Read saamia Esabbuli 144 Bible Online

Esabbuli 144 - saamia bible

Esabbuli 144

¹Fumie Omwaami, olwaanda lwaange! Oyo niye owanjekesa ohulwaana haandi niye owandekeha njie mu biita.

²Oyo niye olwaanda lwaange haandi niye owuunwaanilira, oyo niye obweyikamo bwaange haandi omuwonia waange, oyo niye yi ndeesika ohuumberesa omuleembe. Oyo niye otechaanga mu makulu kaange ebyaalo byoosi.

³Omwaami, abaandu balifwa sa bahuchuunaho siina, hu weemeo obadeebeho; abaandu abalifwa-bufwa, mbwe hu hubachuunirwe?

⁴Abo bali sa koti omuuya mulala; obuyiindifu bwaabwe buli koti obw'esiiniha sibitao.

⁵Ewe Omwaami, taandulamo ekulu mani wiihe aasi; diira hu ngulu, mani omwoosi kunioohe.

⁶Leeta enjeserye ch'emesu mani obone koti lu basuku bao basalaana; lasa obusaale bwao mani beeruhe echa ndeehole endye.

⁷Weeneerese nooli aakulu eyo, wuumonie haandi wuunjabine mu lusiba lw'amaachi luno, wuunduse mu bunyala bw'abateende,

⁸abatalomalomaanga obwadyeeri daawe haandi abechubira eby'obubacha.

⁹Njia ohuhweemberaanga olweembo luyaaha, ewe Nasaae; nihuhubbira obuhana bw'eesya ehumi.

¹⁰Ewe niiwe oberesaanga abatuki ohuyiingira haandi niiwe onunulaanga Daudi omuhalaabani wao.

¹¹Njabine haye ohwiitwa neende abasuku baange baalaba; wuununule wuunduse mu bunyala bw'abateende, abo abatalomalomaanga obwadyeeri daawe haandi abechubira eby'obubacha.

¹²Mani abaana beefwe basyaani bahule bulai babe koti ebimera mu buraaga bwaabwe. Abaana beefwe bahaana babe koti esiiro ngololofu echoombahahwo edooho.

¹³Ebyaaki byeefwe bichulemo ebirime bya buli embya. Amakoondi kali mu njairo cheefwe keebulane mu elifu neende elifu.

¹⁴Ebyaayo byeefwe bihoya beebulana bulai nimubulamo esiduumya oba esifwiisa. Hubuleo ohuubba embuungu hu ngira cheefwe!

¹⁵Esyaalo siri neende ehabi, esyo esiri neende ebiindu biri bityo. B'ehabi abaandu ba Nasaae waabwe niye Omwaami!