Read saamia Esabbuli 38 Bible Online

Esabbuli 38 - saamia bible

Esabbuli 38

¹Esabbuli ya Daudi, ey'esiyaanwayo esy'esiichuliso. Ewe Omwaami, otanjolobya mu tima lyao, oba waasaandya mu bwaalaba bwao!

²Olwohuba wuufumiite neende obusaale bwao, haandi wuuhuyire mani ndaakwa aasi.

³Mbulira obuchuuni buli abuundu, hulw'etima lyao. Amakuumba kaange koosi kahomaka hulw'ebyonoono byaange.

⁴Olwohuba ebyonoono byaange bisidoyeere; biri koti omugugu musito kutanyala ohwedwiiha.

⁵Ebikoonjo byaange byeholere ehwaaku olw'obusiru bwaange.

⁶Fumbiirwe elalira mani ndafuumamwa aasi; ndira oludaalo lwoosi.

⁷Omubiri kwaange kwoosi kuli koti ku batubuuleho omuliro, kwosi-kwoosi kuchuuna.

⁸Mbwecheheere haandi funaakwe-funaakwemo; njorootana hulw'obuchuuni bu ndi nabwo mu mwooyo.

⁹Omwaami, ebiindu bi ndekoomba byoosi niiwe obimanyire, owulira ohwayuuya hwaange.

¹⁰Omwooyo kwaange kwewuuba, amaani kosi kambwaamo; emoni chaange chosi haba sichisiibona.

¹¹Ebikoonjo byaange bikera abeecha baange neende abasyaange nibahaya ohusuda aambi naange, kata abeeho baange bosi beema eyale naange.

¹²Abasuku baange badaha ohuunjita bateka emiteego chaabwe, abo abadaha ohunyaala balomaloma ebiindu by'ohusihirisa, haandi buli siha babaasa olukwe lwoong'ene.

¹³Nae ese ndi koti omudiimbe, owutalira, koti omuundu yi lulimi lwayaanda mani owutalomalomaanga.

¹⁴Eee, ndi koti omuundu otawuliraanga, haandi otanyala ohukobolamo.

¹⁵Nae ewe Omwaami, niiwe yi ndeesika; niiwe Omwaami Nasaae waange, ochia ohuungobolamo.

¹⁶Husaba esiindu silala syoong'ene, “Otafukiirira abasuku baange ohusangaala hulw'ebidinyu byaange, otafukiirira baandehuduumbasiraho ninyoolere ebidinyu!”

¹⁷Ndi aambi ohukwa, ndi mubuchuuni buli siha.

¹⁸Ndeeyamire ebyonoono byaange, ndeeyolobya hulw'ebyonoono byaange.

¹⁹Abasuku baange balamu haandi bali neende amaani, abo abataandaha ataali esifune baangi muno.

²⁰Mbaholera ebilai, nabo baaholera ebibi, banyiingania olwohuba teemaho ohuhola ebilai.

²¹Ewe Omwaami, otaanjwaang'a! Nasaae waange, otaba eyale naange!

²²Bulaanu yanguwaho wuhoonye, Ewe Omwaami, obuwonia bwaange!