.

²⁸“Nae bulaanu, tingaala mani wuumbone; olwohuba siinja ohuhubacha n'obona.

²⁹Hwekweeda, kaluuhania ebibaaso, leha esidinyu sitaholehana. Kaluuhania ebibaaso, omusaango kwaange kwoolere.

³⁰Hu biindu bi nomanoome, biliwo ebitaali ebyadyeeri? Obaasa oti siinyala ohwaawula esilai neende esyonoono?