Read saamia Esabbuli 135 Bible Online

Esabbuli 135 - saamia bible

Esabbuli 135

¹Kinie Omwaami! Kinie eliita lyae, eng'we abahalaabani b'Omwaami,

²eng'we abeema mu nyuumba y'Omwaami, abeema mu lwaanyi lw'enyuumba ya Nasaae weefwe.

³Kinie Omwaami oyo, olwohuba mulai niye; yeembe nimufumia eliita lyae, olwohuba w'esisa niye.

⁴Olwohuba Omwaami omweene yedoolera aba Yakobbo, abaandu ba Yisiraeli ohuba abae beene.

⁵Manyire endi, Omwaami weefwe muhunuufu niye, muhunuufu ohira banasaae baandi boosi.

⁶Buli siindu si Mwaami adaha asihola yibe Muukulu oba hu syaalo, yibe mu nyaanja oba aasi w'ebusiba bweene.

⁷Omwaami asiingisa amaleesi ohukatusira yi syaalo syaakama; aleeta emesu mu muyaka kw'efula, haandi otusayo omuyaka ohutula mu sibiihiro syae.

⁸Mu Misiri, yeeta ebyaamberi byoosi eby'abaandu neende eby'esolo siduubaanie.

⁹Eyo Misiri yaholerayo ebyamayia neende ebiwuukisa ohusaandya Faraao alala neende abahoongo bae boosi.

¹⁰Yasihirisa ebyaalo biingi muno yeeta abatuki b'amaani muno:

¹¹Sihooni, omutuki w'Abaamoori, Ogu, omutuki wa Bbasani, neende obutuki bwa Kanani bwoosi.

¹²Esyaalo syaabwe yasiberesa abaandu bae. Yasiberesa Abaisiraeli basituke.

¹³Eliita lyao, ewe Omwaami, liyiindira endaalo choosi, efuma yao, ewe Omwaami, yahechuliswe endaalo choosi pe.

¹⁴Olwohuba Omwaami, ochia ohwaabina abaandu bae; achia ohukwiiraanga esisa abahalaabani bae.

¹⁵Ebiloongaloongwe byomu byaalo byaholwa mu feesa neende mu saabbu; byaholebwa neende abaandu.

¹⁶Biriho eminwa, nae haba sibilomaloma, biriho emoni, nae haba sibibona.

¹⁷Biriho amatwi, nae haba sibiwulira; haandi sibiyeera daawe.

¹⁸Mani ababihola neende ababyeesika bahafwaane nabyo.

¹⁹Eng'we abaandu ba Yisiraeli, mukinie Omwaami! Eng'we ab'enyuumba ya Arooni, mukinie Omwaami!

²⁰Eng'we ab'enono ya Leefi, mukinie Omwaami! Eng'we abeesa mu Mwaami oluyaali, mukinie Omwaami!

²¹Omwaami yamenya mu Yerusalemu, mumukinie nimuli mu Siyooni! Kinie Omwaami!