Read saamia Esabbuli 19 Bible Online

Esabbuli 19 - saamia bible

Esabbuli 19

¹Ekulu lituumbula oluyaali lwa Nasaae; nae ebbaanga lyeekesa ebiindu bi yahola.

²Buli ludaalo lutulayo lweekesa emboosi yae, haandi buli siro situlayo syeekesa amakesi kae.

³Yibulao enomanoma noomba emboosi; ekono lyaabyo haba siriwuliirihana;

⁴nae amahuluundu k'ekono lyabyo koola mu syaalo syoosi. Haandi emboosi chabyo, amakono kabyo koola yi syaalo syaakama. Nasaae yoombahira elyuuba edaala aakulu mu bbaanga,

⁵elitulayo neende siroonyo koti odehiisye n'atula mu siseenge syae, haandi koti lu omusaacha mwiiruhi yeeruhaanga embiro chae neende esangaalo.

⁶Elyuuba litulira hu lwaande luundi lw'ekulu, mani lyeebodoohania ohwoola hu lwaande luundi. Haandi sibulao esiindu si nyala ohwekisa obulafu bwalyo.

⁷Amalako k'Omwaami moolerefu niko, kakobosaanga amaani mu muundu; ebilagiro by'Omwaami byadyeeri nibyo, bikesiyasaanga otaamanyire.

⁸Amalako k'Omwaami malai niko, kasangaasaanga omwooyo; ebilagiro by'Omwaami byoolerefu nibyo, bihosaanga ebibaaso.

⁹Ohwiisa oluyaali mu Omwaami hulai nihwo, hwahayiindire endaalo choosi; ebilagiro by'Omwaami byadyeeri, haandi biluungifu nibyo.

¹⁰Byekoombwa ohuhira esaabbu, kata esaabbu yihiramo obulai kanyunyuula ohuhira obuuhi obuuhi budoonya ohutula mu bisasala by'enjuhi.

¹¹Mani haandi ebilagiro byao ebyo nibyo ebilabula omuhalaabani wao; muhubyooseresa mulimo omukabo muhoongo.

¹²Nae wiina mweene onyala ohubona obudoondobanu bwae? Omwaami, monie ebyonoono byeekisa!

¹³Haandi wonia omuhalaabani wao mu bibi byekoombwa byosi; otakanya byaanduka! Mani njia ohubulaho omusaango, haye ohuhola esyonoono sihoongo.

¹⁴Emboosi chaange neende ebibaaso by'omwooyo kwaange, bihoya byaafukiirirwa mu moni wao, ewe Omwaami, olwaanda lwaange haandi omuwonia waange.