Read saamia Esabbuli 138 Bible Online

Esabbuli 138 - saamia bible

Esabbuli 138

¹Ewe Omwaami, hweebasa neende omwooyo kwaange kwoosi; nyemba nihukinia mu moni wa banasaae.

²Nyinamira nitingaalire enyuumba yao njoolerefu, mani nindeebasa eliita lyao olw'obuheeri bwao butaakama neende obweesikwa bwao; olwohuba wakinia ohuhiraho esiindu syoosi eliita lyao neende emboosi yao.

³Hu ludaalo lu ndalaangiraho, wangobolamo, wameedamo amaani mani ndomiira.

⁴Abatuki boosi ab'esyaalo bahahukinie, ewe Omwaami, olwohuba bawuliire by'olomaloma.

⁵Baheembe hu biindu by'ohola, olwohuba oluyaali lw'Omwaami luhunuufu nilwo.

⁶Kata Omwaami ali aakulu muno, adeeba hu baloonga nae abehuduumbasa abebwaaba.

⁷Nae kata ni ndi mu masira maangi katye, wuniindaanga ni ndi omulamu. Olwaaniaanga abasuku baange baalaba, mani niwumonia neende amaani kao.

⁸Omwaami yahoserese bi yaasuubisa; olwohuba Ewe Omwaami, obuheeri bwao bw'endaalo choosi pe. Otasukuna omulimo ku wachaakisa.