Read saamia Esabbuli 49 Bible Online

Esabbuli 49 - saamia bible

Esabbuli 49

¹Abaandu mweesi, muwulire sino! Abaandu bamenya hu syaalo syoosi, mutekeerese,

²abadiidi neende abahunuufu, abayiinda neende abamanani nasilala!

³Emboosi chi nomanoma ch'amakesi; ebiindu bi mbaasa mu mwooyo kwaange bichia ohumanyihana.

⁴Njia ohwehaliirisa olukaado; mani njekese amahuluundu kalwo nihubba obuhana.

⁵Lwasiina mba omuti mu biha by'ebidinyu, abasuku baange nibandebodoohania,

⁶abo abeesika obuyiinda bwaabwe mani beehuduumbasa olw'obuungi bw'obuyiinda bwaabwe?

⁷Mubwadyeeri, abulao omuundu onyala ohwewonia omweene, oba yatuunga Nasaae eseende chikula obulamu bwae,

⁸olwohuba obulamu bw'omuundu bw'engaanga y'aakulu muno, abulao onyala ohubutuunga,

⁹hu anyale ohuyiindira endaalo choosi, mani ahaye ohuchia emakoombe.

¹⁰Eee, buli muundu abona ati kata abakesi bosi bafwa, abamanyire alala neende abasiru bosi bali n'ohusihirira mani baalehera abaandu baandi emyaandu kyaabwe.

¹¹Eng'ani chaabwe nicho amadaala kaabwe k'endaalo choosi, yi bachia ohumenya endaalo choosi, kata yahaba nibaali neende eloba libalaangaanga elyaabwe lyeene.

¹²Omuundu haba s'anyala ohudoong'a mu luyaali lwae, ali koti ebisolo bisihirira.

¹³Sino nisyo esyoola hu baandu beesika eby'obusiru, enjakamo yaabo abasangaalira mu myaandu kyaabwe.

¹⁴Bali koti amakoondi kachia ohwiitwa; Oluumbe nilwo oluchia ohuba omwaayi waabwe; bachia ohwiihirira tiiri mu ng'ani, mani emibiri kyaabwe kichia ohubola. Emakoombe niyo eyahabe edaala lyaabwe.

¹⁵Nae Nasaae niye eyahawonie omwooyo kwaange ohuchia emakoombe, olwohuba achia ohunjaakaanira.

¹⁶Otatya daawe, omuundu n'anyoola obuyiinda, n'oluyaali lwomu nyuumba yae nilwemeeda.

¹⁷Olwohuba naafwa, sibulao esiindu siyahachie nasyo daawe; oluyaali lwae haba silwahamuloondeho mu ng'ani.

¹⁸Omuundu kata yahehuduumbasa ati mu bulamu bwae yali neende esangaalo, kata abaandu bahamufumia bati omweene yali bulai,

¹⁹yahachie emakoombe eyiri bakuuka yaabwe, abatahaboneho obulafu haandi.

²⁰Omuundu haba s'anyala ohudoong'a mu luyaali lwae, ali koti ebisolo bisihirira.