Read saamia Esabbuli 34 Bible Online

Esabbuli 34 - saamia bible

Esabbuli 34

¹Njia ohukiniaanga Omwaami ebiha byoosi; njia ohumufumiaanga ataali ohwaakama.

²Njia ohwehoyeraanga mu Omwaami; lehe abasaanda bawulire mani basangaale.

³Eng'we mwiiche mufumie Omwaami, haandi lehe fweesi alala hukinie eliita lyae!

⁴Ndekongooya Omwaami, mani yeechia yangobolamo, mani yamonia ebyo byoosi ebyali nibitiisa.

⁵Tingaale eyiri Omwaami haandi musangaale; mani haba simwahadiirwe esoni.

⁶Omumanani wuno yamwekongooya, mani Omwaami yamuwulira,, haandi yamuwonia mu bidinyu byoosi.

⁷Malaika w'Omwaami yeebodoohania abo abamwiisamo oluyaali mani yaabawonia.

⁸Mwebonereho abeene muti Omwaami mulai. Abo abamweesika mani beeruhira yi ali, bali neende ehabi!

⁹Mwiise oluyaali mu Omwaami, eng'we aboolerefu bae, olwohuba abo abamwiisamo oluyaali babula esy'ohukoonya.

¹⁰Obwaana bw'edalang'i busaanda enjala mani bwaabula esyohulya; nae abo abeesika Omwaami, abulao esiindu silai si yahabeema.

¹¹Baana baange, mwiiche mani mutekeerese, mbeekese ohwiisa oluyaali mu Omwaami.

¹²Muundu siina odaha ohuba neende obulamu bulai, haandi ayiindira mani anyoole ebiindu bilai?

¹³Mani liinda olulimi lwao luhaye ohulomaloma ebiindu bibi, haandi omunwa kwao kuhaye ohulomalomaho eby'obubacha.

¹⁴Tula mu bubi, mani oholeenge ebilai; koonya omuleembe, mani womirireho.

¹⁵Omwaami aliinda abaluungifu, haandi awulira amaliro kaabwe.

¹⁶Omwaami haba s'atingaala bulai abahola-mbi, abona ati haba sibechuliswa mu syaalo.

¹⁷Abaluungifu nibasaba obuhoonyi, Omwaami abawuliraanga, mani abawonia mu bidinyu byaabwe byoosi.

¹⁸Omwaami ali aambi neende abo abeyendehereere, haandi awonia abefunaake mu myooyo.

¹⁹Omuundu muluungifu abechaanga n'ebidinyu biingi muno; nae Omwaami amalaanga amuwonia mu bidinyu byae byoosi.

²⁰Amuliindangaa bulai muno; libulao ekuumba lyae kata lala elichia ohufunakwa.

²¹Esibi sichia ohwiita ababi; haandi abo abatadaha abaluungifu bahasaande.

²²Omwaami anunulaanga obulamu bw'abahalaabani bae; abo boosi abamweesika haba sibahaheengerwe omusaango ohubahira.