Read saamia Yobbu 7 Bible Online

Yobbu 7 - saamia bible

Yobbu 7

¹“Obulamu bw'omuundu bw'ohuhalaabana y'amaani hu syaalo, haandi endaalo chae chiri koti endaalo cho mupakasi.

²Koti omukulwa yekoomba ohuwuluhira mu siiniha, haandi koti omuwaambe asuubira omusaara kwae,

³syesi nilwo lu ndi, ngabana emyoosi kitaalimo obuhoonyi, ebiro by'obuchuuni nibyo omukabo kwaange.

⁴Nindeeyalisa aasi ohukona, ndeteeba endi, ‘Ndahasiingire liina?’ Nae esiro simalaanga siba esileeyi, mani mbarana ohwoola lu buhya.

⁵Omubiri kwaange kweechulamo enyeende neende obuchaafu; esihoba syaange syoomerana, mani syaadihanaanga sa buli siha.

⁶Endaalo chaange chiiruha bwaangu ohuhiraho ewuusi y'omukuruduumu kw'omusooni, haandi chiwaao abula esuubi lyoosi.

⁷“Ewe Nasaae, yichulisa oti obulamu bwaange buli koti omuuya; emoni chaange haba sichahaboneho esiindu silai haandi.

⁸Emoni ch'oyo owumbona bulaanu haandi haba sichahamboneho daawe; abo abahangoonye, bahanyoole nindakotao hale.

⁹Koti ebireesi biwaao mani byaakotao, nilwo lu oyo owiiha emakoombe atachia ohutulao;

¹⁰haba sakobola mu nyuumba yae, oba abaandu bayabeechaanga nabo haba sibamwichulisa haandi.

¹¹“Sakira bulaanu haba siinja hubuleera; njia ohulomaloma ebidinyu biri hu myooyo kwaange; njia ohwekanyiirisa obuchuuni buli hu myooyo kwaange.

¹²Obaasa oti ndi enyaanja, oba okunani kwomu nyaanja, hu wuundeeho omuliindi?

¹³Nae nimboola endi, ‘Leha ndeyalise hu sitaanda syaange mani mbuluuheho, endi obuliri bwaange bunahendeeseho ohwekanyiirisa hwaange,’

¹⁴mani wuusiindusa neende ebilooto ebiindu biimbonehera byandiisa,

¹⁵sakira heengao endi bilai ohumikwa ndaafwa ohuhira ohudoong'a amakuumba mahaya.

¹⁶Mbona endi obulamu bwaange bubulamo obuhoonyi; haba siinjia ohuyiindira endaalo choosi. Ndehe mbe, olwohuba obulamu bwaange bw'ebiha bidiidi sa.

¹⁷Omuundu otaaliho koti lwaali, lwasiina omubaasaho muno,

¹⁸n'omulaambula buli buhya, haandi wamuteema buli siha?

¹⁹Wahoole yeena ohutaandusaho emoni chao, oba ohuundeha mani ndaamiraho amate?

²⁰Niimba niholere esyonoono, mba huholereho syonoono siina, ewe oliinda abaandu? Lwasiina wunjooma buli siha? Lwasiina ndeholere omusiigo musito yooli?

²¹Lwasiina siwundeheramo ebihyaamu byaange mani waatusao esyonoono syaange? Olwohuba bulaanu njia ohufwa mani ndeeyalise mu loba; ochia ohungoonya, nae njia ohuba ningotereo.”