Read saamia Esabbuli 25 Bible Online

Esabbuli 25 - saamia bible

Esabbuli 25

¹Eyiri ewe Omwaami, niyo yi siingisiire obulamu bwaange.

²Ewe Nasaae waange, niiwe yi ndeesika, otakeraho esoni chaandiira daawe: Otakeraho abasuku baange baandehuduumbasiraho.

³Eee, lehe abahweesika bahaye ohudiirwaho esoni; nae leha abo abahujeemera badiirwe esoni.

⁴Ewe Omwaami, leha manye engira chao, njekese emihoosi kyao.

⁵Nyimiriremo mani onjekese obwadyeeri bwao, olwohuba niiwe Nasaae w'obuwonia bwaange; niiwe yi niindaanga oludaalo lwoosi.

⁶Ewe Omwaami, yichulisa esisa syao, neende obuheeri bwao butaakama, bi wali nabyo ohutula hale-na-haandi.

⁷Otechulisaho ebyonoono by'oburaaga bwaange, oba ebiholwa byaange bibi; nae njichulise ohuchaanakana neende obuheeri bwao butaakama, hulw'obulai bwao, ewe Omwaami!

⁸Omwaami mulai haandi muluungifu, sakira yeekesa ababi engira yi bahoyere ohubitiraho.

⁹Abaloonga nabo abeekesaanga engira yaadyeeri, neende by'adaha bahole.

¹⁰Engira ch'Omwaami choosi ndai nicho haandi chadyeeri, eyiri abo abadiira ebilagiro byae neende endagaano yae.

¹¹Olwohuba eliita lyao lyoolerefu, ewe Omwaami, ndehere ebyonoono byaange.

¹²Omuundu wiisa oluyaali mu Omwaami, Omwaami achia ohumweekesa engira yaahoyere ohudiira.

¹³Omweene achia ohunyoola ebiindu bilai, esyaalo sichia ohubechaanga esy'abaana bae.

¹⁴Omwaami mwiicha w'abaandu bamwiisamo oluyaali, haandi achia ohwomiisa endagaano yi yahola nabo.

¹⁵Ndewuunjaanga eyiri Omwaami ebiha byoosi, olwohuba niye ochia ohuumonia mu bidinyu.

¹⁶Ewe Omwaami kaluuhana wiiche yi ndi, mani wuungwiire esisa; olwohuba ndoong'ere syeeng'ene haandi ndi mu bidinyu.

¹⁷Monie ohweelalihira huli mu mwooyo kwaange, mani wuunduse mu bidinyu byaange.

¹⁸Baasaho hu bunyaahani bwaange neende hu bidinyu byaange, mani wuundeheremo ebyonoono byaange byoosi.

¹⁹Bonaho koti lu basuku baange bengiiye, haandi koti lu baasyuula neende etima liingi.

²⁰Liinda obulamu bwaange haandi wuumonie; otaandeha esoni chandiira daawe, olwohuba niiwe obweyikamo bwaange.

²¹Leha obwadyeeri neende obuluungifu biniindeenge, olwohuba niiwe yi ndeesika.

²²Ewe Nasaae, wonia Yisiraeli mu bidinyu byae byoosi.