Read saamia Esabbuli 108 Bible Online

Esabbuli 108 - saamia bible

Esabbuli 108

¹Ewe Nasaae, ese ndi neende obwomiifu bumala! Njia ohweemba nihufumia! Ewe omwooyo kwaange, simuha!

²Simuha, ewe eduungu lyaange neende obuhana bwaange! Njia ohusimusa elyuuba.

³Njia ohuhweebasa ewe Omwaami, ni ndi mu baandu. Njia ohuhufumia mu byaalo.

⁴Obuheeri bwao buli aakulu muno ohwoola muukulu; obweesikwa bwao bwoola hu bireesi.

⁵Ewe Nasaae, kinisibwa muno ohuhira ekulu, oluyaali lwao lwiichule hu syaalo syoosi.

⁶Wulira ohusaba hwaange, otuwonie neende obunyala bwao, abaandu bao ba waheera muno banyale ohununulibwa.

⁷Nasaae yalomaloma naali mu bwiihalo bwae bwoolerefu, n'aboola ati, “Njia ohuyiingira mani ngabulemo Sekemu mani ngabire abaandu baange Ehooho lya Sukoti.

⁸Gileadi syaalo syaange, neende Manaase syosi syaange; Efuraimu nisyo ekofia yaange y'echuma Buyudaaya nisyo omukwajo kw'oluyaali kwaange.

⁹Moabbu nisyo olukaraaya lwaange lw'ohweeyoseraho Edomu nisyo sinyanihaho ebiraato byaange; Mu Filisitia nimwo muhuumulira neende amaani ninyingiire.”

¹⁰Ewe Nasaae waange, wiina mweene ochia ohunjira mu siko sy'amaani? Wiina mweene owahanjose mu Edomu?

¹¹Ewe Nasaae, otujwaang'iire elalira? Haba sosikeendera alala neende amaye keefwe?

¹²Tuhoonye ohulwaania omusuku weefwe; olwohuba obuhoonyi bw'abaandu haba sibuhoonya daawe.

¹³Nae Nasaae n'ali hu lwaande lweefwe, huchia ohuba neende amaani. Niye ochia ohuyiingira abasuku beefwe.