Read saamia Esabbuli 27 Bible Online

Esabbuli 27 - saamia bible

Esabbuli 27

¹Omwaami niye obulafu bwaange haandi niye obuwonia bwaange; sakira abulao yi ndahatya. Omwaami niye oliindaanga obulamu bwaange; sakira abulao onyala ohukera ndaatya.

²Abaandu babi nibaaseeta, haandi nibaanduulira, abasuku baange beene nibo abachia ohudandakira mani bakwe.

³Kata eye lyoosi nilindebodoohanie, haba siinja huteenga omwooyo; kata nibaaseeta haandi nibanwaania, njia ohudoong'a sa ni ngumire.

⁴Esiindu silala sa nisyo si ndi ohusaba eyiri Omwaami, haandi esyo nisyo si njia ohukoonya; endi nyale ohudoong'a sa nindamenya mu nyuumba y'Omwaami mu bulamu bwaange bwoosi, ohubonaanga obulai bw'Omwaami haandi mweteebeengeho ni ndi mu nyuumba ya Nasaae.

⁵Olwohuba niingwa mu bidinyu, Omwaami aba achia ohuungisaanga mu nyuumba yae; aba achia ohumbwiihaanga mu yeema lyae, haandi yaanyemesa hu lwaanda.

⁶Mani bulaanu njia ohweema nisingiise omutwe kwaange nyiingire abasuku baange bandebodoohaanie; mani njia ohuyaanirayo mu yeema lyae ebiyaanwa neende ekono ly'esangaalo; haandi njia ohweemberaanga Omwaami nindeehoya.

⁷Ewe Omwaami, wulira ekono lyaange nihulirira! Ngwiire esisa mani wungobolemo!

⁸Olwohuba niiwe owaboola oti, “Mungoonye.” Omwooyo kwaange kuhubolera kuti, “Omwaami niiwe yi ngoonya.”

⁹Omwaami, otandeekisa. Oteerusa omuhalaabani wao neende etima, niiwe omuhoonyi waange. Otaasukuna erwaanyi, otaanjwaang'a, ewe Nasaae omuwonia waange!

¹⁰Olwohuba bbaabba neende maama bamala ohuunjwaang'a nae Omwaami achia ohuniinda.

¹¹Ewe Omwaami; njekese engira yao; haandi wuundangiriremo mu mihoosi mikwalaafu olwohuba ndi neende abasuku baangi.

¹²Otakera abasuku baange baandiira; olwohuba abaloli bobubacha baasiingiriireho, nibechuule obwaalaba.

¹³Manyire endi njia ohubona obulai bw'Omwaami mu syaalo sy'abalamu!

¹⁴Weesike Omwaami; kobolamo amaani, mani leha omwooyo kwao kugume; eee, weesike Omwaami!