Read saamia Esabbuli 26 Bible Online

Esabbuli 26 - saamia bible

Esabbuli 26

¹Ewe Omwaami, heengere omusaango wungwiire, olwohuba ngeenderaanga mubwadyeeri, haandi hweesikaanga ataali ohwehubbiraho hwoosi.

²Ewe Omwaami, ndeehaliirise haandi wuundeeme; obone omwooyo kwaange neende ebibaaso byaange.

³Olwohuba obuheeri bwao butaakama nibwo obuunyimiriraangamo, haandi ngeenderaanga mubwadyeeri bwao.

⁴Singeenderaanga alala neende abaleeta ebidinyu, Haba sinjihalaanga alala neende abaandu bataali neende obwadyeeri, oba holera alala neende abeebachirisi.

⁵Haba sindahanaanga neende omukaanda kw'abahola-mbi, haandi sifukiiriraanga ohwiihala neende ababi.

⁶Ewe Omwaami, ese ndesaaba amahono kaange ohweekesa endi haba siindi neende omusaango, haandi ndebodoohania alutaari yao,

⁷ninyembera mu kono ly'aakulu olweembo lw'ohweebasa, haandi ninomanoma hu biindu biwukisa byoosi bi wahola.

⁸Ewe Omwaami, ndaheera enyuumba yao yi wamenyamo, neende obwiihalo bw'oluyaali lwao.

⁹Otaasihirisira alala neende abahola-mbi, oba wasihiirisira obulamu bwaange alala neende abeedisi b'amabaanga,

¹⁰abaandu abeechula ebiholwa bibi, haandi abaheera muno asowa.

¹¹Nae ese hulwaange, ngeenderaanga mubwadyeeri; mani ngwiire esisa haandi wuumonie.

¹²Nyemere abuundu akwalaafu; mu muhung'aano kw'abaandu baangi njia ohukiniaanga Omwaami.