Read saamia Esabbuli 132 Bible Online

Esabbuli 132 - saamia bible

Esabbuli 132

¹Ewe Omwaami, yichulisa Daudi neende ebidinyu byoosi bi yesimiirisira.

²Yichulisa koti lu yahweechubira, ewe Omwaami neende obweyamo bu yahola y'oli, ewe ow'Obunyala Nasaae wa Yakobbo n'aboola ati,

³“Haba siinjia ohwiingira mu nyuumba yaange oba ohuniina hu sitaanda syaange,

⁴sindahakona kata ohukuunuhaho daawe

⁵ohwoola lu ndahanyoolere Omwaami abuundu wohumenya, abuundu yi ow'Obunyala Mweene wa Yakobbo yi yahamenye.”

⁶Bona, nihwali Bbetilehemu, hwawuliraho hu Esanduuku ly'Endagaano, hwalinyoola mu mikuunda kya Yaari.

⁷Hwaboola huti, “Lehe huchie mu nyuumba y'Omwaami; hwiinamire aiteeni sy'alaambisaho amakulu kae.”

⁸Ewe Omwaami, siingira mani wiichie abuundu y'owuluuhira, obe mu sanduuku y'Endagaano, esilolero sy'obunyala bwao.

⁹Leha abalaamisi bao baholeenge buli ludaalo ebiluungifu, haandi leha aboolerefu bao basangaale olw'ohwehoya.

¹⁰Olwohuba omuhalaabani wao Daudi, otafudatira omudoole wao.

¹¹Omwaami yechubira Daudi niyomiisa si yasuubisa sy'atachia hukaluuhaniaho daawe: “Njia ohuhola mulala hu baana bao beene, mwiihase hu sisaala syao sy'obutuki.

¹²Abaana bao nibanaliindeenge endagaano yaange, neende ebilagiro byaange bi ndahabeekese, kata neende abaana baabwe bosi bahehaleenge hu sisaala sy'obutuki bwao endaalo choosi pe.”

¹³Olwohuba Omwaami niye omweene owedoolere Siyooni; omweene asyekoombere ohuba obumenyero bwae.

¹⁴Omweene aboola ati: “Ano nuwo abuundu yi njia ohuwuluuhiraanga endaalo choosi; ano nuwo yi siimire ohubechaanga buli ludaalo.

¹⁵Njia ohuberesaanga Siyooni ebiindu byoosi bi sidaha; njia ohwiikusa abamanani basirimo boosi neende ebyohulya.

¹⁶Abalaamisi basyo, njia ohubaberesa ehabi mu buli siindu si bahola, neende aboolerefu basirimo bahasangaaleenge olw'ohwehoya.

¹⁷Ao mulala hu beechuhulu ba Daudi; niwo yi ndahamuholere omutuki waange mudoole.

¹⁸Abasuku bae ndahabadiisye esoni. Nae omweene oyo njia ohumufwaasa ekofia y'obutuki yimesamesana.”