Read saamia Esabbuli 28 Bible Online

Esabbuli 28 - saamia bible

Esabbuli 28

¹Husaba ewe Omwaami, mbulire; niiwe omusiingi kwaange, otabuleera sa, ataali ao, n'otangobolamo, njia ohuba koti abo abachia emakoombe.

²Ewe Omwaami, bulira ekono ly'ohulira hwaange, koti lu hulirira wuhoonye, koti lu siingisa aakulu amahono kaange eyiri obwiihalo bwao woolerefu.

³Ewe Omwaami otanjirira alala neende ababi, alala neende abahola-mbi, abalomaloma bulai neende abaasye, nae mu myooyo kyaabwe, beechula obusuku.

⁴Basaandye ohuchianakana neende ebiholwa byaabwe, ohuchianakana neende obubi bw'ebiholwa byaabwe; basaandye ohuchianakana neende emirimo ky'amahono kaabwe; baberese omukabo kubahoyera.

⁵Koti lu batadeeba hu biindu bi Omwaami ahola, oba omulimo kw'amahono kae, achia ohubafunaka-funaka mani ahaye ohuboombaha haandi.

⁶Lehe Omwaami afumisibwe! Olwohuba awuliire ekono ly'ohulira hwaange.

⁷Omwaami niye amaani kaange neende engabo yaange; niye yi mwooyo kwaange kweesika; mani yahoonyere, sakira sangaala mani ndaamweembera olweembo nimweebasa.

⁸Omwaami niye amaani k'abaandu bae, haandi niye owaabina omudoole wae.

⁹Ewe Omwaami, wonia abaandu bao, haandi beresa abaandu bao ehabi; niiwe ohoyere ohubechaanga omwaayi waabwe, haandi obaliindeenge endaalo choosi.