Read saamia Esabbuli 103 Bible Online

Esabbuli 103 - saamia bible

Esabbuli 103

¹Ewe omwooyo kwaange, fumia Omwaami; haandi buli siindu esiindimo, fumia eliita lyae lyoolerefu!

²Ewe, omwooyo kwaange, fumia Omwaami, haandi oteebirira ebilai byoosi bi ahola.

³Niye ohuleheramo ebyonoono byao byoosi, owonia bulwaae bwao bwoosi.

⁴Obulamu bwao yabuwonia ohutula mu buko, haandi yahuberesa ehabi olw'obuheeri bwae neende esisa syae.

⁵Obulamu bwao abwiichusa ebiindu bilai, oburaaga bwao n'abukobosao bwaaba obw'amaani koti obw'eeswi.

⁶Omwaami wadyeeri, aheenga emisaango, abafwiinyirirwa nibahira.

⁷Niye oweekesa Musa engira chae, haandi yeekesa Abaisiraeli ebiholwa byae.

⁸Omwaami w'esisa niye haandi w'obuheeri, haba s'anyoolera bwaangu, haandi yeechula obuheeri.

⁹Haba s'achiiririra neende ohwoolobya, haandi yabiiha etima endaalo choosi.

¹⁰Haba s'atusaandya koti lu huhoyera daawe, noomba yatutuunga koti lu biholwa byeefwe bibi bihoyera.

¹¹Koti lu ekulu liri aakulu w'esyaalo muno, olwo nilwo lu buheeri bwae bwaakama ohuba obuungi eyiri abo abamwiisamo oluyaali.

¹²Koti lu ebukwe yiri eyale neende emuumbo, olwo nilwo lu atuleheramo ebyonoono byeefwe, mani byaaba eyale naafwe.

¹³Koti lu laatang'ene baana aleheramo abaana bae, olwo nilwo lu Omwaami akwiira esisa abo abamwiisamo oluyaali.

¹⁴Olwohuba Omwaami amanyire koti lu huli; yeechulisa ati huli olufu.

¹⁵Nae omuundu, obulamu bwae buli koti obunyaasi; ahula yaamuliha koti esimuli syomu siino.

¹⁶Omuyaka kusiwuucha mani syahooha, mani abuleo omuundu osibonaho haandi daawe.

¹⁷Nae obuheeri bwa Nasaae bw'endaalo choosi, Omwaami akwiira esisa, abo abamwiisamo oluyaali, haandi obulai bwae bw'endaalo choosi.

¹⁸Yeekesa abo abaliinda endagaano yae haandi abeechulisa ohuloondakana neende amalako kae buli siha.

¹⁹Omwaami yata obwiihalo bwae bwomiifu Muukulu, haandi obwaami bwae bwoola buli abuundu.

²⁰Eng'we bamalaika bae, fumie Omwaami, eng'we abahunuufu abahola by'adaha, abawulira emboosi yae!

²¹Eng'we amaye kae, fumie Omwaami, abahalaabani bae abahola by'adaha!

²²Eng'we ebiloonge byae, fumie Omwaami, mu bituundu bi atuka byoosi. Ewe omwooyo kwaange, fumia Omwaami.