Read saamia Esabbuli 22 Bible Online

Esabbuli 22 - saamia bible

Esabbuli 22

¹Nasaae waange! Nasaae waange! Lwasiina wunjwaang'ire? Lwasiina oli eyaale muno n'otadaha ohuuhoonya, haandi n'otawulira amaliro kaange?

²Ewe Nasaae waange, hulirira esideete, nae haba siwungobolamo; nae esiro syoosi, haba singona ndaawuluuha.

³Nae Nasaae, niiwe Omwoolerefu weeng'ene, niiwe weeng'ene yi Yisiraeli yifumia.

⁴Niiwe yi bakuuka yeefwe beesika; bahweesika, mani weechia waabawonia.

⁵Bahulirira, mani bawonisibwa; bahweesika, mani waahaya ohubajwaang'a.

⁶Nae ese haba si ndi koti omuundu, ndi esibuuha; si baandu banyeka, haandi si baandu balekeeresa.

⁷Abo boosi abaambona baanduulira, banjoomya eminwa, mani baayuuya emitwe kyaabwe nibaboola bati;

⁸ “Yeesika Omwaami; mani leha Omwaami amuwonie! Leha amwaabine, olwohuba amusangaaliramo!”

⁹Nae niiwe owandusa mu nda ya maama, niiwe owaniinda bulai nisiinuuna amabeere ka maama.

¹⁰Niiwe yi ndeesika ohutulira elalira hu ludaalo lundeebulirwaho, haandi ohutula hu ludaalo lu njibulirwaho, niiwe Nasaae waange weeng'ene.

¹¹Mani otaba eyale naange, olwohuba ebidinyu biri aambi haandi abulao owuundi onyala ohuhoonya.

¹²Abasuku baange bali koti esurusi nyiingi chindebodoohaanie, esurusi ch'amaani cha Bbasani chindebodoohaanie;

¹³baasaamie eminwa kyaabwe nikiiningaalire, bali koti edalang'i yihayuuhe eyihuumulana.

¹⁴Mbweeremo amaani, ndi koti amaachi kabachuhire aasi, haandi amakuumba kaange koosi kasoboheyo mu nyiingo; omwooyo kwaange kuli koti obubbaani kusaanguluuhire mu sirifu syaange;

¹⁵amaani kaange komeraane koti olucho, haandi olulimi lwaange lunyaandire mu sidahula; wuundehere fwiire aasi mu lufu.

¹⁶Eee, embwa chiri aambi naange; esidiiyiha sy'abahola-mbi sindebodoohaanie; bafumiite amahono neende amakulu

¹⁷Amakuumba kaange koosi katulireyo mani nyala ohukabala koosi, abasuku baange baandi banyekera emoni;

¹⁸bali ohukabanamo engubo chaange, boobba eha hu ngubo chaange.

¹⁹Nae ewe Omwaami, otaandetusaho! Niiwe obuhoonyi bwaange, yanguyaho wuhoonye.

²⁰Monie olugaanga, monie sikolola-muhira eyiri embwa.

²¹Monie takwa mu muuhanwa kw'edalang'i, omwooyo kwaange kubweeremo amaani, kuwonie enjika ch'emboko!

²²Njia ohufumia eliita lyao eyiri abeebulanwa baange; mu lwichuule lw'abaandu njia ohuhukinia:

²³Eng'we abatya Omwaami, mumufumie! Eng'we abaana ba Yakobbo mweesi, mumwiisemo oluyaali, eng'we abaana ba Yisiraeli, mumwiisemo oluyaali!

²⁴Olwohuba haba salekeeresaanga oba yebwaaba ebidinyu by'omuundu wusaanda; oba ohumufudatira, haba s'abasyuula, nae awulira amaliro kae.

²⁵Niiwe owukeraanga niihufumia ni ndi mu lwichuule lw'abaandu; njia ohwolereresa esyeyamo syaange mu moni waabo abamutya.

²⁶Abamanani bachia ohulya mani beekute; abo abakoonya Omwaami bachia ohumufumia. Leha bayiindire endaalo choosi!

²⁷Esyaalo syoosi sichia ohwiichulisa mani abaandu basyo bakaluhe eyiri Omwaami; haandi abaandu bomu syaalo boosi bachia ohwiinamira Omwaami.

²⁸Olwohuba Omwaami niye omweene bunyala, haandi niye owutuka ebyaalo byoosi.

²⁹Abaandu balya byoosi bi badaha, baamala bamwiinamira; Eee, abehuduumbasa bohu syaalo boosi bachia ohumwiinamira; neende abo boosi abachia ohufwa bachia ohumwiinamira, neende oyo yesi owutanyala ohubao omulamu hulwae omweene.

³⁰Abaandu baheebulwe bachia ohumuhalaabanira; abaandu bachia ohweekesa olwiibulo lwiicha ebidiira hu Omwaami,

³¹mani bayaalire abaandu basisiiri ohwiibulwa obuwonia bw'Omwaami, bati Nasaae niye owahola sino.