Read saamia Esabbuli 139 Bible Online

Esabbuli 139 - saamia bible

Esabbuli 139

¹Ewe Omwaami, wahebera mani wuumanyire bilai!

²Ninjihala oba nisiingira omanya; neende bi mbaasa obimanyira eyale.

³Ningeenda oba nindeeyalisa, wuumbona, buli siindu si hola osimanyire.

⁴Kata neende nitachaaka ohulomaloma, bi njia ohulomaloma oba omalire ohubimanya.

⁵Wundebodoonia hu buli lwaande; wuniinda neende amaani kao.

⁶Ohumanya hu waamanyamo huumbukisa muno; huuhira haba sinyala ohuhumanyirisa daawe.

⁷Ese ndaheeruhira yeena hu nyale ohuhweekisa Ewe? Yeena bweene yi ndaheruhire y'otali?

⁸Niniina Muukulu, oliyo; nindeyalisa emakoombe, oliyo.

⁹Kata nibburuha ndaachia ndoola ebukwe, kata ninyambuha enyaanja ndaachia ndaamenya mu bituundu by'eyale muno,

¹⁰eyo yosi oliyo ohuunyimirira, oliyo ohuhoonya.

¹¹Kata ndahasaba esiirima ohuungisa oba obulafu buundebodoohania bube esiirima,

¹²nae kata esiirima yooli sisimali daawe, haandi esiro silafu koti esideete; olwohuba hu ewe esiirima neende obulafu biri nasilala.

¹³Niiwe owaloonga ebituundu by'omubiri kwaange byoosi; niiwe owamuumba mu nda ya maama.

¹⁴Njia ohuhukinia olwohuba ndaholwa mu ngeri yitiisa haandi eyiwukisa. Buli siindu si wahola siwukisa! Wuumanyire bulai bweene.

¹⁵Amakuumba kaange okamanyire bulai, neende engeri yindaholebwamo mu bweekisi, mani ninoongerwa aasi mu loba.

¹⁶Wambona nisisiiri ohwiibulwa. Endaalo chambereswa, choosi wachandiika mu sitabo nichisisiiri kata ohuchaaka.

¹⁷Ewe Nasaae, ebibaaso byao bidinyu muno ohumanya; haandi biingi muno!

¹⁸Ni mba ninyala ohubibala, bihira omusenye obuungi. Nisimuha, mba sisiiri naawe.

¹⁹Ewe Nasaae, ndaha wiite abahola-mbi, neende abadaha ohwiidisa amabaanga baanduleho.

²⁰Bahulomalomaho bubi, abasuku bafwoola eliita lyao.

²¹Ewe Omwaami, haba sindaha abahusyuula; sindahiraho elalira abahulwaanisa.

²²Haba sibadahiraho elalira; mbalaanga abasuku baange.

²³Mani, ewe Nasaae, hebere omwooyo kwaange. Ndeemeho mani omanye ebibaaso byaange.

²⁴Bona omanye nikali mbwe ndimo obubi, mani wuunyimirire mu ngira y'endaalo choosi!